រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បាននិងកំពុងជំរុញការលើកកម្ពស់ពាណិជ្ជកម្មសូត្រខ្មែរ ដែលជាផលិតផលមួយមានសក្តានុពលនៅកម្ពុជា ដើម្បីទទួលបានតម្លៃបន្ថែម និងបំពេញតម្រូវការផលិតដែលកាន់តែមានការកើនឡើង ។
លោករដ្ឋមន្ត្រីក្រសួងពាណិជ្ជកម្មបានថ្លែងឲ្យដឹងនាព្រឹកថ្ងៃទី១ កុម្ភៈថា ក្រសួងពាណិជ្ជកម្ម នឹងជួយជំរុញទីផ្សារសូត្រខ្មែរបន្ថែមទៀត ប៉ុន្តែផលិតករទាំងអស់ត្រូវតែពង្រឹងការផលិតរបស់ខ្លួនឲ្យមានស្តង់ដា និងមានគុណភាពទទួលយកបាន ទើបអតិថិជនចាប់អារម្មណ៍ពីផលិតផលខ្មែរ ។ លោកបន្តថា សូត្រជាវិស័យមួយដ៏សំខាន់ និងជាអត្តសញ្ញាណសម្រាប់ប្រទេសជាតិ ហើយអ្នកតម្បាញភាគច្រើនជានារី ដែលអាចរកប្រាក់ចំណូលបំពេញបន្ថែមក្នុងគ្រួសារ ។ ដូច្នេះ ការងារនេះ ក្រសួងពាណិជ្ជកម្មកំពុងតែជួយជំរុញដើម្បីកាត់បន្ថយភាពក្រីក្រដល់ប្រជាពលរដ្ឋ ។
លោកបញ្ជាក់ថា ៖ « ក្រសួងពាណិជ្ជកម្មបានជំរុញទីផ្សារអន្តរជាតិ និងជំរុញឲ្យផលិតបានល្អ ទើបទទួលបានការគាំទ្រពីអ្នកប្រើប្រាស់ ហើយក្រសួងបានជំរុញឲ្យមានពិព័រណ៍ទាំងក្របខ័ណ្ឌជាតិ និងអន្តរជាតិ » ។
ក្រសួងពាណិជ្ជកម្មបានរៀបចំពិព័រណ៍ជាច្រើនទាំងក្នុងស្រុក និងនៅលើឆាកអន្តរជាតិ ដែលផលិតករកម្ពុជាអាចចូលរួមតាំងពិព័រណ៍បាន និងជំរុញឲ្យផលិតផលខ្មែរបានស្គាល់ និងស្វែងរកទីផ្សារអន្តរជាតិ ។
លោក ប៉ាន សូរស័ក្តិ បន្តថា ផលិតករអ្នកតម្បាញសូត្រនៅមានបញ្ហាប្រឈមជាច្រើន ហើយកិច្ចការនេះកំពុងតែខំប្រឹងប្រែងដើម្បីស្វែងរកទីផ្សារ និងការនាំចេញទៅក្រៅប្រទេសឲ្យកាន់តែច្រើនថែមទៀត ។
ទាក់ទងនឹងបញ្ហានេះ លោកស្រី សេង តក្កនារី អគ្គនាយិកាហាង SentoSaSillk បាននិងកំពុងធ្វើការជាមួយសហគមន៍ផលិតសូត្រមួយចំនួនថ្លែងថា កន្លងមក វត្ថុធាតុដើមសូត្រនៅកម្ពុជាមានការខ្វះខាតមែន ដែលអ្នកផលិតត្រូវទិញវត្ថុធាតុដើមពីក្រៅប្រទេស ដែលបញ្ហានេះទាមទារឲ្យមានការលើកកម្ពស់ផលិតកម្មសូត្រឲ្យបានច្រើន និងមានសិប្បកម្មដាំដើមមនចិញ្ចឹមសត្វនាង ស្រាវយកសរសៃសូត្រ ។ លោកស្រីបន្តថា ៖ « អ្នកតម្បាញសូត្រនៅកម្ពុជា កំពុងតែជួបប្រទះនូវបញ្ហាប្រឈមជាច្រើនផ្នែកទីផ្សារ ដែលធ្វើឲ្យការផលិតមិនអាចដោះស្រាយជីវភាពរស់នៅបាន » ។
កម្មវិធីពង្រឹងក្របខ័ណ្ឌសមាហរណកម្ម(EIF) បានរួមចំណែកយ៉ាងសំខាន់ក្នុងការផ្តល់អំណាចដល់ស្ត្រី បង្កើតការងារដល់យុវជន និងកាលានុវត្តភាពថ្មីៗសម្រាប់ពាណិជ្ជកម្ម ព្រមទាំងជួយគាំទ្រប្រទេសកម្ពុជា ក្នុងការធ្វើពិពិធកម្មសេដ្ឋកិច្ច និងពន្លឿនការអនុវត្តខ្សែចង្វាក់តម្លៃក្នុងវិស័យពាក់ព័ន្ធដូចជា សូត្រប្រណីត អង្ករ ផលនេសាទសមុទ្រ ដំឡូងមី និងឧស្សាហកម្មបដិសណ្ឋារកិច្ចជាដើម ៕
ចែករំលែកព័តមាននេះ