រាជធានីភ្នំពេញ ៖ សហព័ន្ធកីឡាទាញព្រ័ត្រកម្ពុជាកាលពីថ្ងៃទី៥ កុម្ភៈ បានរៀបចំធ្វើសន្និសីទសារព័ត៌មានមួយស្ដីពីការត្រៀមបញ្ជូនអត្តពលិករបស់ខ្លួនចំនួន៤០នាក់ស្មើនឹង៤ក្រុម ទៅចូលរួមប្រកួតនៅក្នុងព្រឹត្តិការណ៍កីឡាទាញព្រ័ត្រអាស៊ីអាគ្នេយ៍ និងព្រឹត្តិការណ៍ទាញព្រ័ត្រអាស៊ីលើកទី១១នៅប្រទេសថៃ ។
លោកស្រី ប្រាក់ សម្ផស្ស អគ្គលេខាធិការសហព័ន្ធកីឡាទាញព្រ័ត្រកម្ពុជាបានឱ្យដឹងថា នេះជាលើកទី១ហើយដែលកម្ពុជា មានឱកាសបញ្ជូនអត្តពលិករបស់ខ្លួនទៅចូលរួមប្រកួតនៅលើឆាកអន្តរជាតិបែបនេះ ។ ការប្រកួតនេះ នឹងចាប់ផ្ដើមធ្វើពីថ្ងៃទី២៦ដល់៣០ មេសា ឆ្នាំ២០១៧ ដោយសហព័ន្ធអន្តរជាតិបានអនុញ្ញាតឱ្យកម្ពុជាបញ្ជូន៥វិញ្ញាសាទៅចូលរួមប្រកួត ប៉ុន្តែសហព័ន្ធប្រហែលជាមានសមត្ថភាពបញ្ជូនតែ៤ក្រុមប៉ុណ្ណោះទៅចូលរួមប្រកួត ។វិញ្ញាសាដែលដាក់ឱ្យប្រកួតមានផ្នែកបុរសនិងផ្នែកនារីអាយុ២៣ឆ្នាំឡើង និង២៣ឆ្នាំចុះ និងវិញ្ញាសាប្រកួតចម្រុះបុរសនារី ។ ដោយឡែកចំពោះវិញ្ញាសាចម្រុះបុរសនារីស្ថិតនៅក្នុងការពិចារណាសិន ដោយសារតែយើងនៅខ្វះធនធានអត្តពលិក ។
លោកស្រី ប្រាក់ សម្ផស្ស បានបន្តឱ្យដឹងទៀតថា សម្រាប់ការទៅចូលរួមប្រកួតនេះទៀត ថ្វីដ្បិតតែយើងមិនសូវមានសង្ឃឹមក្នុងការដណ្ដើមជ័យជម្នះមែន ប៉ុន្តែយើងនឹងទទួលបាននូវបទពិសោធន៍ពីគេដើម្បីអភិវឌ្ឍខ្លួនឯង ។
លោកស្រីបន្តថា នៅថ្ងៃទី៦ដល់ថ្ងៃទី៩ មេសា សហព័ន្ធកីឡាទាញព្រ័ត្រកម្ពុជាបានចាប់ផ្ដើមធ្វើការប្រមូលផ្ដុំកីឡាករ-កីឡាការិនីជម្រើសជាតិជាលើកដំបូង ។ ដូច្នេះវាគឺជាឱកាសល្អខ្លាំងណាស់សម្រាប់កម្ពុជា ដោយយើងបានហាត់សមពីរបៀបទាញឱ្យត្រឹមត្រូវតាមក្បួនខ្នាតមុនពេលយើងចេញដំណើរ ។ លោកស្រីបានឱ្យដឹងទៀតថា សព្វថ្ងៃសហព័ន្ធមានពេលហ្វឹកហាត់ក្នុងមួយសប្ដាហ៍តែមួយថ្ងៃប៉ុណ្ណោះ ប៉ុន្តែលោកស្រីនៅតែកោតសរសើរយ៉ាងខ្លាំងដល់កីឡាករ-កីឡាការិនីទាំងអស់ដែលបានខិតខំហ្វឹកហាត់យ៉ាងសកម្មដោយមិនខ្លាចនើយហត់បែបនេះ ។ និយាយរួមពួកគេទាំងអស់សុទ្ធតែមានឆន្ទៈក្នុងការហ្វឹកហាត់ ។
គួររំលឹកថា លក្ខន្តិកៈនៃការប្រកួតទាញព្រ័ត្រនេះក្នុងមួយក្រុមមានគ្នា១០នាក់ប៉ុន្តែពេលប្រកួតមួយក្រុមមានគ្នាតែ៨នាក់ប៉ុណ្ណោះ ៕
ចែករំលែកព័តមាននេះ