រាជធានីភ្នំពេញ ៖ ទីបំផុត ធនាគារអភិវឌ្ឍន៍ជនបទ ហៅកាត់ថា RDB នឹងទម្លាក់ថវិកាប្រមាណ១០លានដុល្លារអាមេរិកដល់ធនាគារស្រូវកម្ពុជា ដើម្បីវិនិយោគលើឡសម្ងួត និងឃ្លាំងស្តុកស្រូវក្នុងខេត្តបាត់ដំបង ។
រាជធានីភ្នំពេញ ៖ ទីបំផុត ធនាគារអភិវឌ្ឍន៍ជនបទ ហៅកាត់ថា RDB នឹងទម្លាក់ថវិកាប្រមាណ១០លានដុល្លារអាមេរិកដល់ធនាគារស្រូវកម្ពុជា ដើម្បីវិនិយោគលើឡសម្ងួត និងឃ្លាំងស្តុកស្រូវក្នុងខេត្តបាត់ដំបង ។
ប្រធានធនាគារស្រូវកម្ពុជា លោកឧកញ៉ា ភួ ពុយ បានថ្លែងឲ្យដឹងកាលពីព្រឹកថ្ងៃទី២៧ មករា កន្លងមកថា នៅក្នុងផែនការរបស់រាជរដ្ឋាភិបាលដើម្បីវិនិយោគលើឡសម្ងួត និងឃ្លាំងស្តុកស្រូវ ធនាគារអភិវឌ្ឍន៍ជនបទបានធ្វើការដេញថ្លៃជាមួយក្រុមហ៊ុននានា ជាលទ្ធផល ធនាគារស្រូវកម្ពុជា ដេញថ្លៃបានគម្រោងនេះដើម្បីសាងសង់ឡសម្ងួត និងឃ្លាំងស្តុកស្រូវនៅក្នុងខេត្តបាត់ដំបង ។ ឡសម្ងួតនេះអាចមានសមត្ថភាពសម្ងួតស្រូវ៣ពាន់តោនក្នុងមួយថ្ងៃ និងឃ្លាំងស្តុកស្រូវមានសមត្ថភាពស្តុកស្រូវបាន២០ម៉ឺនតោន ។
លោកបន្តថា ៖ « ឡសម្ងួត និងឃ្លាំងស្តុកស្រូវនេះ អាចមានលទ្ធភាពធានាបាននូវកន្លែងស្តុក និងឡសម្ងួតស្រូវនៅភូមិភាគពាយ័ព្យប្រទេសបាន និងអាចជួយកសិករឲ្យមានកន្លែងលក់ស្រូវ កុំឲ្យមានការកកស្ទះ ព្រមទាំងជួយឲ្យម៉ាស៊ីនកិនស្រូវនានាអាចដំណើរការសង្វាក់ផលិតកម្មរបស់ពួកគេបានល្អប្រសើរ ។ គម្រោងនេះក៏គាំទ្រជួយដល់ការបង្កើនបរិមាណនៃការនាំចេញ ស្របតាមគោលនយោបាយដាក់ចេញរបស់រាជរដ្ឋាភិបាល ធ្វើយ៉ាងណា ឲ្យនាំអង្ករចេញបាន១លានតោនផងដែរ » ។
យោងតាមសេចក្តីប្រកាសព័ត៌មានរបស់RDB ឲ្យដឹងថា រាជរដ្ឋាភិបាលតាមរយៈ RDB បានផ្តួចផ្តើមគម្រោងបង្កើតឃ្លាំងស្តុកស្រូវ២០ ម៉ឺនតោន និងឡសម្ងួតស្រូវ៣ពាន់តោនក្នុងមួយថ្ងៃ ដែលមានទីតាំងនៅខេត្តបាត់ដំបង ដោយស្វែងរកកិច្ចសហការពីក្រុមហ៊ុនឯកជន ដោយឲ្យក្រុមហ៊ុនជាអ្នកប្រតិបត្តិការគម្រោង ខណៈ RDB ជាអ្នកផ្តល់កម្ចីទៅក្រុមហ៊ុនឯកជនក្នុងអត្រាការប្រាក់ទាប ។
RDB បានចេញសេចក្តីជូនដំណឹងកាលពីខែធ្នូ ឆ្នាំ២០១៦ ដើម្បីឲ្យក្រុមហ៊ុនឯកជនដែលចាប់អារម្មណ៍ពីដំណើរការគម្រោងនេះដាក់ពាក្យទទួលការវាយតម្លៃ ហើយមានក្រុមហ៊ុនស្រូវអង្ករ៤ បានដាក់ពាក្យ ។
ក្រុមហ៊ុនទាំង៤នេះរួមមាន ក្រុមហ៊ុនធនាគារស្រូវ, ក្រុមហ៊ុនឃែតថល ហ្វូដ អិុនវេសមេន អិុមផត អិុចផត, រោងម៉ាស៊ីនកិនស្រូវ អឹុង វណ្ណម៉ៅ និងក្រុមហ៊ុន ANDURIZ (Cambodge) Sarl ។
សេចក្តីប្រកាសព័ត៌មានរបស់ RDB ឲ្យដឹងថា ការជ្រើសរើសធនាគារស្រូវ ជាប្រតិបត្តិករគម្រោងនេះ ធ្វើឡើងដោយមានការពិភាក្សាត្រឹមត្រូវ ព្រោះធនាគារជ្រើសរើសដោយផ្អែកលើរបាយការណ៍វាយតម្លៃរបស់ Mekong Strategic Partner ។
លោក ថៅ ថាច ប្រធានធនាគារអភិវឌ្ឍន៍ជនបទ មិនអាចទាក់ទងសុំការអត្ថាធិប្បាយបានទេ ។
លោកឧកញ៉ា ភួ ពុយ បន្តថា ប្រសិនជាការរៀបចំនីតិវិធីបានលឿន ការសាងសង់ឡសម្ងួត និងឃ្លាំងស្តុកស្រូវនេះនឹងចាប់ផ្តើមនៅខែកុម្ភៈខាងមុខ និងបញ្ចប់នៅចុងឆ្នាំនេះ ។ កន្លងមក រោងម៉ាស៊ីនកិនស្រូវនានាមានឡសម្ងួត និងឃ្លាំងស្តុកស្រូវដោយខ្លួនឯងរួចហើយ ប៉ុន្តែដោយសារសមត្ថភាពស្តុក និងឡសម្ងួតនៅមានកម្រិត ទើបមិនអាចឆ្លើយតបនឹងជំនន់ស្រូវក្នុងរដូវប្រមូលផល ។ ហេតុនេះ ការវិនិយោគលើឡសម្ងួត និងឃ្លាំងស្តុកស្រូវ ក្រោមការគាំទ្រហិរញ្ញប្បទានពីធនាគារអភិវឌ្ឍន៍ជនបទ នឹងអាចដោះស្រាយបញ្ហាប្រឈមរបស់កសិករក្នុងរដូវប្រមូលផលបាន ៕
ចែករំលែកព័តមាននេះ