ឆ្លើយតប សម រង្ស៊ី ផែនការក5 គឺផែនការការពារជាតិទប់ស្កាត់របបខ្មែរក្រហម
រាជធានីភ្នំពេញ ៖ មេបក្សប្រឆាំងលោក សម រង្ស៊ី ដែលកំពុងរស់នៅក្រៅប្រទេសគេចពីអំណាចតុលាការកម្ពុជា បានបង្ហាញជំហរយ៉ាងមុតមាំថា
រាជធានីភ្នំពេញ ៖ មេបក្សប្រឆាំងលោក សម រង្ស៊ី ដែលកំពុងរស់នៅក្រៅប្រទេសគេចពីអំណាចតុលាការកម្ពុជា បានបង្ហាញជំហរយ៉ាងមុតមាំថា លោកនឹងចូលស្រុកខ្មែរវិញនៅពេលបោះឆ្នោតខាងមុខនេះ និងថាផែនការក៥ជាផែនការរបស់ថ្នាក់ដឹកនាំគណបក្សប្រជាជនកម្ពុជា នាំឲ្យប្រជាពលរដ្ឋទៅស្លាប់ ។ ការអះអាងជាថ្មីរបស់មេបក្សប្រឆាំងរូបនេះ ធ្វើឡើងក្នុងកិច្ចសម្ភាសន៍តាមទូរស័ព្ទជាមួយវិទ្យុអាស៊ីសេរីកាលពីពេលថ្មីៗកន្លងមកនេះ ។
ជាមួយគ្នានោះដែរលោក សម រង្ស៊ី ក៏បានប្រតិកម្មទៅនឹងការលើកឡើងរបស់សម្តេចតេជោ ហ៊ុន សែន នាយករដ្ឋមន្ត្រីដែលបានថ្លែងក្នុងសម័យប្រជុំវិសាមញ្ញរដ្ឋសភា ដើម្បីធ្វើវិសោធនកម្មប្រការ៤៨ថ្មី(បី) ពាក់ព័ន្ធនឹងការរឹបអូសទីស្នាក់ការគណបក្សសង្គ្រោះជាតិប្រសិនបើសម្តេចឈ្នះក្តីលោក សម រង្ស៊ី រឿងបរិហារកេរ្តិ៍ជាសាធារណៈ បើលោក សម រង្ស៊ី មិនព្រមសងជំងឺចិត្តនោះទេ ។ មេបក្សប្រឆាំងរូបនេះបានអះអាងថា អ្វីដែលសម្តេចតេជោ ហ៊ុន សែន លើកឡើងគឺជាការភិតភ័យស្លន់ស្លោក្នុងការចាញ់ឆ្នោតជ្រើសរើសក្រុមប្រឹក្សាឃុំ សង្កាត់ និងការបោះឆ្នោតជ្រើសរើសតំណាងរាស្ត្រនៅពេលខាងមុខ ។
លោក សម រង្ស៊ី ក៏បានលើកឡើងថា ៖ «លោក ហ៊ុន សែន គាត់ហ៊ានប្តឹងខ្ញុំតែរឿងកប៉ិកកំប៉ុកទេ ។ រឿងធំដូចជារឿងក៥ដែលខ្ញុំនិយាយថាគាត់ និងលោក ហេង សំរិន ជាអ្នកនៅពីក្រោយក្នុងសម្លាប់ប្រជាជនខ្មែររាប់លាននាក់នោះ គាត់មិនហ៊ានប្តឹងខ្ញុំទេ» ។ លោកបន្ថែមថា តុលាការនៅក្នុងប្រទេសកម្ពុជា លោកលែងមានជំនឿចិត្តហើយ លោកពឹងទៅលើប្រជាពលរដ្ឋជាអ្នកកាត់សេចក្តីវិញ ។
ទាក់ទិននឹងរឿងផែនការក៥ដែលលោក សម រង្ស៊ីលើកឡើងថា ប្រមុខរាជរដ្ឋាភិបាលមិនហ៊ានប្តឹងលោកនោះ ត្រូវបានសម្តេចតេជោ ហ៊ុន សែន នៅថ្ងៃទី២ កុម្ភៈ បានឆ្លើយតបទៅនឹងលោក សម រង្ស៊ី ថា ៖ «ផែនការក៥កើតមានដោយសារក្រុមលោក សម រង្ស៊ី ដែលរួមដៃជាមួយខ្មែរក្រហមប៉ុនប៉ងនាំយកខ្មែរក្រហមមកគ្រប់គ្រងប្រទេសជាថ្មី ។ សម្តេចថា ផែនការក៥ គឺជាផែនការការពារជាតិ គឺជាការទប់ស្កាត់ការវិលត្រឡប់មកវិញរបស់របបខ្មែរក្រហម» ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ជនអគតិកំពុងយកផែនការក៥មកនិយាយខុសពីការពិត វាយប្រហារលើ CPP ។ លោកថា ទោះបីត្រូវបានផ្តួលរំលំក្រោមកម្លាំងមហាសាមគ្គីប្រជាជនកម្ពុជា ដឹកនាំដោយអ្នកស្នេហាជាតិនៃគណបក្សប្រជាជនកម្ពុជា និងមានការជួយឧបត្ថម្ភគាំទ្រពីកងទ័ពស្ម័គ្រចិត្តវៀតណាមនាថ្ងៃ៧ មករា ១៩៧៩ បានរំដោះប្រជាជនទូទាំងប្រទេសឲ្យរួចផុតពីគ្រោះមរណៈនៃរបបប្រល័យពូជសាសន៍យ៉ាងណាក្តី ក៏ពួកប៉ុល ពត នៅតែចិញ្ចឹមចិត្ត ប៉ុនប៉ង និងរិះរកគ្រប់មធ្យោបាយដើម្បីវិលត្រទ្បប់មកកាប់សម្លាប់អាយុជីវិត និងបំផ្លិចបំផ្លាញទ្រព្យសម្បត្តិប្រជាជនជាថ្មីទៀត ។
