រាជធានីភ្នំពេញ ៖ អ្នកធុរកិច្ចនានានៅកម្ពុជាបានសម្តែងនូវសុទិដ្ឋិនិយមថា កម្ពុជា និងមីយ៉ាន់ម៉ាអាចធ្វើកិច្ចសហការលើវិស័យពាណិជ្ជកម្ម និងទេសចរណ៍រវាងប្រទេសទាំងពីរបន្ថែមទៀត ស្របពេលប្រធានាធិបតីមីយ៉ាន់ម៉ា មកបំពេញទស្សនកិច្ចនៅកម្ពុជា ចាប់ពីថ្ងៃទី៣ ដល់៦ កុម្ភៈ នេះ។
លោក អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ដែលបានបោះទុនវិនិយោគនៅប្រទេសមីយ៉ាន់ម៉ា ក្នុងនាមជាគ្រឹះស្ថានមីក្រូហិរញ្ញវត្ថុ បានថ្លែងឲ្យដឹងកាលពីរសៀលថ្ងៃទី២ កុម្ភៈថា ដោយសារប្រទេសទាំងពីរមានព្រំដែននៅឆ្ងាយពីគ្នា ទើបធ្វើឲ្យការភ្ជាប់ទំនាក់ទំនងពាណិជ្ជកម្មមានការលំបាក ប៉ុន្តែកម្ពុជាអាចសហប្រតិបត្តិការជាមួយប្រទេសមីយ៉ាន់ម៉ា លើវិស័យទេសចរណ៍ តាមរយៈការផ្លាស់ប្តូរភ្ញៀវទេសចរពីខេត្តសៀមរាប ទៅកាន់ប្រាសាទបាហ្កាន ជាតំបន់បេតិកភណ្ឌវប្បធម៌ពិភពលោករបស់មីយ៉ាន់ម៉ា ។
លោកបន្តថា ៖ « ឱកាសផ្លាស់ប្តូរពាណិជ្ជកម្មរវាងកម្ពុជា និងមីយ៉ាន់ម៉ា គឺវិស័យទេសចរណ៍ ហើយនិងអាចធ្វើពាណិជ្ជកម្មជាមួយគ្នាលើវិស័យធនាគារ និងហិរញ្ញវត្ថុផងដែរ ។ បច្ចុប្បន្ន អេស៊ីលីដា មានសាខាចំនួន៦នៅប្រទេសមីយ៉ាន់ម៉ា និងគ្រោងពង្រីក២សាខាទៀតនៅពាក់កណ្តាលឆមាសទី១ឆ្នាំនេះ » ។
យោងតាមទិន្នន័យក្រសួងទេសចរណ៍ឲ្យដឹងថា កាលពីឆ្នាំ២០១៦កន្លងមក ភ្ញៀវទេសចរមីយ៉ាន់ម៉ាមកប្រទេសកម្ពុជា មានជាង១ម៉ឺន២ពាន់នាក់ និងភ្ញៀវកម្ពុជាទៅទស្សនាមីយ៉ាន់ម៉ា មានតែជាង៤.០០០នាក់ ។
លោក ហូ វណ្ឌី អគ្គលេខាធិការសម្ព័ន្ធ សមាគមទេសចរណ៍ជាតិកម្ពុជា ឲ្យដឹងថា កន្លងមក មានការហោះហើរត្រង់របស់ក្រុមហ៊ុនអាកាសចរណ៍ Myanmar Air មកកាន់ប្រទេសកម្ពុជា ប៉ុន្តែបានផ្អាករហូតមកទល់ពេលនេះ ដោយសារចំនួនភ្ញៀវទេសចររវាងប្រទេសទាំងពីរនៅមានកម្រិត ។ ប្រទេសទាំងពីរគោរពសាសនាដូចគ្នា មានជីវភាពប្រហាក់ប្រហែលគ្នា។ ដូច្នេះ ប្រសិនជាប្រទេសទាំងពីរមានទំនាក់ទំនងល្អ នឹងធ្វើឲ្យមានលំហូរភ្ញៀវទេសចរល្អ ។
