រាជធានីភ្នំពេញ ៖ នៅរសៀលថ្ងៃសៅរ៍ ទី៤ កុម្ភៈ ខានស្អែកនេះ ប្រដាល់អន្តរជាតិរបស់ខារ៉ាបាវរដូវកាលទី២ វគ្គសន្សំពិន្ទុឈានទៅដណ្ដើមខ្សែក្រវាត់នៅលើសង្វៀនទូរទស្សន៍អាស៊ីអាគ្នេយ៍ត្រូវគេរំពឹងថា
រាជធានីភ្នំពេញ ៖ នៅរសៀលថ្ងៃសៅរ៍ ទី៤ កុម្ភៈ ខានស្អែកនេះ ប្រដាល់អន្តរជាតិរបស់ខារ៉ាបាវរដូវកាលទី២ វគ្គសន្សំពិន្ទុឈានទៅដណ្ដើមខ្សែក្រវាត់នៅលើសង្វៀនទូរទស្សន៍អាស៊ីអាគ្នេយ៍ត្រូវគេរំពឹងថា នឹងមានសភាពកាន់តែក្តៅគគុក ។ សមាសភាពកីឡាករកម្ពុជាដែលនឹងមានវត្តមានឡើងប្រកួតដណ្ដើមយក៣ពិន្ទុជាមួយកីឡាករថៃ និងឡាវ គឺកីឡាករ ពុទ្ធឆាយរិទី្ធ និងកីឡាករ រឿង សោភ័ណ្ឌ ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដង បើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករទាំងកម្ពុជា និងបរទេសសុទ្ធតែមានកម្រិតល្អ ហើយមើលទៅម្នាក់ៗបញ្ចេញថ្វីដៃគួរឱ្យទាក់ទាញរៀងខ្លួន ។ កីឡាករកម្ពុជា២រូប រួមមាន ជើងខ្លាំង ពុទ្ធ ឆាយរិទ្ធី និង រឿង សោភ័ណ្ឌ នឹងក្លាយជាគូប្រកួតស៊ីសាច់ហុតឈាមជាមួយកីឡាករឡាវ និងថៃនៅរសៀលថ្ងៃសៅរ៍ខានស្អែក ដែលការប្រកួតរបស់ពួកគេសុទ្ធតែមិនចង់ចាញ់ដូចគ្នា ។ កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែចង់គ្រងតំណែងជាម្ចាស់ខ្សែក្រវាត់អន្តរជាតិរបស់ខារ៉ាបាវ និងទទួលបានប្រាក់លានអមដោយកិត្តិយសមុខមាត់ ។ យ៉ាងណាមិញ គេមិនទាន់ដឹងថា កីឡាករណាមួយនឹងមានលទ្ធភាពយកបាន៣ពិន្ទុនៅសប្ដាហ៍នេះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយ ហើយជាមួយនឹងប្រវត្តិចាញ់ខ្លះឈ្នះខ្លះ សុទ្ធតែជាលក្ខខណ្ឌដែលធ្វើឱ្យពួកគេត្រូវការស្ដារមុខមាត់ ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា ជើងខ្លាំង២រូបខាងលើ នឹងបើកឆាកប្រយុទ្ធសម្រាប់សប្ដាហ៍ទី៤ ដែលនឹងប្រកួតនៅក្នុងព្រឹត្តិការណ៍ដណ្ដើមខ្សែក្រវាត់ជើងឯកខារ៉ាបាវ ។ កីឡាករ ពុទ្ធ ឆាយរិទ្ធី មកពីក្លិបពុទ្ធសេវីវង្សកីឡា ប៉ះប្រកួតជាមួយកីឡាករថៃឈ្មោះ សាំង យ៊ុត ក្នុងនាមជាគូបើកឆាកអន្តរជាតិដណ្ដើមពិន្ទុ ។
