រាជធានីភ្នំពេញ ៖ គូប្រកួតប្រដាល់អន្តរជាតិ នៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ ទី៤ កុម្ភៈ ខានស្អែកនេះ មានចំនួន៣គូ ដែលសុទ្ធតែជាជើងខ្លាំងលំដាប់ជួរមុខនៅក្នុងពិភពប្រដាល់កម្ពុជា-ថៃ ។ អ្នកនិយមទស្សនា
រាជធានីភ្នំពេញ ៖ គូប្រកួតប្រដាល់អន្តរជាតិ នៅលើសង្វៀនទូរទស្សន៍ស៊ីអិនស៊ី ថ្ងៃសៅរ៍ ទី៤ កុម្ភៈ ខានស្អែកនេះ មានចំនួន៣គូ ដែលសុទ្ធតែជាជើងខ្លាំងលំដាប់ជួរមុខនៅក្នុងពិភពប្រដាល់កម្ពុជា-ថៃ ។ អ្នកនិយមទស្សនាកីឡាប្រដាល់កំពុងទន្ទឹងរង់ចាំមើលថា តើកីឡាករកម្ពុជាទាំង៣រូបនេះ អាចទៅរួចជាមួយកីឡាករបរទេសឬយ៉ាងណា? ខណៈកីឡាករថៃដែលពួកគេត្រូវជួបនាពេលនេះ មានសមត្ថភាពពិបាកផ្ដួលអីុចឹងនោះ ។
គូអន្ដរជាតិទី១ កីឡាករ ឃុន សុខាន មកពីក្លិបកងពលតូចលេខ៧០ ដែលធ្លាប់ប្រកួត៨៧ដង ឈ្នះ៦២ដង ចាញ់២២ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់១៣ដង ត្រូវជួបប្រកួតជាមួយកីឡាករថៃ ឈ្មោះយ៉ ត ឃុនផុនអេកប៉ាងសៃ ក្នុងប្រភេទទម្ងន់៦៧គីឡូក្រាម ។
កីឡាករថៃរូបនេះ ធ្លាប់ប្រកួត៨៦ដង ឈ្នះ៦៩ដង ចាញ់១៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៣ដង ព្រមទាំងធ្លាប់មកប្រកួតនៅស្រុកខ្មែរជាច្រើនលើកទៀតផង ។ ដូច្នេះគេពិតជាធ្លាប់ស្គាល់ពីថ្វីដៃប្រកួតរបស់កីឡាករកម្ពុជាបានច្បាស់ ទើបធ្វើឱ្យអ្នកគាំទ្រកីឡាករកម្ពុជា មានមន្ទឹលចំពោះលទ្ធផលចុងក្រោយរបស់កីឡាករ ឃុន សុខាន ។
គូអន្ដរជាតិទី២ សែន រ៉ាដេត មកពីក្លិបអប្សរាគុនខ្មែរ ដែលធ្លាប់ប្រកួតបានត្រឹមតែ៥១ដង ឈ្នះ៤៣ដង ចាញ់៨ដង និងធ្លាប់ផ្ដួលគូប្រកួតឱ្យសន្លប់បាន១៤ដង នឹងជួបប្រកួតជាមួយកីឡាករថៃឈ្មោះ ឈោកពិឈិត អ៊ាវមុនដាហាន ក្នុងប្រភេទទម្ងន់៥៤គីឡូក្រាម ។ កីឡាករថៃរូបនេះ ធ្លាប់ប្រកួតបានរហូតដល់ទៅ៨០ដង ឈ្នះ៦០ដង ចាញ់១៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ ទោះបីសែន រ៉ាដេត មានប្រវត្ដិប្រកួតតិចជាងមែន តែថ្វីដៃប្រកួតរបស់គេអាចទុកចិត្តបានថា នឹងកំដរកីឡាករថៃរូបនេះដល់ទីបញ្ចប់ ។
គូអន្ដរជាតិទី៣ ផល សោភ័ណ្ឌ មកពីក្លិបតាឡីដំរីមានរិទ្ធ ដែលធ្លាប់ប្រកួតបាន៦៩ដង ឈ្នះ៥៥ដង ចាញ់១៤ដង និងធ្លាប់ផ្ដួលគូប្រកួតឱ្យសន្លប់បាន១៨ដង នឹងជួបប្រកួតជាមួយកីឡាករថៃឈ្មោះ ភិតផាក់ ភិតសូរ៉ាក់ ក្នុងប្រភេទទម្ងន់៦៣,៥គីឡូក្រាម ។ កីឡាករថៃរូបនេះ ធ្លាប់ប្រកួតបានរហូតដល់ទៅ៩៥ដង ឈ្នះ៧០ដង ចាញ់២០ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១០ ។ ចាំមើល ផល សោភ័ណ្ឌ អាចតស៊ូប្រកួតជាមួយកីឡាករថៃរូបនេះបានឬអត់ ?
នាថ្ងៃអាទិត្យ ទី៥ កុម្ភៈ នៅលើសង្វៀនដដែល ក៏មានការប្រកួតប្រដាល់អន្ដរជាតិផងដែរ ។ សម្រាប់គូអន្ដរជាតិមានកីឡាករ កំពែងខ្មៅ មកពីក្លិបអប្សរាគុនខ្មែរ ដែលធ្លាប់ប្រកួត៣៤ដង ឈ្នះ១៩ដង ចាញ់១៤ដង ស្មើ១ដង នឹងជួបប្រកួតជាមួយកីឡាករថៃឈ្មោះ បល្លាំងធីប បានធីអ៊ុំរឿនភីថុង ក្នុងប្រភេទទម្ងន់៥៤គីឡូក្រាម ។ កីឡាករថៃរូបនេះ ធ្លាប់ប្រកួត៦០ដង ឈ្នះ៤៥ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៣ដង ។
មួយគូទៀតកីឡាករ ចាត ស៊ីចាន់ មកពីក្លិបអប់រំកាយស្រុកអន្លង់វែង ដែលធ្លាប់ប្រកួត៤០ដង ឈ្នះ២៨ដង ចាញ់៨ដង ស្មើ៤ដង ត្រូវជួបប្រកួតជាមួយកីឡាករថៃឈ្មោះ ដាវអាំងខានកៅក្លៃយីម ក្នុងប្រភេទទម្ងន់៦៩គីឡូក្រាម ។
កីឡាករថៃរូបនេះ ធ្លាប់ប្រកួត៧០ដង ឈ្នះ៥០ដង ចាញ់១៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៥ដង ។
ចំណែកគូប្រកួតមិត្តភាពរវាងកីឡាករកម្ពុជា និងកម្ពុជាវិញ មានកីឡាករ ពុយ ឈិន មកពីក្លិបឃ្លាំងមឿងកីឡា ប្រកួតជាមួយកីឡាករ សិទ្ធ សារ៉ាត់ មកពីក្លិបសាមគ្គីកូនខ្មែរ ។ កីឡាករ សំខាន់ ប៉ាវចិន មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ ហេង ពៅ មកពីក្លិបកងពលតូចលេខ៧០ និងគូចុងក្រោយកីឡាករ ជឹម សុភី មកពីក្លិបខ្លារខិនមានរិទ្ធ ប្រកួតជាមួយកីឡាករ ឌុម កែវដាំ មកពីក្លិបសុភានូមានជ័យ ៕
ចែករំលែកព័តមាននេះ