ចក្រភពអង់គ្លេស ៖ រដ្ឋាភិបាលអង់គ្លេសបាននិយាយកាលពីថ្ងៃទី២៨ មករា ថា ប្រធានាធិបតីសហរដ្ឋអាមេរិក លោក Donald Trump យល់ស្របថា នឹងចាប់ផ្តើមការចរចាពាណិជ្ជកម្មជាមួយអង់គ្លេសភ្លាម ក្រោយចាកចេញពីសហភាពអឺរ៉ុប (EU) ដើម្បីរក្សាគោលការណ៍ដែលមាននាពេលបច្ចុប្បន្ន ។
ការចរចាកម្រិតខ្ពស់ដែលត្រូវបានយល់ស្របខាងលើ គឺពេលដែលលោកស្រីនាយករដ្ឋមន្ត្រី Theresa May ធ្វើទស្សនកិច្ចទៅកាន់ White House នាថ្ងៃសុក្រមុននេះ ។ វាប្រៀបបាននឹងប្រឆាំងជាមួយអ្នកដឹកនាំក្នុង EU ដែលបានព្រមានដល់អង់គ្លេសថាមិនអាចចាប់ផ្តើមការចរចាជាមួយប្រទេសណាមួយឡើយ មុនពេលចាកចេញពីសហភាពនេះ ។
អ្នកនាំពាក្យរបស់រដ្ឋាភិបាលនិយាយថា ៖ « ដំណាក់កាលទី១ គឺកិច្ចព្រមព្រៀងចរចាពាណិជ្ជ កម្ម (TNA) ដែលរួមមាន ការចរចាកម្រិតខ្ពស់រវាងប្រទេសទាំងពីរចាប់ផ្តើមភ្លាមៗ»។
លោកស្រី May ពិតជាមានការខិតខំប្រឹងប្រែងដើម្បីទទួលបានការប្តេជ្ញាពីលោក Trump លើទំនាក់ទំនងពិសេសរវាងចក្រភពអង់គ្លេស និងសហរដ្ឋអាមេរិក ។ លោកស្រីសន្យាថា នឹងស្មោះត្រង់ចំពោះលោកប្រធានាធិបតីរូបនេះ ប៉ុន្តែបាននាំយកនូវការរិះគន់នៅប្រទេសរបស់ខ្លួន ខណៈលោកស្រីមិនព្រមរិះគន់ដល់គោលនយោបាយជនភៀសខ្លួនរបស់លោក Trump កាលពីថ្ងៃសៅរ៍ នៅប្រទេសតួកគី ។
អាល្លឺម៉ង់ និងបារាំងបានបង្ហាញនូវការព្រួយបារម្ភលើគោលនយោបាយនេះ ខណៈអង្គការសហប្រជាជាតិនិយាយថា ពួកគេសង្ឃឹមថា វាគ្រាន់តែបណ្តោះអាសន្នប៉ុណ្ណោះ ។
ខណៈមានការបារម្ភពីផលប៉ះពាល់ដែលអាចកើតមានឡើងបន្ទាប់ពីការចាកចេញពីទីផ្សាររួមរបស់អឺរ៉ុប ការធានានូវការចរចាពាណិជ្ជកម្ម គឺជាគោលដៅដ៏សំខាន់មួយក្នុងអំឡុងពេលធ្វើទស្សនកិច្ចទៅកាន់សហរដ្ឋអាមេរិក ។
រដ្ឋាភិបាលអង់គ្លេសនិយាយថា លោក Trump សន្យាថា នឹងធានាលើកិច្ចព្រមព្រៀងពាណិជ្ជកម្មដែលអង់គ្លេសកំពុងមានជាមួយសហរដ្ឋអាមេរិកបច្ចុប្បន្ន តាមរយៈភាពជាសមាជិក EU នឹងបន្តពេលដែលប្រទេសនេះចាកចេញ ។ ការចរចានឹងមានគោលដៅដកឧបសគ្គផ្សេងៗលើទំនិញនាំចេញពីអង់គ្លេស ដូចជា អាហារ និងកសិផលទៅកាន់សហរដ្ឋអាមេរិក ក៏ដូចជាការទទួលស្គាល់នូវគុណភាព ដើម្បីធ្វើឲ្យប្រជាពលរដ្ឋក្នុងប្រទេសទាំងពីរប្រកបអាជីវកម្ម ។
គួរបញ្ជាក់ថា ការធ្វើពាណិជ្ជកម្មទ្វេភាគីរវាងប្រទេសទាំងពីរមានតម្លៃច្រើនជាង១៨៨ប៊ីលានដុល្លារទៅទៀត ហើយសហរដ្ឋអាមេរិកគឺជាប្រភពដ៏ធំបំផុតសម្រាប់ការវិនិយោគនៅអង់គ្លេស ។
គណៈកម្មការអឺរ៉ុបបានព្រមានប្រទេសនេះផងដែរកាលពីសប្តាហ៍មុន ទាក់ទិននឹងការចរចាពាណិជ្ជកម្មមុនពេលចាកចេញពី EU ។
គណៈកម្មការពាណិជ្ជកម្ម Cecilia Malmstrom និយាយថា ៖ « ប្រសិនបើពួកគេនិយាយពីវានោះគឺមិនអីទេ ប៉ុន្តែពួកគេមិនអាចចាប់ផ្តើមចរចាឡើយមុនពេលចាកចេញ »៕
ចែករំលែកព័តមាននេះ