ខេត្តកំពង់ចាម ៖ នៅតាមដងផ្លូវជាតិលេខ៧១ ក្នុងភូមិតាំងក្រង ឃុំស្វាយទាប ស្រុកចំការលើ ប្រជាពលរដ្ឋជាច្រើនគ្រួសារ កំពុងតែបណ្តុះពូជស្វាយចន្ទីប្រភេទM23លក់ ហើយតាមរយៈរបរនេះបានជួយលើក
ខេត្តកំពង់ចាម ៖ នៅតាមដងផ្លូវជាតិលេខ៧១ ក្នុងភូមិតាំងក្រង ឃុំស្វាយទាប ស្រុកចំការលើ ប្រជាពលរដ្ឋជាច្រើនគ្រួសារ កំពុងតែបណ្តុះពូជស្វាយចន្ទីប្រភេទM23លក់ ហើយតាមរយៈរបរនេះបានជួយលើកកម្ពស់ជីវភាពគ្រួសារពួកគាត់ឱ្យធូរស្រាលមួយកម្រិតផងដែរ ។
ជាមួយនោះ គេសង្កេតឃើញអ្នកនៅតាមបណ្តាខេត្តជាច្រើនមកកម្ម៉ង់ទិញយកទៅដាំ ដោយសារតែពូជនេះធន់នឹងអាកាសធាតុហើយឆាប់ហុចផលដោយគ្រាប់ធំៗមានទម្ងន់ធ្ងន់ស្រួលលក់លើទីផ្សារ ។
ម្ចាស់កសិដ្ឋានយីហោ«ធី ហេងលាភ ៩៩៩៩» នៅភូមិឃុំខាងលើប្រាប់ឱ្យដឹងនៅរសៀលថ្ងៃទី៤ កុម្ភៈ ថា គាត់កាលពីមុនជាអ្នកដាំស្វាយចន្ទី និងប្រមូលទិញគ្រាប់ស្វាយចន្ទីពីប្រជាពលរដ្ឋក្នុងស្រុកចំការលើយកទៅលក់លើទីផ្សារមានរយៈពេល១២ឆ្នាំមកហើយ ។
លុះក្រោយៗមកទៀត រូបលោកបានស្រាវជ្រាវឃើញថា ពូជM23 មានលក្ខណៈងាយស្រួលដាំក្នុងរយៈពេលតែ២ឆ្នាំនឹងហុចផលទើបលោកមានគំនិតផ្សព្វផ្សាយទៅដល់ប្រជាពលរដ្ឋ ។ ដោយបានបណ្តុះពូជនេះលក់នៅលើទីផ្សារដែលមានរហូតដល់ទៅជាង៥ម៉ឺនកូន ចំពោះអតិថិជនដែលមកកុម្ម៉ង់ទិញមានដូចជាមកពីខេត្តកំពង់ធំ ខេត្តសៀមរាប ខេត្តមណ្ឌលគិរី ខេត្តរតនៈគិរី និងខេត្តផ្សេងៗមួយចំនួនទៀត ។
ម្ចាស់កសិដ្ឋានរូបនេះបានប្រាប់បន្តថា រូបលោកបានចាប់ផ្តើមបណ្តុះកូនស្វាយចន្ទីលក់នេះទើបតែបាន២ឆ្នាំនេះទេ ។ កាលពីឆ្នាំ២០១៦កន្លងទៅ គ្រាប់ស្វាយចន្ទីក្នុង១គីឡូក្រាមតម្លៃ៦.០០០រៀលពេលដែលហុចផលដំបូង លុះទិន្នផលបានមកពីគ្រប់ទីកន្លែង តម្លៃចុះនៅជាង៥.០០០រៀល ។ សម្រាប់ខែកុម្ភៈ ២០១៧នេះគ្រាប់ស្វាយចន្ទី១គីឡូក្រាមតម្លៃ៦.៥០០រៀល ប្រសិនបើដីក្រហមល្អក្នុង១ហិកតាហុចផលបានពី២តោនកន្លះទៅ៣តោន ។ ម្យ៉ាងទៀតប្រសិនបើគ្រាប់ស្វាយចន្ទីស្ងួតល្អយើងស្តុកទុករាងយូរបន្តិច តម្លៃនឹងបាន១តោនពី១.៨០០ដុល្លារទៅ២.០០០ដុល្លារ ។
លោក ឈួន សុខឃាន់ អាយុ៤០ឆ្នាំ នៅភូមិតាំងក្រង ឃុំស្វាយទាប ប្រាប់ឱ្យដឹងថា ក្នុងពេលរូបលោកចាប់ផ្តើមបណ្តុះពូជស្វាយចន្ទី M23 ក្នុងឆ្នាំដំបូងមានតែជាង២ម៉ឺនកូនទេ លុះក្រោយមកទៀតមានអតិថិជនមកពីខេត្តព្រះវិហារ ខេត្តរតនៈគិរី ខេត្តមណ្ឌលគិរី និងខេត្តមួយចំនួនទៀតបានកម្ម៉ង់ទិញខ្លះរហូតដល់ទៅ២ទៅ៣ម៉ឺនកូនយកទៅដាំនិងលក់បន្តទៀតផងដែរ ។ មកដល់ឆ្នាំ២០១៧ជាឆ្នាំទី៤ហើយ ការបណ្តុះកូនស្វាយចន្ទីលក់មានការកើនដល់ទៅជាង១០ម៉ឺនកូន ក្នុងកូនស្វាយចន្ទី១ដើមលក់បានតម្លៃ២.០០០រៀល ។ របរនេះបានជួយលើកស្ទួយជីវភាពគ្រួសារលោកឱ្យធូរស្រាលមួយកម្រិតផងដែរ ។
លោក ប្លង់ វ៉ាន់ជីម ប្រធានការិយាល័យកសិឧស្សាហកម្មនៃមន្ទីរកសិកម្មខេត្តប្រាប់ឱ្យដឹងនៅរសៀលថ្ងៃទី៥ កុម្ភៈ ២០១៧ថា ចំពោះស្វាយចន្ទីដែលប្រជាពលរដ្ឋដាំដុះមានដូចជានៅស្រុកកំពង់សៀម ស្រុកព្រៃឈរ ស្រុកចំការលើ ស្រុកជើងព្រៃ ស្រុកស្ទឹងត្រង់ និងស្រុកបាធាយ សរុបទាំងអស់១០.០០០ហិកតា ហើយប្រភេទពូជទំនើបM23 កសិករនិយមដាំជាងគេ ។ ពេលប្រមូលផលបានឈ្មួញភាគច្រើននាំចេញទៅប្រទេសវៀតណាម ដែលមានតម្លៃ១គីឡូក្រាមពី៤.០០០រៀលទៅ៦.០០០រៀល ៕
ចែករំលែកព័តមាននេះ