រាជធានីភ្នំពេញ ៖ នៅក្នុងឆ្នាំ២០១៦កន្លងមក អ្នកដំណើរដែលបានឆ្លងកាត់អាកាសយានដ្ឋានអន្តរជាតិភ្នំពេញ មានចំនួន៣.៣៨៨.៥៥៣នាក់ ដោយក្នុងនោះចាប់ដំណើរការឆ្លងកាត់មមាញឹកជាងគេ គឺនៅក្នុងខែធ្នូ ដែលមានចំនួនជាង៣៣ម៉ឺននាក់ ។ នេះបើយោងតាមគេហទំព័ររបស់ Cambodia-airports ។
តាមគេហទំព័រដដែលបង្ហាញថា រយៈ ពេល១២ខែក្នុងឆ្នាំ២០១៦ អ្នកដំណើរចាកចេញពីអាកាសយានដ្ឋានអន្តរជាតិភ្នំពេញ ទៅកាន់អន្តរជាតិ មានចំនួន១.៥១០.៣២៣នាក់ ខណៈអ្នកដំណើរចាកចេញពីព្រលានយន្តហោះអន្តរជាតិភ្នំពេញ ទៅកាន់ព្រលានយន្តហោះផ្សេងទៀតក្នុងស្រុក មានចំនួនត្រឹមតែ១៧៤.៣៩០នាក់ប៉ុណ្ណោះ ។ តាមតួលេខនេះអាចបញ្ជាក់ថា អ្នកដំណើរដែលធ្វើដំណើរតាមជើងអាកាស ក្នុងស្រុកមានចំនួនតិចតួចនៅឡើយ ។ បើសរុបការចាកចេញពីព្រលានយន្តហោះអន្តរជាតិភ្នំពេញទៅកាន់អន្តរជាតិ និងក្នុងស្រុក សម្រាប់រយៈពេលមួយឆ្នាំ២០១៦ គឺមានចំនួន១.៦៨៤.៧១៣នាក់ ។
ដោយឡែក ចំនួនអ្នកដំណើរដែលបានមកដល់អាកាសយានដ្ឋានអន្តរជាតិភ្នំពេញ ពីព្រលានយន្ដហោះក្រៅប្រទេស មានចំនួន១.៥០៨.៦៤៧នាក់ ចំណែកអ្នកដំណើរក្នុងស្រុកបានមកដល់ព្រលានយន្តហោះអន្តរជាតិភ្នំពេញ មានចំនួនត្រឹមតែ១៥២.៨១១នាក់ ។
បើតាមប្រសាសន៍របស់រដ្ឋមន្ត្រីក្រសួងទេសចរណ៍ ថ្លែងកន្លងមកថា ដើម្បីទាក់ទាញភ្ញៀវទេសចរមកកាន់ប្រទេសកម្ពុជាបន្ថែមទៀត រាជរដ្ឋាភិបាលបានខិតខំទាក់ទាញក្រុមហ៊ុនអាកាសចរណ៍អន្តរជាតិផ្សេងទៀតដើម្បីបង្កើនការហោះហើរត្រង់រវាងគ្នានិងគ្នា ហើយក្នុងនោះដែរ ក៏អាចទាក់ទាញវិនិយោគិនមកវិនិយោគនៅកម្ពុជាបន្ថែមផងដែរ ។
កាលពីដើមខែកញ្ញា ឆ្នាំ២០១៦កន្លងទៅនេះ ជាប្រវត្តិសាស្ត្រសម្រាប់ប្រទេសកម្ពុជា ក្នុងវិស័យអាកាសចរណ៍ ក្រុមហ៊ុនជប៉ុនបានបើកការហោះហើរត្រង់ពីជប៉ុនមកកាន់កម្ពុជា ហើយការបើកការហោះហើរត្រង់នេះ វាក៏បាននាំមកនូវកំណើនភ្ញៀវទេសចរជប៉ុន និងវិនិយោគិនបន្ថែមទៀតមកកាន់កម្ពុជាផងដែរ ។ ក្រៅពីនោះ ក៏បានបង្ហាញពីទំនាក់ ទំនងរវាងប្រទេសទាំងពីរកាន់តែជិតស្និទ្ធទៀតផង ។
បើតាមមន្ត្រីនៃក្រសួងទេសចរណ៍កម្ពុជា ក៏បានបញ្ជាក់ដែរថា ការហោះហើរត្រង់ពីបរទេសមកកាន់កម្ពុជា នឹងមានជាបន្តបន្ទាប់ទៀត ក្នុងនោះវិនិយោគិនឥណ្ឌា និងកម្ពុជា ក៏កំពុងសិក្សាលើការហោះហើរត្រង់ពីឥណ្ឌាមកកម្ពុជាផងដែរ ។
គួរបញ្ជាក់ថា សម្រាប់អាកាសយានដ្ឋានអន្តរជាតិផ្សេងទៀតរបស់កម្ពុជា រួមមាន អាកាសយានដ្ឋានអន្តរជាតិសៀមរាប ក្នុងរយៈពេលមួយឆ្នាំ២០១៦ ដំណើរឆ្លងកាត់មានចំនួនជាង៣លាន៤សែននាក់ ចំណែកអាកាសយានដ្ឋានអន្តរជាតិព្រះសីហនុ មានអ្នកដំណើរឆ្លងកាត់ចំនួន១៥៦.៨៨៧នាក់ ៕
ចែករំលែកព័តមាននេះ