ប្រទេសថៃ ៖ គណៈកម្មាធិការសម្រាប់ប្រេងចម្រាញ់ពីរុក្ខជាតិ បានប្រាប់ដល់ភ្នាក់ងាររដ្ឋឲ្យដោះស្រាយបញ្ហាកង្វះដូងក្នុងមធ្យោបាយស្វ័យទ្រទ្រង់ដូចជា តាមរយៈបង្កើនការដាំដុះជាដើម ។
គណៈកម្មាធិការខាងលើ ដែលនៅក្រោមការដឹកនាំរបស់លោកឧបនាយករដ្ឋមន្ត្រី Prajin Juntong ទទួលស្គាល់ថា ផលិតកម្មដូងបានធ្លាក់ចុះក្នុងរយៈពេល៥ឆ្នាំមកនេះ ព្រោះតែមានគ្រោះរាំងស្ងួត និងសត្វល្អិតបំផ្លាញ ។ តំបន់សម្រាប់ដាំដុះដូងទូទាំងប្រទេស បានធ្លាក់ចុះពី២០ម៉ឺនហិកតានៅឆ្នាំ២០១២ មកត្រឹម១៧ម៉ឺនហិកតាប៉ុណ្ណោះ ។
កាលពីថ្ងៃចន្ទ លោក Prajin បានបញ្ជាឲ្យមានការបង្កើតក្រុមគណៈកម្មាធិការ និងផែនការដើម្បីបង្កើនផលិតកម្ម ឲ្យស្មើនឹងកម្រិតរយៈពេល៥ឆ្នាំមុន ។
អាជ្ញាធរនិយាយថា ផលិតកម្មដូងរបស់ថៃ ធ្លាប់ស្មើនឹងប្រមាណ៨០ម៉ឺនតោន ប៉ុន្តែចំនួននេះបានធ្លាក់មកត្រឹម៧៤ម៉ឺនតោនកាលពីឆ្នាំមុន ។ ការធ្លាក់ចុះនេះបានតម្រូវឲ្យមានការនាំចូលដូងច្រើនជាង១៤ម៉ឺនតោនឯណោះ ។ ដើម្បីបង្កើនផលិតកម្ម ផែនការខាងលើនេះគួរតែផ្តោតលើការបង្កើនតំបន់ដាំដុះ ។
គណៈកម្មាធិការខាងលើសង្ឃឹមថា នឹងអាចស្វែងរកពូជដូងល្អៗជាងនេះ តាមរយៈការស្រាវជ្រាវនិងអភិវឌ្ឍន៍ការដាំដុះនាពេលអនាគត ។
ការនាំចូលដូង ក៏ត្រូវមានការត្រួតពិនិត្យឲ្យបានត្រឹមត្រូវផងដែរ ព្រោះភាគច្រើនមានការទិញចូលដោយខុសច្បាប់ដើម្បីគេចពន្ធ ។
កង្វះខាតនៃដូងនេះបានធ្វើឲ្យប្រទេសថៃនាំចូលជាច្រើនក្នុងរយៈពេល៥ឆ្នាំកន្លងមក គឺពី២៧ពាន់តោនក្នុងឆ្នាំ២០១២ មក១៤ម៉ឺនតោនកាលពីឆ្នាំមុន ។ ប្រទេសដែលលក់ដូងទៅឲ្យថៃច្រើនជាងគេ គឺឥណ្ឌូណេស៊ី ហ្វ៊ីលីពីន វៀតណាម និងមីយ៉ាន់ម៉ា ។
តម្រូវការដូងនៅក្នុងស្រុក ក៏បានកើនឡើងផងដែរ ព្រោះតែមានការលូតលាស់នៃវិស័យអាហាររបស់ថៃ ហើយខ្ទិះដូង គឺជាគ្រឿងដ៏សំខាន់ក្នុងអាហារថៃ ។ ទោះជាយ៉ាងណា ប្រទេសថៃនៅតែបន្តនាំចេញខ្ទិះដូងកំប៉ុងដដែល៕
ចែករំលែកព័តមាននេះ