រាជធានីភ្នំពេញ ៖ សម្រាប់ព្រះរាជពិធីបុណ្យអុំទូកឆ្នាំ២០១៧នេះ រាជធានីភ្នំពេញ នឹងមានច្រាំងទន្លេ សួនច្បារ និងផ្លូវថ្មើរជើងយ៉ាងល្អប្រណីតស្របតាមមាត់ទន្លេ
រាជធានីភ្នំពេញ ៖ សម្រាប់ព្រះរាជពិធីបុណ្យអុំទូកឆ្នាំ២០១៧នេះ រាជធានីភ្នំពេញ នឹងមានច្រាំងទន្លេ សួនច្បារ និងផ្លូវថ្មើរជើងយ៉ាងល្អប្រណីតស្របតាមមាត់ទន្លេ ចាប់ពីស្ពានព្រះមុនីវង្សរហូតដល់គល់ស្ពានជ្រោយចង្វា ដែលបង្កលក្ខណៈងាយស្រួលដល់ប្រជាពលរដ្ឋធ្វើដំណើរកម្សាន្ត និងទស្សនាព្រះរាជពិធីបានយ៉ាងស្រួលបន្ទាប់ពីអាជ្ញាធរស្ថាបនាច្រាំងទន្លេ សួនច្បារ និងផ្លូវថ្មើរជើងដំណាក់កាលទី៣រួច ។
ក្នុងកិច្ចប្រជុំជាមួយមន្ត្រីតំណាងកំពង់ផែស្វ័យតក្រុងភ្នំពេញ និងមន្ត្រីជំនាញពាក់ព័ន្ធក្រោមឱវាទដើម្បីពិភាក្សាទៅលើគម្រោងស្ថាបនាសួនច្បារ ផ្លូវថ្មើរជើងតាមមាត់ទន្លេដំណាក់កាលទី៣ ចាប់ពីផ្សាររាត្រីដល់ស្ពានជ្រោយចង្វាក្នុងសង្កាត់ស្រះចក ខណ្ឌដូនពេញ កាលពីរសៀលថ្ងៃទី១ កុម្ភៈ ២០១៧ កន្លងមក លោក ប៉ា សុជាតិវង្ស អភិបាលរាជធានីភ្នំពេញបានលើកឡើងថា អាជ្ញាធររាជធានីភ្នំពេញកំពុងពន្លឿនការងារស្ថាបនាច្រាំងទន្លេ និងផ្លូវថ្មើរជើងនេះឲ្យបានលឿន និងជំរុញឲ្យរួចរាល់មុនព្រះរាជពិធីបុណ្យអុំទូកចុងឆ្នាំនេះ គឺដើម្បីលើកកម្ពស់សោភ័ណភាពរាជធានីភ្នំពេញ ។
លោកបន្តថា អាជ្ញាធរពិតជាចង់បានការអភិវឌ្ឍទីក្រុងប្រកបដោយការគិតគូរច្បាស់លាស់ មិនធ្វើទាំងប្រថុយប្រថាននោះទេ គឺធ្វើដោយភាពអត់ធ្មត់ និងមិនឲ្យប្រជាពលរដ្ឋបង្ហូរទឹកភ្នែកឡើយ ។
លោក ប៉ា សុជាតិវង្ស មានប្រសាសន៍ទៀតថា គម្រោងស្ថាបនាផ្លូវថ្មើរជើងតាមមាត់ទន្លេនេះ គឺជាការប្តេជ្ញាចិត្តថ្មីមួយទៀតរបស់រដ្ឋបាលរាជធានីភ្នំពេញ ក្នុងការកែលំអសោភ័ណភាព បរិស្ថាន បង្កើនលំហរសាធារណៈនិងក្រវាត់បៃតងដើម្បីទាក់ទាញភ្ញៀវទេសចរ ស្របពេលដែលកម្ពុជានឹងធ្វើជាម្ចាស់ផ្ទះកីឡាស៊ីហ្គេមលើកទី៣២នៅឆ្នាំ២០២៣ខាងមុខ ។
លោកបន្ថែមថា គម្រោងស្ថាបនាច្រាំងទន្លេមកដល់ពេលនេះក្រុមការងារកំពុងបន្តសិក្សាទៅលើផលប៉ះពាល់នានា ហើយបន្ទាប់ពីដោះស្រាយផលប៉ះពាល់រួច ក្រុមការងារនឹងត្រូវចុះអនុវត្តន៍តែម្តង ។
ចំណែកតំណាងអង្គភាពកំពង់ផែស្វ័យតក្រុងភ្នំពេញដែលរងនូវផលប៉ះពាល់ច្រើនជាមួយនឹងគម្រោងខាងលើ បានបង្ហាញអំពីជំហររបស់ខ្លួនដោយសន្យាថា នឹងចូលរួមសហការជាមួយរដ្ឋបាលរាជធានីភ្នំពេញក្នុងការដោះស្រាយ ។
គួរបញ្ជាក់ថា ការស្ថាបនាច្រាំងទន្លេ សួនច្បារ និងផ្លូវថ្មើរជើង ចាប់ពីផ្សាររាត្រីដល់ស្ពានជ្រោយចង្វានេះ ជាគម្រោងដំណាក់កាលទី៣មានប្រវែងប្រមាណ១.៦៤០ម៉ែត្រ បន្ទាប់ពីដំណាក់កាលទី១ចាប់ពីបញ្ជរទេសចរណ៍ជាប់សាលសន្និសីទចតុមុខ ដល់កំពង់ដអរិយក្សត្រ បានស្ថាបនារួច និងដំណាក់កាលទី២ចាប់ពី កំពង់ដអរិយក្សត្រ រហូតដល់គល់ស្ពានព្រះមុនីវង្ស កំពុងស្ថាបនា ហើយទិសដៅបន្តរដ្ឋបាលរាជធានីភ្នំពេញគ្រោងស្ថាបនារហូតដល់គល់ស្ពានព្រែកព្នៅតែម្តង ៕
ចែករំលែកព័តមាននេះ