ចិននឹងបង្កើនការវិនិយោគលើអចលនទ្រព្យនៅថៃ
ប្រទេសថៃ ៖ យោងតាម JLL ជាក្រុមហ៊ុនផ្តល់សេវាកម្មផ្នែកអចលនទ្រព្យបានឲ្យដឹងថា វិនិយោគិនជនជាតិចិននឹងដើរតួកាន់តែសំខាន់ឡើងក្នុងទីផ្សារអចលនទ្រព្យប្រទេសថៃ បើទោះជាសកម្មភាពមានកម្រិតនៅ
ប្រទេសថៃ ៖ យោងតាម JLL ជាក្រុមហ៊ុនផ្តល់សេវាកម្មផ្នែកអចលនទ្រព្យបានឲ្យដឹងថា វិនិយោគិនជនជាតិចិននឹងដើរតួកាន់តែសំខាន់ឡើងក្នុងទីផ្សារអចលនទ្រព្យប្រទេសថៃ បើទោះជាសកម្មភាពមានកម្រិតនៅឡើយក្នុងរយៈពេលប៉ុន្មានឆ្នាំកន្លងមកនេះ ។
លោកស្រី Suphin Mechuchep នាយកគ្រប់គ្រងក្នុង JLL Thailand បាននិយាយថា ៖ « ក្រុមហ៊ុនចិនមានសកម្មភាពកាន់តែខ្លាំងឡើងក្នុងការស្វែងរកឱកាសវិនិយោគលើអចលនទ្រព្យជាច្រើនក្នុងក្រុងបាងកក និងក្នុងទីផ្សាររមណីយដ្ឋានធំៗផ្សេងទៀត » ។
លោកស្រីបន្តថា ៖ « វាច្បាស់ណាស់ថា វិនិយោគិនជនជាតិចិនមានចំណាប់អារម្មណ៍យ៉ាងខ្លាំងក្នុងការវិនិយោគនៅប្រទេសថៃ ។ យ៉ាងណាក្តី វិនិយោគិនទាំងនោះចាប់ផ្តើមមានការប្រុងប្រយ័ត្ន និងត្រូវការពេលបន្ថែមក្នុងការស្វែងរកជម្រើសវិនិយោគផ្សេងទៀតដែលមាន និងឈ្វេងយល់ពីច្បាប់ទាក់ទង » ។
លោកស្រីបន្ថែមថា ៖ « ខណៈវិនិយោគិនជនជាតិចិនកាន់តែច្រើនយល់ដឹងពីបរិស្ថានវិនិយោគក្នុងវិស័យអចលនទ្រព្យថៃ ពួកយើងគិតថា នឹងមានការវិនិយោគពីជនជាតិចិនបន្ថែមទៀតនាពេលឆាប់ៗនេះ » ។
លោក Mike Batchelor នាយកគ្រប់គ្រងផ្នែកវិនិយោគក្នុងអាស៊ីនៅ Hotels and Hospitality Group របស់ JLL ថ្លែងថា ៖ «ពួកយើងគិតថា វិនិយោគិនចិននឹងមានសកម្មភាពច្រើនជាងនេះក្នុងឆ្នាំ២០១៧ ព្រោះពួកគេបានវិនិយោគយ៉ាងខ្លាំងលើអចលនទ្រព្យបរទេស និងបន្តស្វែងរកឱកាសនៅបរទេសដើម្បីកាត់បន្ថយហានិភ័យ ។ ប្រទេសថៃ ត្រូវបានចាត់ទុកថា ជាទីផ្សារដែលទាក់ទាញជាងគេក្នុងតំបន់ផងដែរ » ។
យោងតាម JLL ក៏បានឲ្យដឹងដែរថា ប្រទេសចិនបានវិនិយោគទៅក្រៅប្រទេសប្រមាណ៣៣ប៊ីលានដុល្លារក្នុងទីផ្សារអចលនទ្រព្យនាឆ្នាំ២០១៦ កើនឡើង៥៣% បើធៀបនឹងឆ្នាំ២០១៥ ។
ការវិនិយោគលើដី ការិយាល័យ និងសណ្ឋាគារ ត្រូវបានរាប់បញ្ចូល៩០%នៃការវិនិយោគទៅក្រៅប្រទេសរបស់ជនជាតិចិន ក្នុងរយៈពេល៣ឆ្នាំកន្លងមក ។ វិស័យសណ្ឋាគារ និងឧស្សាហកម្មក៏មានការកើនឡើងផងដែរ និងកើនលើសឆ្នាំ២០១៦ ។
ចំណែកការទិញបានងើបឡើងវិញកាលពីឆ្នាំមុន ដោយកើនឡើងដល់ទៅ៤៤%ឯណោះ ជាពិសេស វិនិយោគិនជនជាតិចិនពិតជាសកម្មក្នុងហុងកុង អូស្ត្រាលី និងម៉ាឡេស៊ី៕
ចែករំលែកព័តមាននេះ