រាជធានីភ្នំពេញ ៖ នៅក្នុងការប្រកួតជើងទី១ នៃវគ្គជម្រុះពាន AFC Cup 2017 នៅលើទីលានពហុកីឡដ្ឋានជាតិអូឡាំពិក កាលពីល្ងាចថ្ងៃទី៣១ មករា ក្រុមបឹងកេតអង្គរ បើទោះជានៅសល់សមាជិកតែ៩នាក់ លេងនៅលើទីលានក្ដី ក៏ក្រុមមួយនេះនៅតែបង្ហាញទម្រង់លេងល្អ ដោយអាចទប់ស្មើ១-១ជាមួយក្រុមLao Toyota ។
ក្រុមបឹងកេតអង្គរមានឱកាសស៊ុតបាល់បញ្ចូលទីនាំមុខតាំងពីចាប់ផ្ដើមលេងបាន៩នាទីដំបូងមកម្ល៉េះ ប៉ុន្តែមិនបានសម្រេចដោយសារមានការរារាំងពីខ្សែការពាររបស់ក្រុម Lao Toyota ។ លុះដល់នាទីទី១៧ ទើបខ្សែប្រយុទ្ធឃួន ឡាបូរ៉ាវី មានឱកាសស៊ុតបាល់បញ្ចូលទីឱ្យក្រុមបឹងកេតអង្គរនាំមុខ ១-០ ប៉ុន្តែចូលដល់នាទីទី២៦ក្រុម Lao Toyotaរកបានគ្រាប់បាល់តាមស្មើ១-១វិញ ធ្វើឱ្យស្ថានការណ៍ប្រកួតនៅលើសមរភូមិវាលស្មៅកាន់តែឡើងកម្ដៅដោយសារក្រុមទាំងពីរចាប់ផ្ដើមលេងកាចៗដាក់គ្នារហូតដល់ថ្នាក់អាជ្ញាកណ្ដាលចំណាយកាតក្រហមដល់ទៅ២បណ្ដេញសមាជិកក្រុមបឹងកេតអង្គរចំនួន២រូបចេញពីទីលានប្រកួត ។ អ្នកចាំទី ស៊ូ យ៉ាទី ត្រូវពិន័យកាតក្រហមបណ្ដេញចេញនៅនាទីទី២៩ ហើយនៅនាទីទី៣០ កីឡាករគឹម មករា ដូរចូលជំនួសខៀវ វិបុល ដើម្បីចាំទី ។ ចូលដល់នាទីទី៤២កីឡាករស៊ុន សុវណ្ណារិទ្ធ ខ្សែការពារក្រុមបឹងកេតអង្គរត្រូវពិន័យកាតក្រហមបណ្ដេញចេញដែរ ។
នៅតង់ទី២ក្រុមបឹងកេតអង្គរដែលនៅសល់សមាជិកតែ៩នាក់លេងនៅលើទីលាននៅតែអាចរក្សាទម្រង់លេងបានយ៉ាងល្អ បើទោះជាក្រុម Lao Toyota ដែលមានគ្នា១១នាក់ព្យាយាមលេងវាយសម្រុកយ៉ាងណាក៏ដោយ ក៏មិនអាចទម្លុះរបាំងការពារដ៏រឹងមាំរបស់ក្រុមបឹងកេតអង្គរបានដែរ ។ ផ្ទុយទៅវិញក្រុមបឹងកេតអង្គរនៅតែមានឱកាសលេងវាយបកវិញម្ដងម្កាលដែរ ធ្វើឱ្យក្រុមLao Toyotaប្រហោងពោះឆ្លុង ។ ចាន់ វឌ្ឍកា ដែលប្ដូរចូលជំនួសកីឡាករ Maycon Silva នៅនាទីទី៦៥មិនអាចរកគ្រាប់បាល់ឱ្យក្រុមរបស់ខ្លួនបានឡើយ ដោយសារតែគ្មានអ្នកគាំទ្រជួយលើកទឹកចិត្ដ ។ ប្រកួតលើកនេះ គឺជាលើកចុងក្រោយរបស់កីឡាកររូបនេះឱ្យក្លិបបឹងកេតអង្គរ ដោយសារប៉ុន្មានសប្ដាហ៍ខាងមុខនេះ លោកត្រូវទៅលេងឱ្យក្លិប Fujieda MYFC ស្ថិតក្នុងលីគទី៣ របស់ជប៉ុនរយៈពេល១ឆ្នាំក្នុងលក្ខណៈខ្ចីជើង ។
នៅចុងម៉ោងក្រុម Lao Toyota បានព្យាយាមលេងវាយសម្រុកយ៉ាងខ្លាំងធ្វើឱ្យអ្នកគាំទ្រក្រុមបឹងកេតអង្គរបុកពោះមិនស្ទើរ ។
ជាពិសេសនៅនាទីទី៨៦ក្រុម Lao Toyota បាននាំបាល់ទៅលេងមុខទីក្រុមបឹងកេតអង្គរជាច្រើនលើក ប៉ុន្ដែធ្វើមិនបានសម្រេចដោយសារមានការរារាំងពីខ្សែការពារធ្វើឱ្យការស៊ុតបាល់របស់ក្រុមភ្ញៀវមួយនេះចំតែរបាទីប៉ុណ្ណោះ ។
ចប់ការប្រកួត៩០នាទីក្រុមទាំងពីរទទួលបានលទ្ធផលស្មើគ្នា១-១ ។ ការប្រកួតជើងទី២រវាងក្រុមទាំងពីរនឹងធ្វើឡើងនាថ្ងៃទី៧ ខែកុម្ភៈ ឆ្នាំ២០១៧ នៅប្រទេសឡាវ ដែលអ្នកគាំទ្រកម្ពុជាសង្ឃឹមថា ក្រុមបឹងកេតអង្គរនឹងអាចយកឈ្នះក្រុមLao Toyota មិនខាន ៕
ចែករំលែកព័តមាននេះ