មេដឹកនាំចុងក្រោយសហភាពសូវៀត ដែលបញ្ចប់សង្គ្រាមត្រជាក់ ទទួលមរណភាពហើយ
រុស្ស៊ី ៖ លោក Mikhail Gorbachev មេដឹកនាំចុងក្រោយបង្អស់របស់សហភាពសូវៀតដែលបានបញ្ចប់
រុស្ស៊ី ៖ លោក Mikhail Gorbachev មេដឹកនាំចុងក្រោយបង្អស់របស់សហភាពសូវៀតដែលបានបញ្ចប់សង្គ្រាមត្រជាក់ដោយគ្មានការបង្ហូរឈាម ប៉ុន្តែបរាជ័យក្នុងការទប់ស្កាត់សហភាពសូវៀតពីការដួលរលំ បានទទួលមរណភាពកាលពីថ្ងៃអង្គារ ទី ៣០ សីហា ម្សិលមិញនេះ ក្នុងវ័យ៩១ឆ្នាំ។ នេះបើយោងតាមការបញ្ជាក់របស់មន្ត្រីពេទ្យក្នុងទីក្រុងម៉ូស្កូ។
លោកបានបង្កើតកិច្ចព្រមព្រៀងកាត់បន្ថយអាវុ.ធជាមួយសហរដ្ឋអាមេរិក និងភាពជាដៃគូជាមួយមហាអំណាចលោកខាងលិច ដើម្បីដកព្រំដែននយោបាយ (Iron Curtain) ដែលបានបែងចែកអឺរ៉ុបជាពីរតំបន់ តាំងពីសង្គ្រាមលោកលើកទី ២ និងនាំមកនូវការបង្រួបបង្រួមប្រទេសអាល្លឺម៉ង់ឡើងវិញ។
ប៉ុន្តែកំណែទម្រង់ផ្ទៃក្នុងរបស់លោកបានធ្វើឱ្យសហភាពសូវៀតចុះខ្សោយរហូតដល់ដួលរលំ ដែលប្រធានាធិបតីរុស្ស៊ី Vladimir Putin ហៅថាជាគ្រោះមហន្តរាយដ៏ធំបំផុតនៃភូមិសាស្ត្រនយោបាយនៃសតវត្សរ៍ទី ២០។
មន្ទីរពេទ្យរបស់រុស្ស៊ីនិយាយថា «លោក Mikhail Gorbachev បានទទួលមរណភាពនៅពេលយប់ បន្ទាប់ពីមានជំងឺធ្ងន់ធ្ងរ»។
អ្នកនាំពាក្យវិមានក្រឹមឡាំងថ្លែងប្រាប់ទីភ្នាក់ងារសារព័ត៌មាន Interfax ដូច្នេះថា លោក Putin បានសម្តែងការរំលែកទុក្ខដ៏ក្រៀមក្រំបំផុត ហើយនៅថ្ងៃស្អែក លោកនឹងផ្ញើសាររំលែកទុក្ខដល់គ្រួសារ និងមិត្តភក្តិរបស់លោក Mikhail Gorbachev។
មេដឹកនាំពិភពលោកបានប្រញាប់ប្រញាល់សម្តែងការគោរពចំពោះលោក ដោយប្រធានគណៈកម្មាការអ៊ឺរ៉ុបលោកស្រី Ursula von der Leyen លោក Gorbachev បានបើកផ្លូវឱ្យអ៊ឺរុបមានសេរីភាព។
នាយករដ្ឋមន្ត្រីអង់គ្លេសលោក Boris Johnson បាននិយាយថា «ការប្តេជ្ញាចិត្តមិនចេះនឿយហត់របស់លោក Gorbachev ក្នុងការបើកសង្គមសូវៀតនៅតែជាគំរូដល់យើងទាំងអស់គ្នា»។
សូមបញ្ជាក់ថាលោក Mikhail Gorbachev បានគ្រប់គ្រងសហភាពសូវៀតចាប់ពីឆ្នាំ ១៩៩០ ដល់ ១៩៩១។ លោកបានឈ្នះពានរង្វាន់ណូបែលសន្តិភាពនៅក្នុងឆ្នាំ ១៩៩០ ដោយសារតែការដឹកនាំរបស់លោកក្នុងការបញ្ចប់សង្គ្រាមត្រជាក់ និងការជំរុញទំនាក់ទំនងអន្តរជាតិដោយសន្តិភាព៕ (យោងតាមប្រភព៖ Reuters)
ចែករំលែកព័តមាននេះ