រាជធានីភ្នំពេញ ៖ នាយកដ្ឋានប្រយុទ្ធនឹងជំងឺឆ្លងអំពាវនាវឲ្យប្រជាជនប្រុងប្រយ័ត្នជំងឺផ្តាសាយបក្សី ខណៈពេលមានការរីករាលដាលឡើងវិញក្នុងប្រទេសកម្ពុជា ។
បើតាមការអះអាងរបស់នាយកដ្ឋានប្រយុទ្ធនឹងជំងឺឆ្លងឲ្យដឹងថា នៅដើមឆ្នាំ២០១៧នេះមានការរីករាលដាលឡើងវិញនៃជំងឺផ្តាសាយបក្សីលើសត្វបក្សីក្នុងខេត្តចំនួនពីរ គឺខេត្តកំពង់ធំ និងខេត្តស្វាយរៀង ។ ទោះជាយ៉ាងណាក្តីមកទល់ពេលនេះនៅពុំទាន់រកឃើញករណីជំងឺផ្តាសាយបក្សីកើតមាននៅលើមនុស្សនៅឡើយទេ ។
ទោះបីជាមិនទាន់កើតមាននៅលើមនុស្សក៏ពិតមែន នាយកដ្ឋានប្រយុទ្ធនឹងជំងឺឆ្លង ក៏នៅតែអំពាវនាវឲ្យប្រជាជនគ្រប់រូបប្រុងប្រយ័ត្នជំងឺផ្តាសាយបក្សី រួមទាំងឈ្វេងយល់ឲ្យបានច្រើនអំពីជំងឺនេះ ជាពិសេសក្នុងពិធីបុណ្យចូលឆ្នាំខ្មែរដែលនឹងឈានមកដល់ក្នុងពេល ឆាប់ៗនេះ ។ សូមកុំយកមាន់ ទា ឬសត្វបក្សីឈឺ ឬងាប់ រៀបចំជាអាហារ ឬលក់បន្ត ត្រូវអនុវត្តអនាម័យក្នុងការ បោចរោម និងចំអិនជាប់ជានិច្ច ពិសេសបើសិនជាឃើញមាន់ ទាងាប់ច្រើនខុសពីធម្មតា ត្រូវរាយការណ៍ទៅពេទ្យសត្វ គ្រូពេទ្យ ឬអាជ្ញាធរមូលដ្ឋានដើម្បីត្រួតពិនិត្យនិងតាមដាន ។
សូមបងប្អូនប្រុងប្រយ័ត្នជានិច្ចអំពីការចម្លងជំងឺផ្តាសាយបក្សី ហើយត្រូវអនុវត្តតាមវិធីបង្ការដូចជា៖
-ដើម្បីសុវត្ថិភាពត្រូវពាក់ម៉ាស់ ឬចងក្រមាបិទមាត់និងច្រមុះមុនពេលប៉ះពាល់ជាមួយមាន់ទា ។
-ស្រុសមាន់ ឬទាជាមួយទឹកក្តៅមុនពេលបោចរោម ។
-ប្រមូលរោមមាន់ ទា ឬកាកសំណល់ផ្សេងទៀតយកទៅកប់ ឬដុកចោល ។
-លាងសំអាតដៃនិងវត្តុប្រើប្រាស់សម្រាប់សម្លាប់មាន់ទាជាមួយផេះ ឬសាប៊ូឲ្យបានស្អាត។
-សូមកុំយកមាន់ ទា ឬសត្វបក្សីឈឺ ឬងាប់មករៀបចំជាអាហារ ឬលក់បន្ត ត្រូវអនុវត្តអនាម័យក្នុងការបោចរោម និងចំអិនជាប់ជានិច្ច ។
ចំពោះបុគ្គលដែលមានរោគសញ្ញាដូចជា៖
គ្រុនក្តៅលើសពី៣៨អង្សាសេ ក្អក ឬឈឺក ដកដង្ហើមហត់ និងមានប្រវត្តិប៉ះពាល់ជាមួយបក្សីឈឺឬងាប់ក្នុងអំឡុងពេល៧ថ្ងៃមុន ចាត់ទុកថាជាករណីសង្ស័យត្រូវបញ្ចូនអ្នកជំងឺទៅមណ្ឌលសុខភាព ឬមន្ទីរពេទ្យជិតបំផុតដើម្បីព្យាបាល យើងមានឱសថសម្រាប់ព្យាបាលជំងឺនេះ ។
ចាប់តាំងពីឆ្នាំ២០០៥ ដល់២០១៦ ក្នុងប្រទេសយើងធ្លាប់កើតមានជំងឺផ្តាសាយបក្សីដែលបានឆ្លងពីសត្វបក្សីមកមនុស្សចំនួន៥៦ករណីដែលក្នុងនោះ៣៧ករណីបានស្លាប់ ។
ដោយឡែកគ្រាន់តែឆ្នាំ២០១៣មានឆ្លងលើមនុស្សចំនួន២៦ករណីដែលក្នុងនោះមាន១៤ករណីបានស្លាប់ ។ ក្នុងឆ្នាំ២០១៤មាន៩ករណី និង៤ករណីបានស្លាប់ ។
ជាក់ស្តែងកាលពីពេល ថ្មីៗកន្លងទៅនេះមានការរីករាលដាលនៃជំងឺផ្តាសាយបក្សីនៅប្រទេសកូរ៉េខាងត្បូង និងប្រទេសជប៉ុន ដែលបណ្តាលឲ្យមានការសម្លាប់សត្វបក្សីប្រមាណជាង២០លានក្បាល ដើម្បីបង្ការការឆ្លងរាតត្បាតមកមនុស្សផងដែរ ។ ព័ត៌មានបន្ថែមសូមទាក់ទងទូរស័ព្ទលេខ១១៥ដោយពុំមានការគិតប្រាក់ឡើយ៕
ចែករំលែកព័តមាននេះ