«Daily Mail» របស់អង់គ្លេសកាលពីពេល ថ្មីៗកន្លងមកផ្សាយថា ស្ដ្រីឥណ្ឌូណេស៊ីម្នាក់ទទួលទោសដោយ វាយខ្នងចំនួន២៦រំពាត់ ព្រោះប្រព្រឹត្ដខុសច្បាប់សាសនា «សារីអា» ដែលហាមមិនឱ្យរួមរ័កមុនពេលរៀបការ ។ ចំណែកខាងបុរសទទួលទោសដូចគ្នាដែរ ។
ស្ដ្រីរូបនោះត្រូវបង្ខំឱ្យអង្គុយលត់ជង្គង់នៅទីវាលខាងមុខវិហារមូស្ល៊ីម ក្នុងក្រុងអាសេ ប្រទេសឥណ្ឌូណេស៊ី និងត្រូវគេវាយ២៦រំពាត់ ។ ចំណែកខាងបុរសជាកូស្នេហ៍ត្រូវដាក់ទោសដោយប្រើរំពាត់វែងវាយចំនួន២៦រំពាត់ដែរ ។ អ្នកទោសទាំង២នាក់ ដែលទទួលទណ្ឌកម្មបានស្រែកយំដោយក្ដីឈឺចាប់ ។
ខេត្ដអាសេ ប្រទេសឥណ្ឌូណេស៊ី មានជនជាតិមូស្ល៊ីមច្រើនបំផុតនៅលើពិភពលោក ជាខេត្ដមួយប្រើច្បាប់ «សារីអា» ឬច្បាប់សាសនាអីុស្លាម ។ ច្បាប់បញ្ជាក់ថា បុរសស្ដ្រីដែលមិនមែនជាប្ដី-ប្រពន្ធ មិនអាចនៅក្បែរគ្នាទេ ប្រសិនបើល្មើសនឹងទទួលទោសដោយវាយនឹងរំពាត់ ។
ចំពោះការរួមរ័ករបស់មនុស្សភេទដូចគ្នា ការលេងល្បែងស៊ីសង និងផឹកគ្រឿងស្រវឹង ត្រូវហាមឃាត់ ។ អ្នកប្រព្រឹត្ដល្មើសត្រូវដាក់ទោសដោយវាយនឹងរំពាត់ឫស្សី ក្រោយពីខេត្ដអាសេ បានទទួលបានការកាន់កាប់ស្វយ័ត ចាប់ពីឆ្នាំ២០១២មក ។
សេចក្ដីព្រាងច្បាប់ «សារីអា» ថ្មីជាច្រើនមាត្រា បានដាក់ឱ្យប្រើនៅខេត្ដអាសេ កាលពីឆ្នាំកន្លងមក បង្កឱ្យកើតមានការជំទាស់ពីក្រុមសកម្មជនសិទ្ធិសមុស្ស ។ នៅឆ្នាំ២០១៥ ក្រុងបាន់ដាអាសេ ជាក្រុងធំក្នុងខេត្ដអាសេ ចេញច្បាប់ហាមស្ដ្រីចូលទីតាំងកម្សាន្ដសប្បាយនៅក្រោយម៉ោង១១យប់ ទោះបីជាពួកគេធ្វើដំណើរទៅជាមួយប្ដី ឬសមាជិកគ្រួសារជាបុរសភេទក៏ដោយ ។
ក្រៅពីនេះខេត្ដអាសេ នៅមានច្បាប់ហាមបុរស និងស្ដ្រី ដែលមិនទាន់រៀបការជិះម៉ូតូជាមួយគ្នាទៀតផង ៕
ចែករំលែកព័តមាននេះ