រាជធានីភ្នំពេញ ៖ ព្រឹត្តិការណ៍បាល់ទាត់ដណ្ដើមពានរង្វាន់មិត្តភាពក្លិបបាល់ទាត់អាស៊ីឆ្នាំ២០១៧ (ASIA CLUBS PRESEASON CHAMPIONSHIP 2017) ដែលកម្ពុជាធ្វើជាម្ចាស់ផ្ទះលើកដំបូងនោះ មានប្រទេសចំនួន៣ចូលរួម ។ កម្ពុជាក្នុងនាមជាម្ចាស់ផ្ទះមាន២ក្រុម គឺក្រុមព្រះខ័នរាជស្វាយរៀង និងក្រុមក្រសួងការពារជាតិ ចំណែកក្រុមភ្ញៀវមានក្រុម Petalino Jayarangers FC មកពីប្រទេសម៉ាឡេស៊ី និងក្រុម Warriors មកពីប្រទេសសិង្ហបុរី ។
ការប្រកួតមានរយៈពេល៥ថ្ងៃចាប់ពីថ្ងៃទី១ ដល់ថ្ងៃទី៥ ខែកុម្ភៈ ឆ្នាំ២០១៧ នៅលើទីលានពហុកីឡដ្ឋានជាតិ ។ នៅថ្ងៃបើកឆាកដំបូងមាន២ប្រកួត គឺក្រុមព្រះខ័នរាជស្វាយរៀង ជួបប្រកួតជាមួយក្រុម Petalino Jayarangers FC របស់ប្រទេសម៉ាឡេស៊ី ចាប់ពីម៉ោង៤ដល់ម៉ោង៦ល្ងាច និងក្រុមក្រសួងការពារជាតិ ប្រកួតជាមួយក្រុម Warriors របស់ប្រទេសសិង្ហបុរី ចាប់ពីម៉ោង៦និង៣០នាទីល្ងាចដល់ម៉ោង៨ និង៣០នាទីយប់ ។ ថ្ងៃទី២ កុម្ភៈ មានលេងពីរប្រកួតដែរគឺក្រុម Warriosr ប្រកួតជាមួយក្រុមព្រះខ័នរាជស្វាយរៀង និងក្រុមក្រសួងការពារជាតិ ជួបប្រកួតជាមួយក្រុម Petalino Jayarangers FC។ ថ្ងៃទី៣ កុម្ភៈ ក្រុម Petalino Jayarangers FC ជួបប្រកួតជាមួយក្រុម Warriosr និងក្រុមក្រសួងការពារជាតិ ជួបប្រកួតជាមួយក្រុមព្រះខ័នរាជស្វាយរៀង ។ នៅថ្ងៃទី៤ កុម្ភៈ ក្រុមទាំងអស់ត្រូវបានឱ្យសម្រាក ដើម្បីត្រៀមកម្លាំងប្រកួតនៅវគ្គផ្ដាច់ព្រ័ត្រនៅថ្ងៃទី៥ កុម្ភៈ ដណ្ដើមយកចំណាត់ថ្នាក់លេខ១ លេខ២ និងលេខ៣ជាបន្តទៀត ។
លោក ទេព ឡុងរចនា គ្រូបង្វឹកក្លិបបាល់ទាត់ក្រសួងការពារជាតិ បានមានប្រសាសន៍នៅក្នុងសន្និសីទសារព័ត៌មាន កាលពីល្ងាចថ្ងៃទី៣១ មករា នៅសណ្ឋាគារហ៊ីម៉ាវ៉ារី ថា ព្រឹត្តិការណ៍នៃការប្រកួតបែបនេះ កម្ពុជាទទួលធ្វើជាម្ចាស់ផ្ទះជាលើកទី១ប៉ុណ្ណោះ ។ ការប្រកួតនេះពិតជាមានសារសំខាន់ខ្លាំងណាស់សម្រាប់កម្ពុជាយើង ដោយសារតាមរយៈព្រឹត្តិការណ៍នេះអាចជួយដល់ក្លិបបាល់ទាត់កម្ពុជាយើងទទួលបាននូវបទពិសោធន៍បន្ថែមទៀត និងអាចជំរុញឱ្យវិស័យកីឡាបាល់ទាត់នៅក្នុងតំបន់អាស៊ីទាំងមូល មានការរីកចម្រើនផងដែរ ។
លោក ខូវ ឆាយ អ្នកចាត់ការទូទៅក្លិបបាល់ទាត់ក្រសួងការពារជាតិបានឱ្យដឹងថា ព្រឹត្តិការណ៍មួយនេះអាចជាសញ្ញាដ៏ល្អមួយសម្រាប់កម្ពុជាព្រោះយើងធ្វើឡើងនៅមុនរដូវកាលលីគកំពូលចាប់ផ្ដើម ។ លោកថា ឆ្នាំដំបូងនេះមានប្រទេសតែ៣ប៉ុណ្ណោះចូលរួមទោះបីយ៉ាងណាលោកសង្ឃឹមថា ការប្រកួតលើកក្រោយៗទៀតនឹងមានក្រុមចូលរួមច្រើនជាងនេះមិនខាន ខណៈពានរង្វាន់បាល់ទាត់មួយនេះនឹងធ្វើឡើងរហូតដល់ឆ្នាំ២០២០ ៕
ចែករំលែកព័តមាននេះ