លោកថា ការប្រឈមមុខចំពោះគ្រោះមហន្តរាយនេះ រដ្ឋាភិបាលសាធារណរដ្ឋប្រជាមានិតកម្ពុជា បានដាក់ចេញនូវផែនការក៥នេះទ្បើង ក្នុងស្មារតីជាម្ចាស់វាសនារបស់ប្រទេសជាតិ និងការពារអាយុជីវិតប្រជាជន ដែលទើបបានរស់់ទ្បើងវិញថ្មីៗឲ្យរួចផុតពីមហិច្ឆតារបស់ពួក ប៉ុល ពត ។ ប្រជាជនកម្ពុជាបានចូលរួមយ៉ាងសស្រាក់សស្រាំក្នុងការអនុវត្តផែនការនេះទទួលបានជោគជ័យ ទប់ស្កាត់បានការវិលត្រទ្បប់មកវិញនៃរបបប្រល័យពូជសាសន៍ ការពារបាននូវអាយុជីវិតប្រជាជន និងសមទ្ធផលសង្គមជាតិ ធ្វើឲ្យជាតិបន្តរស់ទាំងត្រដាបត្រដួសរឹងមាំជាបណ្តើរៗ រហូតមានការអភិវឌ្ឍរីកចម្រើនលើគ្រប់វិស័យដូចបច្ចុប្បន្នហួសពីការស្មាន ។
លោកបានបញ្ជាក់ថា ដោយសារជោគជ័យនៃផែនការក៥នេះហើយ ទើបមានកិច្ចព្រមព្រៀងទីក្រុងប៉ារីសថ្ងៃទី២៣ តុលា ១៩៩១ ជនជាតិខ្មែរនៅបរទេសអាចមានលទ្ធភាពចូលមកក្នុងប្រទេស មកធ្វើនយោបាយរហូតដល់សព្វថ្ងៃ ។ លោកបន្ថែមថា ប៉ុន្តែគួរឲ្យសោកស្តាយណាស់ កន្លងហួសជាច្រើនឆ្នាំទៅហើយនៅតែមានអ្នកនយោបាយអគតិមួយចំនួនតូចនៅតែឆ្លៀតយកផែនការក៥នេះមករំលឹក ហើយនិយាយខុសពីការពិតវាយប្រហារមកលើគណបក្សប្រជាជនកម្ពុជា និងរដ្ឋាភិបាលសាធារណរដ្ឋប្រជាមានិតកម្ពុជាមួលបង្កាច់សច្ចធម៌ប្រវត្តិសាស្ត្របំភាន់មតិសាធារណៈដើម្បីកេងចំណេញនយោបាយទៅវិញ ។ ពួកគេបំភ្លេចចោលនូវគុណសម្បត្តិនៃពលិកម្ម ការលះបង់អាយុជីវិតរបស់ប្រជាពលករកម្ពុជាក្នុងផែនការក៥ ដោយសារតែពលិកម្មនេះហើយ ទើបពួកគេអាចចូលមកធ្វើសកម្មភាពនយោបាយបានដូចសព្វថ្ងៃនេះ តែបែរជាប្រមាថមើលងាយដល់វិញ្ញាណក្ខន្ធអ្នកស្នេហាជាតិទៅវិញ ។ យើងមានជំនឿជាក់ថា ជនដែលរមិលគុណបុព្វបុរសខ្លួនពិតជានឹងទទួលរងនូវបាបកម្មធ្ងន់ធ្ងរជាមិនខាន ។
យ៉ាងណាក្តីលោក សុខ ឥសាន បានថ្លែងថា រឿងដែលលោក សម រង្ស៊ី វាយប្រហាររិះគន់លើសម្តេច ហេង សំរិន និងសម្តេច ហ៊ុន សែន ពីបញ្ហាផែនការក៥ គណបក្សប្រជាជនកម្ពុជា នឹងមិនប្តឹងគាត់ទេ ទុកឲ្យពលរដ្ឋជាអ្នកវាយតម្លៃចុះ ។
លោកគូសបញ្ជាក់ថា ផែនការក៥ គឺដើម្បីទប់ស្កាត់ពួកខ្មែរក្រហមមិនឲ្យវិលត្រឡប់មកកាប់សម្លាប់ខ្មែរជាថ្មី ហើយអ្វីដែលលោកសម រង្ស៊ី ប្រឆាំងនឹងផែនការនេះមានន័យថា គាត់ចង់ឲ្យខ្មែរក្រហមត្រឡប់មកកាប់សម្លាប់ខ្មែរវិញតែប៉ុណ្ណោះ ។
ចំពោះការលើកឡើងរបស់លោក សម រង្ស៊ីជាច្រើនលើកច្រើនសាថានឹងចូលមកស្រុកខ្មែរវិញដើម្បីចូលរួមបោះឆ្នោតនៅពេលខាងនោះ ត្រូវបានលោក សុខ ឥសាន ធ្លាប់ប្រាប់ថាជារឿងមួយធម្មតាទៅហើយ គឺគាត់គ្រាន់តែដើម្បីលួងចិត្តអ្នកគាំទ្រខ្លួនតែប៉ុណ្ណោះ ។ លោកបានស្វាគមន៍ចំពោះវត្តមានលោកសម រង្ស៊ី ប៉ុន្តែបើសិនជាគាត់ហ៊ានមកមែននោះនឹងត្រូវចាប់ខ្លួនមិនខាន ៕
ចែករំលែកព័តមាននេះ