រាជធានីភ្នំពេញ៖ បើតាមអ្នកជំនាញផ្នែកភ្នែកបានឲ្យដឹងថា ជារៀងរាល់ឆ្នាំ មានប្រជាជនកម្ពុជាប្រមាណ៦ពាន់នាក់ បានងងឹតភ្នែក ដោយសារជំងឺភ្នែកឡើងបាយ ប៉ុន្តែជំងឺនេះអាចព្យាបាលបានត្រឹមរយៈពេល២០នាទីប៉ុណ្ណោះ ។
នេះបើយោងតាម ស្ថាបនិកនៃសមាគមចក្ខុខ្មែរ លោកង៉ូវ ស្រ៊ុន បានឲ្យដឹងក្នុងពិធីចុះអនុស្សរណៈ(MOU)រវាងសមាគមចក្ខុខ្មែរ ជាមួយមន្ទីរពេទ្យព្រះអង្គឌួង ក្រោមអធិបតីលោករដ្ឋមន្ត្រីក្រសួងសុខាភិបាល ម៉ម ប៊ុនហេង និងលោក សាយ សំអាល់ រដ្ឋមន្ត្រីក្រសួងបរិស្ថាន កាលពីថ្ងៃទី០៣ កុម្ភៈ ២០១៧ នៅមន្ទីពេទ្យព្រះអង្គឌូង។
លោកវេជ្ជបណ្ឌិតបន្តថា ការចុះអនុស្សរណៈនេះ ត្រូវបានមើលឃើញជាជំហានដ៏សំខាន់មួយឆ្ពោះទៅរកទិសដៅកាត់បន្ថយជំងឺភ្នែកឡើងបាយនៅក្នុងប្រទេសកម្ពុជាឲ្យកាន់តែមានប្រសិទ្ធភាព។
លោក ង៉ូវ ស្រ៊ុន បញ្ជាក់ថា« នេះគឺជាជំហានដ៏ធំមួយឆ្ពោះទៅកាន់គោលដៅរបស់យើងដែលនឹងផ្តល់ការវះកាត់អ្នកជំងឺភ្នែកចំនួន១ម៉ឺនករណី ក្នុងឆ្នាំ២០១៧ ។ សមាគមចក្ខុខ្មែរ នឹងរៀបចំកម្មវិធីកាត់ចំនួន២៤សប្តាហ៍ ដោយមានការចូលរួមពីវេជ្ជបណ្ឌិតជំនាញៗ និងសហការីស្ម័គ្រចិត្តមកពីប្រទេសអូស្ត្រាលី អង់គ្លេស អាល្លឺម៉ង់ ប្រ៊ុយណេ និងប្រទេសអ៊ីតាលីជាដើម»។
លោកស្ថាបនិកនៃសមាគមចក្ខុខ្មែរបន្ថែមថា ការចុះអនុស្សរណៈនេះដោយមើលឃើញពីតម្រូវការសង្គ្រោះជំងឺភ្នែកនៅក្នុងប្រទេស ដើម្បីផ្តល់ ការព្យាបាលជំងឺភ្នែកដល់ប្រជាពលរដ្ឋក្រីក្រដោយឥតគិតថ្លៃ។
ក្នុងឱកាសនោះលោករដ្ឋមន្ត្រីសុខាភិបាល ម៉ម ប៊ុនហេង បានលើកឡើងថា ក្រសួងសុខាភិបាលប្តេជ្ញាផ្តល់សេវាសុខាភិបាលឲ្យកាន់តែមានប្រសិទ្ធភាពឡើង ជាពិសេសនោះដល់សហគមន៍ក្រីក្រ ។ ចំណែកលោក សាយ សំអាល់ រដ្ឋមន្ត្រីក្រសួងបរិស្ថានវិញបានថ្លែងថា សហភាពសហព័ន្ធយុវជនកម្ពុជា គាំទ្រយ៉ាងពេញទំហឹង និងសហការជាមួយ សមាគមចក្ខុខ្មែរ រួមទាំងមន្ទីរពេទ្យព្រះអង្គឌូង ដើម្បីផ្តល់ការព្យាបាលជូនប្រជាជន ដែលត្រូវការវះកាត់ភ្នែកទាំងអស់ និងលើកទឹកចិត្តផ្ទេរចំណេះដឹង បច្ចេកវិទ្យា និងជំនាញពីក្រុមអ្នកជំនាញបរទេស មកកាន់គ្រូពេទ្យ និងសិស្សានុសិស្សរបស់កម្ពុជា ។ លោកបញ្ជាក់ថា« អនុស្សារណៈនេះនឹងធ្វើឲ្យប្រសើរឡើងថែមទៀត នូវស្ថានភាពប្រជាពលរដ្ឋខ្មែររាប់ពាន់នាក់ដែលកំពុងមានបញ្ហាជំងឺភ្នែក»។
លោកង៉ូវ ស្រ៊ុន ក៏បានឲ្យដឹងទៀតថា សមាគមចក្ចុខ្មែរ បានផ្តល់ការព្យាបាលដោយឥតគិតថ្លៃជូនប្រជាពលរដ្ឋដែលមានបញ្ហាភ្នែកទូទៅ និងជាពិសេសប្រជាពលរដ្ឋក្រីក្រចាប់តាំងពីឆ្នាំ២០០៧ ។ នៅឆ្នាំ២០១៦ សមាគម បានផ្តល់ការពិនិត្យព្យបាលភ្នែកទូទៅ និងផ្តល់ថ្នាំចំនួន៥ម៉ឺនករណី និងបានចែកវ៉ែនតាការពារកម្តៅថ្ងៃ ចំនួន២ម៉ឺន៥ពាន់ដល់ប្រជាកសិករក្រីក្រ ដើម្បីកាត់បន្ថែមនិងការពារជំងឺភ្នែក។ បន្ថែមពីនេះ សមាគមបានវះកាត់អ្នកជំងឺមានបញ្ហាភ្នែកចំនួន៦៣០០ករណី ។
តាមការស្រាវជ្រាវមួយបានឲ្យដឹងថា មានប្រជាជនកម្ពុជាប្រមាណ១៨ម៉ឺននាក់ ដែលងងឹតភ្នែក ហើយភាគច្រើនបំផុតនៃអ្នកទាំងនោះ គឺជាអ្នកក្រីក្រ ដែលមិនអាចប្រកបការងារ ដើម្បីចិញ្ចឹមជីវិតខ្លួនឯង និងក្រុមគ្រួសារបាន ។ ការសិក្សាស្រាវជ្រាវក៏បានឲ្យដឹងទៀតថា ស្ត្រីគឺជាអ្នកដែលមានជំងឺភ្នែកឡើងបាយច្រើនជាងបុរសទ្វេដងដែលនឹងប៉ះពាល់ធំធេងចំពោះកម្ពុជា ។ ទោះយ៉ាងណាក៏ដោយ អ្នកជំនាញផ្នែកបានអះអាងថា៩០% នៃអ្នកជំងឺងងឹតភ្នែកទាំងអស់អាចបញ្ចៀសបាន ៕
ចែករំលែកព័តមាននេះ