រាជធានីភ្នំពេញ ៖ ក្នុងរយៈពេល៣ថ្ងៃនៃពិធីបុណ្យចូលឆ្នាំចិនកន្លងមកនេះ មានភ្ញៀវទេសចរជាតិ និងអន្តរជាតិជាង៦០ម៉ឺននាក់បានដើរកម្សាន្តនៅតាមរមណីយដ្ឋាននានានៅក្នុងប្រទេសកម្ពុជា ។
រាជធានីភ្នំពេញ ៖ ក្នុងរយៈពេល៣ថ្ងៃនៃពិធីបុណ្យចូលឆ្នាំចិនកន្លងមកនេះ មានភ្ញៀវទេសចរជាតិ និងអន្តរជាតិជាង៦០ម៉ឺននាក់បានដើរកម្សាន្តនៅតាមរមណីយដ្ឋាននានានៅក្នុងប្រទេសកម្ពុជា ។
យោងតាមរបាយការណ៍របស់ក្រសួងទេសចរណ៍ ដែលបានចេញផ្សាយនៅព្រឹកថ្ងៃទី១ កុម្ភៈ ឲ្យដឹងថា ក្នុងឱកាសបុណ្យចូលឆ្នាំប្រពៃណីជាតិចិន បងប្អូនប្រជាពលរដ្ឋ និងទេសចរណ៍អន្តរជាតិដែលបានដើរកម្សាន្តនៅតាមរមណីយដ្ឋានទេសចរណ៍នានាទូទាំងប្រទេសមានប្រមាណជាង៦០ម៉ឺននាក់ ក្នុងនោះភ្ញៀវទេសចរជាតិមានប្រមាណជាង៥៣ម៉ឺននាក់ កើនឡើងប្រមាណ៨% និងភ្ញៀវទេសចរអន្តរជាតិមានប្រមាណ៧ម៉ឺននាក់ កើនឡើង២០% បើធៀបនឹងរយៈពេលដូចគ្នាកាលពីឆ្នាំកន្លងមក ។
របាយការណ៍ដដែលបង្ហាញថា តំបន់ទេសចរណ៍ដែលភ្ញៀវទៅកម្សាន្តច្រើននៅតាមគោលដៅសំខាន់ៗរួមមាន ខេត្តព្រះសីហនុ ជាង៨ម៉ឺននាក់, សៀមរាបអង្គរ ជាង៨ម៉ឺននាក់, កែប ជាង៧ម៉ឺននាក់, រាជធានីភ្នំពេញ ជាង៤ម៉ឺននាក់, បាត់ដំបង ជាង៤ម៉ឺននាក់, កំពង់ចាម ជាង៣ម៉ឺននាក់ និងរតនៈគិរី ជាង១ម៉ឺននាក់ ។
លោក ហូ វណ្ឌី អគ្គលេខាធិការសម្ព័ន្ធសមាគមទេសចរណ៍ជាតិកម្ពុជា ថ្លែងថា ៖ «ក្នុងឱកាសពិធីបុណ្យចូលឆ្នាំប្រពៃណីចិនកន្លងមកភ្ញៀវទេសចរជាតិនិងអន្តរជាតិ ពិតជាបានចេញដើរកម្សាន្តច្រើននៅតាមរមណីយដ្ឋាននានា ជាពិសេសតំបន់ឆ្នេរ ដោយសារក្រសួងបានរៀបចំចលនាឆ្នេរស្អាត ទីក្រុងបៃតង ចាប់តាំងពីការប្រារព្ធពិធីបុណ្យសមុទ្រ កាលពីចុងខែធ្នូកន្លងមក » ។
លោកបន្តថា វិស័យឯកជនស្វាគមន៍ និងរីករាយជាមួយនឹងកំណើនភ្ញៀវទេសចរនានា ព្រោះការទៅដល់របស់ភ្ញៀវទេសចរនៅតំបន់ណា មានន័យថា ពួកគេបានផ្តល់ចំណូលដោយផ្ទាល់ និងប្រយោលដល់ប្រជាពលរដ្ឋនៅតាមមូលដ្ឋាន ដែលជាផ្នែកមួយយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋកម្ពុជា ប៉ុន្តែវិស័យឯកជនសំណូមពរដល់អាជ្ញាធរពាក់ព័ន្ធមេត្តាជួយពង្រឹងសន្តិសុខ សុវត្ថិភាពភ្ញៀវទេសចរទាំងផ្លូវកាយ និងផ្លូវចិត្ត ជាពិសេស យកចិត្តទុកដាក់លើបញ្ហាអនាម័យ និងកុំបោះចោលសំរាមពាសវាលពាសកាល ព្រោះសំរាម និងកាកសំណល់នានាជាសត្រូវរបស់ភ្ញៀវទេសចរ ។
លោក ធួន ស៊ីណាន ប្រធានសហព័ន្ធទេសចរណ៍កម្ពុជា ថ្លែងថា ៖ « លោកជឿជាក់ថា ចំនួនភ្ញៀវដែលបានលើកឡើងនេះអាចជាការត្រឹមត្រូវ ហើយលោកសូមអបអរសាទរ ដោយសារកំណើនភ្ញៀវដើរកម្សាន្តច្រើនឆ្លុះបញ្ចាំងពីការរីកចម្រើនសេដ្ឋកិច្ច និងសង្គមរបស់កម្ពុជា ជាពិសេស ការកើនឡើងនូវប្រាក់ចំណូលរបស់ប្រជាពលរដ្ឋ » ។
លោកបន្តថា កំណើនភ្ញៀវនេះក៏ឆ្លុះបញ្ចាំងនូវកត្តា២សំខាន់ ទី១ ដោយសារការរីកចម្រើននៃបច្ចេកវិទ្យាពីបណ្តាញសង្គម និងទី២ ដោយសារចលករសង្គមកាន់តែមានភាពផុសផុល ដែលពួកគេអាចបង្ហាញពីដំណើរកម្សាន្តរបស់ពួកគេតាមរយៈបណ្តាញសង្គម ដើម្បីបង្អួតគ្នាទៅវិញទៅមក ។
លោកបន្ថែមថា ចំពោះភ្ញៀវដើរកម្សាន្តនៅបរទេសមានចំណុចវិជ្ជមាន និងអវិជ្ជមាន។ វិជ្ជមានត្រង់ថា ពេលដើរកម្សាន្តនៅក្រៅប្រទេស ប្រជាជនមានការយល់ដឹង ព្រោះពួកគេអាចរៀនសូត្រពីប្រទេសរបស់គេ ពីការអភិវឌ្ឍរបស់គេយកមកអនុវត្តនៅកម្ពុជា ក៏ដូចជាអាចផ្លាស់ប្តូរពាណិជ្ជកម្មរវាងប្រទេសទាំងពីរកាន់តែល្អប្រសើរ ។ ចំណែកផលអវិជ្ជមាន មានន័យថា ការដើរកម្សាន្តនៅប្រទេសគេ គឺជាការបង្ហូរសេដ្ឋកិច្ចទៅកាន់ប្រទេសគេច្រើន ដែលជាចំណុចមិនល្អសម្រាប់ស្រុកយើង ៕
ចែករំលែកព័តមាននេះ