ប្រទេសជប៉ុន ៖ សារព័ត៌មានក្នុងស្រុករបស់ជប៉ុនបានរាយការណ៍កាលពីថ្ងៃអង្គារថា នាយករដ្ឋមន្ត្រីជប៉ុន លោក Shinzo Abe នឹងស្នើគម្រោងដើម្បីបង្កើតការងារជាច្រើនរយពាន់ក្នុងសហរដ្ឋអាមេរិក ពេលលោកជួប
ប្រទេសជប៉ុន ៖ សារព័ត៌មានក្នុងស្រុករបស់ជប៉ុនបានរាយការណ៍កាលពីថ្ងៃអង្គារថា នាយករដ្ឋមន្ត្រីជប៉ុន លោក Shinzo Abe នឹងស្នើគម្រោងដើម្បីបង្កើតការងារជាច្រើនរយពាន់ក្នុងសហរដ្ឋអាមេរិក ពេលលោកជួបជាមួយលោកប្រធានាធិបតី Donald Trump ក្នុងកិច្ចប្រជុំនៅវ៉ាស៊ីនតោន នាពេលខាងមុខនេះ ។
សារព័ត៌មានខាងលើបាននិយាយដោយលើកប្រភពពីរដ្ឋាភិបាលជប៉ុនថា ប្រទេសជប៉ុនកំពុងរវល់រៀបចំកញ្ចប់វិនិយោគ ដែលអាចបង្កើតបានការងាររាប់ពាន់ក្នុងសហរដ្ឋអាមេរិក ។
សេចក្តីរាយការណ៍បន្តថា លោក Abe នឹងលើកឡើងពីការចូលរួមរបស់ក្រុមហ៊ុនជប៉ុនក្នុងគម្រោងដូចជា ការសាងសង់ផ្លូវរថភ្លើងល្បឿនលឿន និងការអភិវឌ្ឍថ្មប្រេងជាដើម។ កញ្ចប់នេះនឹងត្រូវបានប្រគល់ពេលអ្នកដឹកនាំទាំងពីររូបជួបគ្នានៅថ្ងៃទី១០ កុម្ភៈ ។
គួរបញ្ជាក់ថា ជប៉ុន គឺជាប្រទេសនៅក្នុងចំណោមដៃគូដែលស្និទ្ធស្នាលជាងគេរបស់សហរដ្ឋអាមេរិក ប៉ុន្តែលោក Trump បានព្រមានដល់ប្រទេសនេះក្នុងអំឡុងពេលយុទ្ធនាការបោះឆ្នោតរបស់លោកកាលពីចុងឆ្នាំមុន ទាក់ទិននឹងការដកទ័ពរាប់ពាន់នាក់របស់អាមេរិកចេញពីតំបន់នេះ និងឲ្យសញ្ញាថា ប្រទេសនេះអាចនឹងចង់បានអាវុធនុយក្លេអ៊ែរ ។
សារព័ត៌មានខាងលើនិយាយថា លោក Abe នឹងលើកឡើងពីការធ្វើពាណិជ្ជកម្មក្នុងវិស័យយានយន្ត និងបង្ហាញពីសារសំខាន់នៃការចូលរួមរបស់ក្រុមហ៊ុនផលិតរថយន្តជប៉ុនលើការវិនិយោគ និងបង្កើតការងារក្នុងសហរដ្ឋអាមេរិក ។
នៅដើមខែមុននេះ លោក Trump បានបង្ហាញការបារម្ភពីវាសនារបស់ក្រុមហ៊ុនជប៉ុនដែលប្រកបអាជីវកម្មក្នុងសហរដ្ឋអាមេរិកបន្ទាប់ពីបានព្រមានដល់ Toyota ថា នឹងដាក់ពន្ធលើរថយន្តនាំចូល ព្រោះក្រុមហ៊ុននេះមានគម្រោងបើករោងចក្រថ្មីនៅម៉ិកស៊ិក ។
មិនយូរប៉ុន្មាន Toyota និយាយថា ពួកគេនឹងវិនិយោគប្រាក់៦០០លានដុល្លារ និងបង្កើត៤០០ការងារក្នុងរោងចក្ររបស់ពួកគេនៅសហរដ្ឋអាមេរិក ។
លោក Trump ក៏បានចោទប្រកាន់ដល់ប្រទេសជប៉ុនជាអ្នកបន្ទាបតម្លៃប្រាក់កាលពីថ្ងៃអង្គារមុនផងដែរ ។ លោកនិយាយថា ៖ «ប្រសិនបើអ្នកមើលទៅប្រទេសចិន និងជប៉ុន ដែលកំពុងតែធ្វើ និងធ្វើអស់រយៈពេលជាច្រើនឆ្នាំមកហើយ ពួកគេលេងជាមួយទីផ្សាររូបិយវត្ថុ ហើយទម្លាក់តម្លៃទីផ្សារ រួចយើងនាំគ្នាអង្គុយធ្វើមនុស្សល្ងង់ » ។
យ៉ាងណាក្តី លោក Trump និងលោក Abe បានយល់ព្រមតាមទូរស័ព្ទកាលពីថ្ងៃអាទិត្យថា នឹងសហការដើម្បីឆ្លើយតបនឹងការគំរាមកំហែងនៃគម្រោងនុយក្លេអែររបស់កូរ៉េខាងជើង ដោយបន្តពង្រីកការធ្វើពាណិជ្ជកម្ម និងវិនិយោគទ្វេ ភាគី ៕
ចែករំលែកព័តមាននេះ