លោកជឿជាក់ថា កីឡាករ ពុទ្ធ ឆាយរិទ្ធី នឹងមិនភ្លាត់ឱ្យចាញ់សម្រាប់ការប្រកួតនេះទេ ថ្វីដ្បិតថា គេប្រកួតឈ្នះក៏មិនបានឡើងវគ្គពាក់កណ្ដាលផ្ដាច់ព្រ័ត្ររបស់ខារ៉ាបាវដែរ ។ លោកថា កីឡាកររូបនេះ នឹងត្រូវការឈ្នះ ដើម្បីលុបលាងភាពអាម៉ាស់ ប៉ុន្តែបើចាញ់មួយសានេះ ក៏ពិតជាប៉ះពាល់ដល់ប្រជាប្រិយភាព ។
លោករំពឹងថា ការប្រកួតបើកឆាករបស់គូអន្តរជាតិនេះ នឹងទាក់ទាញចំណាប់អារម្មណ៍ខ្លាំងក្លា ដោយសារកីឡាករឡាវ គឺត្រូវការឈ្នះ ដើម្បីឈានឡើងទៅវគ្គបន្ត ហើយកីឡាករកម្ពុជា ក៏ត្រូវការសង្គ្រោះប្រជាប្រិយភាព ។ កីឡាករ សាំង យ៊ុត ធ្លាប់ប្រកួត៧៦លើក ឈ្នះ៦២លើក ចាញ់១៣លើក និងស្មើ១លើក ក្នុងពេលកីឡាករកម្ពុជាឆ្លងកាត់ការប្រកួតរហូតដល់៨៥លើក ឈ្នះ៦៧លើក ចាញ់១៧លើក និងស្មើ១លើក ។
សម្រាប់កីឡាករ រឿង សោភ័ណ្ឌ លោកញាណ សុធី បញ្ជាក់ថា គេកាន់តែនឹងបញ្ចេញថ្វីដៃមិនធម្មតាក្នុងជំនួបកីឡាករឡាវឈ្មោះថា អ៊ូឡាន ក្នុងការដណ្ដើមឱ្យបាន៣ពិន្ទុនៅក្នុងព្រឹត្តិការណ៍អន្តរជាតិខារ៉ាបាវនេះ ។ លោកថា ឆ្លងកាត់ការប្រកួតកន្លងមកកីឡាកររូបនេះ នៅមិនទាន់ច្បាស់ថា បានឡើងនោះទេ ទើបការប្រកួតលើកនេះ គឺជារឿងសំខាន់មួយដែលអាចកំណត់ថា គេបានឡើងវគ្គបន្ត ឬធ្លាក់ហាលអាវ ។
លោកថា កីឡាករឡាវធ្លាប់ប្រកួត៦៦លើក ឈ្នះ៥៥លើក និងចាញ់១១លើក ក្នុងពេលកីឡាករកម្ពុជាធ្លាប់ប្រកួតបានដល់១៤៥លើក ឈ្នះ១២៨លើក ចាញ់១៥លើក និងស្មើ២ ទើបលោករំពឹងថា បទពិសោធន៍ល្អជាងរបស់កីឡាករកម្ពុជា នឹងជួយឱ្យគេនៅតែមានពិន្ទុនាំមុខ ។ យ៉ាងណាមិញ គេនៅមិនទាន់ប្រាកដថា សមត្ថភាពរបស់កីឡាករ រឿង សោភ័ណ្ឌ នឹងអាចយកឈ្នះគូប្រកួតដោយងាយនៅថ្ងៃខានស្អែកទេ ក្នុងពេលកីឡាករឡាវក៏មិនមែនធម្មតា ទាំងកម្លាំង បច្ចេកទេស និងសមត្ថភាព ដែលមានន័យថា ការប្រកួតលើកនេះក៏សំខាន់សម្រាប់គេ ដោយសារតែគេក៏ចង់ឈ្នះ ដើម្បីបានឆ្លងផុតវគ្គបន្តដូចគ្នា ។ ម្នាក់ៗបានត្រឹមចាំមើលការប្រកួតមួយនេះប៉ុណ្ណោះ ក្នុងពេលដែលរឿង សោភ័ណ្ឌ ក៏ចង់ឈ្នះមិនអាចចាញ់ ហើយកីឡាករឡាវក៏ចង់ឈ្នះមិនអាចចាញ់ដូចគ្នា ។ គូនេះត្រូវគេមើលឃើញថា នឹងស៊ីសាច់ហុតឈាម ដោយសារតែអ្នកឈ្នះបានឡើងវគ្គបន្ត ហើយអ្នកចាញ់ត្រូវប្រឈមបាត់ឱកាសសម្រាប់វគ្គពាក់កណ្ដាលផ្ដាច់ព្រ័ត្រ ៕
ចែករំលែកព័តមាននេះ