អាផាតមិនប្រមាណជាង35ពាន់យូនីតបានដាក់ចូលទីផ្សារ
រាជធានីភ្នំពេញ ៖ រហូតមកទល់ពេលនេះ អាផាតមិនចំនួន២០០អគារ ស្មើនឹង៣៥ពាន់យូនីតកំពុងដាក់ដំណើរការនៅលើទីផ្សារ ខណៈអត្រាជួលបានគ្របដណ្តប់ប្រមាណ៨៥% ។
រាជធានីភ្នំពេញ ៖ រហូតមកទល់ពេលនេះ អាផាតមិនចំនួន២០០អគារ ស្មើនឹង៣៥ពាន់យូនីតកំពុងដាក់ដំណើរការនៅលើទីផ្សារ ខណៈអត្រាជួលបានគ្របដណ្តប់ប្រមាណ៨៥% ។
លោក ច្រឹក សុខនីម អគ្គនាយកក្រុមហ៊ុនCentury21 Mekong បានថ្លែងនារសៀលថ្ងៃទី៣០ មករាថា នៅដើមឆ្នាំ២០១៦ មានអាផាតមិនចំនួន១៨៤អគារបានផ្គត់ផ្គង់ចូលទីផ្សារ ប៉ុន្តែរហូតមកទល់ពេលនេះ មានអាផាតមិនប្រមាណ២០០អគារបានដាក់ចូលទីផ្សារ ស្មើនឹងកំណើនចន្លោះពី១៥ ទៅ២០% បើធៀបនឹងរយៈពេលដូចគ្នារវាងឆ្នាំ២០១៥ និងឆ្នាំ២០១៦ ។ បច្ចុប្បន្ន មានអាផាតមិនប្រមាណ២០អគារទៀតកំពុងដំណើរការសាងសង់ ដែលមានផ្ទះសរុបប្រមាណ២ពាន់យូនីតបន្ថែមទៀត។
លោកបន្តថា ៖ « ទីផ្សារអាផាតមិននៅតែមានភាពល្អប្រសើរ បើទោះជាមានការប្រកួតប្រជែងខ្លាំងក្តី ប៉ុន្តែតម្លៃនៃការជួលមិនបានធ្លាក់ចុះនោះទេ ព្រោះអត្រាជួលនៅតែគ្របដណ្តប់៨៥% ។ នៅពេលការប្រកួតប្រជែងកាន់តែខ្លាំងបានធ្វើឲ្យវិនិយោគិនអាផាតមិន ត្រូវការសេវាគ្រប់គ្រងអចលនទ្រព្យកាន់តែច្រើន » ។
លោក សុខនីម បន្ថែមថា អ្នកស្នាក់នៅតាមអាផាតមិន ជាប្រជាពលរដ្ឋចម្រុះទាំងជនជាតិខ្មែរ ចិន កូរ៉េ ជប៉ុន និងជនបរទេសដទៃទៀត ជាពិសេស លំហូរជនបរទេសមកកម្ពុជាកាន់តែច្រើន ។
លោក វ៉ន ចាន់ថន អគ្គនាយកក្រុមហ៊ុនTOWN CITY Real Estate បានថ្លែងដោយមានសុទិដ្ឋិនិយមខ្ពស់ថា ទោះបីជាអាផាតមិនផ្គត់ផ្គង់ចូលទីផ្សារច្រើនក្តី ប៉ុន្តែការជួលពីអ្នកស្នាក់នៅ នៅតែមានចំនួនច្រើន ហើយអាផាតមិននីមួយៗមានមនុស្សស្នាក់នៅពេញៗ ជាពិសេស អាផាតមិននៅក្នុងខណ្ឌចំការមន និងខណ្ឌដូនពេញ ដោយសារខណ្ឌទាំងពីរនេះមានហេដ្ឋារចនាសម្ព័ន្ធតភ្ជាប់គ្នាបានយ៉ាងល្អប្រសើរ។
អាផាតមិនពីមុនមានច្រើននៅតំបន់បឹងកេងកង១ ប៉ុន្តែបច្ចុប្បន្នបានរីកសាយភាយច្រើនទៅកាន់ផ្នែកផ្សេងៗទៀតនៃទីក្រុង ដូចជា សង្កាត់ទន្លេបាសាក់ ទួលស្វាយព្រៃ ទួលទំពូង ផ្សារដើមថ្កូវ និងសង្កាត់ទំនប់ទឹកជាដើម ។
លោក វ៉ន ចាន់ថន បន្តថា ៖ « ទោះបីជាអគារខុនដូបញ្ចប់ការសាងសង់កាន់តែច្រើនក្តី តែវាមិនរងសម្ពាធដល់ទីផ្សារអាផាតមិននោះទេ ព្រោះមនុស្សរស់នៅខុនដូ និងអាផាតមិន មានបែបបទខុសៗគ្នាដូចជា មនុស្សរស់នៅតាមខុនដូច្រើនតែជាយុវជន និងមានភាពស៊ីវិល័យ ប៉ុន្តែអ្នកស្នាក់នៅអាផាតមិនច្រើនជាអ្នកធ្វើការ និងមនុស្សវ័យចំណាស់»។
អគ្គនាយកក្រុមហ៊ុន FURI NAKI Real Estate លោក លី សែនលាភ បានថ្លែងថា ទីផ្សារខុនដូ និងអាផាតមិននៅតែមានសក្តានុពលក្នុងទីផ្សារ ដោយសារកាលពីឆ្នាំមុនមានជនបរទេសជាង៣ម៉ឺននាក់បានដាក់ពាក្យធ្វើការនៅកម្ពុជា តាមរយៈក្រសួងការងារ និងនាយកដ្ឋានអន្តោប្រវេសន៍ក្រសួងមហាផ្ទៃ ។ ដូច្នេះ ចំនួនអាផាតមិន និងខុនដូដាក់ចូលទីផ្សារ គឺមិនលើសពីតម្រូវការជាក់ស្តែងនោះទេ ។
លោកបន្តថា ៖ « បើនិយាយពីការលក់ខុនដូនៅតែល្អប្រសើរ ឲ្យតែខុនដូនោះស្ថិតនៅទីតាំងល្អ មានក្រុមហ៊ុនគ្រប់គ្រងប្រកបដោយស្តង់ដាអន្តរជាតិ ហើយអគារខុនដូមានការឌីសាញ ដោយបំពាក់សម្ភារបរិក្ខារទំនើប ទាន់សម័យ និងសម្បូរបែប » ៕
ចែករំលែកព័តមាននេះ