លោកបន្តថា ៖ « ការបើកចំហទំនាក់ទំនងការទូតរវាងប្រទេសទាំងពីរ នឹងអាចជំរុញឲ្យការធ្វើពាណិជ្ជកម្មកើនឡើង ទេសចរណ៍កើនឡើង និងអាចបើករបាំង ហើយកម្ពុជាអាចហោះទៅកាន់មីយ៉ាន់ម៉ាបាន ។ ប្រសិនជាទំនាក់ទំនងល្អ វាជាការបើកទំព័រប្រវត្តិសាស្ត្រ ថ្មីមួយសម្រាប់ប្រជាជននៃប្រទេសទាំងពីរ និងក្រុមហ៊ុនអាកាសចរណ៍កម្ពុជាអាចភ្ជាប់ជើងហោះហើរទៅមីយ៉ាន់ម៉ាវិញ » ។
ទំហំពាណិជ្ជកម្មរវាងកម្ពុជា និងមីយ៉ាន់ម៉ា គឺមានកម្រិតនៅឡើយ ដោយកាលពីឆ្នាំមុន កម្ពុជានាំចេញទៅកាន់មីយ៉ាន់ម៉ា មានទំហំទឹកប្រាក់ជាង១លាន៤សែនដុល្លារ និងកម្ពុជានាំចូលពីមីយ៉ាន់ម៉ា មានទំហំទឹកប្រាក់ជាង៣លានដុល្លារអាមេរិក ។
បច្ចុប្បន្ន កម្ពុជាមានក្រុមហ៊ុនចំនួន២៣បានវិនិយោគនៅប្រទេសមីយ៉ាន់ម៉ា ក្នុងនោះ១៩ជាក្រុមហ៊ុនផ្នែកសេវាកម្ម, ២ជាធនាគារ, ក្រុមហ៊ុន១ធ្វើពាណិជ្ជកម្ម និងក្រុមហ៊ុន១ទៀតបម្រើសេវាទូទៅ ។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជា ថ្លែងថា ពាណិជ្ជកម្មកម្ពុជា និងមីយ៉ាន់ម៉ា ពិតជាមានទំហំតូចនៅឡើយ ដោយសារកន្លងមក ប្រទេសមីយ៉ាន់ម៉ាបានកាត់ផ្តាច់ទំនាក់ទំនងជាមួយកម្ពុជា ក៏ដូចជាបណ្តាប្រទេសនានានៅលើពិភពលោក ។ ដូច្នេះ ការបង្កើនពាណិជ្ជកម្មរវាងប្រទេសទាំងពីរ គឺអាស្រ័យលើភាគីមីយ៉ាន់ម៉ាបើកចំហកម្រិតណា បន្ទាប់ពីដំណើរទស្សនកិច្ចនេះ ។ ប្រទេសមីយ៉ាន់ម៉ាធ្លាប់ដឹកនាំដោយរបបយោធា ហើយរដ្ឋាភិបាលថ្មីបច្ចុប្បន្ន ក៏មិនទាន់មានភាពច្បាស់លាស់នៅឡើយ។
លោកបន្តថា ៖ « កម្ពុជាមានសក្តានុពលលើពាណិជ្ជកម្មគ្រប់វិស័យ ប៉ុន្តែការពង្រីកទំហំពាណិជ្ជកម្មរវាងប្រទេសទាំងពីរ យើងនៅចាំមើលថា គេបើកចំហកម្រិតណា ព្រោះទំនាក់ទំនងប្រៀបដូចជាមិត្តភក្តិ តើគេរាប់អានយើងជាមិត្តជិតស្និទ្ធ ឬត្រឹមជាមិត្តធម្មតា » ៕
ចែករំលែកព័តមាននេះ