ប្រទេសឥណ្ឌូណេស៊ី ៖ យោងតាមក្រុមហ៊ុនប្រឹក្សាផ្នែកអចលនទ្រព្យដ៏ធំមួយឲ្យដឹងថា ស្ថានភាពសេដ្ឋកិច្ចដូចជា ការលូតលាស់នៃផលិតផលក្នុងស្រុកសរុប, ស្ថិរភាពរូបិយវត្ថុ និងពន្ធ គឺបានបង្កជាឧបសគ្គដល់ការ
ប្រទេសឥណ្ឌូណេស៊ី ៖ យោងតាមក្រុមហ៊ុនប្រឹក្សាផ្នែកអចលនទ្រព្យដ៏ធំមួយឲ្យដឹងថា ស្ថានភាពសេដ្ឋកិច្ចដូចជា ការលូតលាស់នៃផលិតផលក្នុងស្រុកសរុប, ស្ថិរភាពរូបិយវត្ថុ និងពន្ធ គឺបានបង្កជាឧបសគ្គដល់ការលក់ខុនដូនៅហ្សាការតា កាលពីឆ្នាំមុន ។
ក្រុមហ៊ុន Jones Lang LaSalle កត់សម្គាល់ថា មានតែខុនដូចំនួន៥.៤៥០យូនីតប៉ុណ្ណោះដែលត្រូវបានលក់ចេញក្នុងឆ្នាំ២០១៦ ដោយចំនួននេះបានធ្លាក់ចុះច្រើនជាងពាក់កណ្តាលទៀត បើធៀបនឹងឆ្នាំ២០១៥ ដែលលក់បានរហូតដល់១២ពាន់យូនីត ។
នាយកផ្នែកស្រាវជ្រាវរបស់ Jones Lang LaSalle លោក James Taylor ថ្លែងថា ៖ «អតិថិជននៅស្ទាក់ស្ទើរក្នុងការទិញ មិនមែនមកពីពួកគេគ្មានប្រាក់ទេ ប៉ុន្តែមកពីស្ថានភាពសេដ្ឋកិច្ចដែលធ្វើឲ្យប៉ះពាល់ដល់ការសម្រេចចិត្តរបស់ពួកគេ » ។
លោកបានថ្លែងកាលពីថ្ងៃពុធថា ៖ « តាំងពីពាក់កណ្តាលឆ្នាំ២០១៥មក ការលក់ផ្ទះបានជួបប្រទះនឹងភាពអន់ថយ ហើយពន្ធបានបង្កជាឧបសគ្គផងដែរ ដែលធ្វើឲ្យត្រីមាសចុងក្រោយនៃឆ្នាំ២០១៦ ធ្លាក់ចុះដល់បាតទីផ្សារ » ។
មានខុនដូត្រឹមតែ១.៣០៧យូនីតប៉ុណ្ណោះដែលត្រូវបានលក់ចេញក្នុងអំឡុងត្រីមាសទី៤ឆ្នាំ២០១៦ គឺតិចជាងរយៈពេលដូចគ្នាក្នុងឆ្នាំ២០១៥ ដែលលក់បាន៣ពាន់យូនីត ។
ចំណែកក្រុមហ៊ុនអចលនទ្រព្យបានឆ្លើយតបនឹងការធ្លាក់ចុះនៃការលក់នេះ ដោយកាត់បន្ថយចំនួនគម្រោងសាងសង់របស់ពួកគេ ហើយមានតែ១.២៤៩យូនីតប៉ុណ្ណោះដែលត្រូវបានដាក់លក់ក្នុងត្រីមាសទី៤ឆ្នាំ២០១៦ ។
តាមទិន្នន័យបង្ហាញថា ចំនួនជាមធ្យមនៃខុនដូដែលបានដាក់លក់ក្នុងមួយត្រីមាសកាលពីឆ្នាំ២០១៥ និង២០១៦ មាន១.៨៤០អាផាតមិន និងតិចជាងឆ្នាំ២០១៣ និង២០១៤ ដែលមាន ដល់២.៩៤០អាផាតមិនជារៀងរាល់ត្រីមាស ។
ក្នុងឆ្នាំ២០១៧នេះ Jones Lang LaSalle គិតថា ការលក់ខុនដូនឹងងើបឡើងវិញ ព្រោះតែស្ថិរភាពនៃតម្លៃប្រាក់រូពី រួមទាំងសេដ្ឋកិច្ចល្អប្រសើរឡើង ។
យ៉ាងណាក្តី ការលក់នៃអាផាតមិនប្រណីតដែលមានតម្លៃលើសពី៤.១២០ដុល្លារក្នុង១ម៉ែត្រការ៉េ នឹងបន្តមានភាពទន់ខ្សោយ ដោយសារតែបញ្ហាពន្ធ និងកម្មសិទ្ធិបរទេសជាដើម ៕
ចែករំលែកព័តមាននេះ