គេហទំព័រទេសចរណ៍អង្គរថ្មីដំណើរការចាប់ពីថ្ងៃទី1 ខែកុម្ភៈ នេះហើយ
ខេត្តសៀមរាប ៖ គេហទំព័រទេសចរណ៍អង្គរ (www.angkor.com.kh) ដែលបង្កើតឡើងដោយអាជ្ញាធរអប្សរា គឺជាប្រភពព័ត៌មានដ៏សម្បូរបែបសម្រាប់ភ្ញៀវទេសចរស្វែងរកព័ត៌មានទេសចរណ៍ ផ្សេងៗ
ខេត្តសៀមរាប ៖ គេហទំព័រទេសចរណ៍អង្គរ (www.angkor.com.kh) ដែលបង្កើតឡើងដោយអាជ្ញាធរអប្សរា គឺជាប្រភពព័ត៌មានដ៏សម្បូរបែបសម្រាប់ភ្ញៀវទេសចរស្វែងរកព័ត៌មានទេសចរណ៍ ផ្សេងៗ នៅតំបន់រមណីយដ្ឋានប្រវត្តិសាស្ត្រអង្គរ ។
តាមការបញ្ជាក់លោកសុខ សង្វារ អគ្គនាយករងអាជ្ញាធរអប្សរាឲ្យដឹងថា គេហទំព័រថ្មីនេះដើរតួនាទីចម្បងក្នុងការផ្សព្វផ្សាយពីតំបន់ទេសចរណ៍ក្នុងរមណីយដ្ឋានប្រវត្តិសាស្ត្រអង្គរ ជាពិសេសផ្តល់ព័ត៌មាន សំខាន់ៗសម្រាប់ដំណើរទេសចរណ៍ ប្រកបដោយបទពិសោធន៍ល្អប្រសើរ។ គេហទំព័រថ្មីនេះក្រុមការងារអាជ្ញាធរអប្សរាបានចំណាយពេលវេលាជិតមួយឆ្នាំមកហើយដើម្បីរៀបចំឡើង ជាពិសេសក្នុងការរចនាឲ្យមានភាពសាមញ្ញបង្កប់ដោយភាពទាក់ទាញ ដោយមានភ្ជាប់ជាមួយរូបភាពជាច្រើន និងផ្តល់ព័ត៌មានគ្រប់គ្រាន់ដល់ភ្ញៀវទេសចរជាតិ-អន្តរជាតិមុននឹងមកទស្សនាតំបន់រមណីយដ្ឋានប្រវត្តិសាស្ត្រអង្គរ ក៏ដូចជាអំឡុងពេលទស្សនា ជាពិសេសគេហទំព័រថ្មីនេះ គឺជាមធ្យោបាយនៃការផ្សារភ្ជាប់ការទាក់ទងរវាងភ្ញៀវទេសចរ និងក្រុមការងារ តាមរយៈការរៀបចំឲ្យមានតារាងបញ្ចេញមតិ ពេញចិត្ត ឬមិនសូវពេញចិត្ត រួមនិងសំណូមពរ ផ្សេងៗក្នុងន័យស្ថាបនា ដើម្បីឲ្យក្រុមការងារអាចសិក្សាកែសម្រួលលើកកម្ពស់សេវាទេសចរណ៍អង្គរឲ្យកាន់តែល្អប្រសើរ ។
លោកសុខ សង្វារ បញ្ជាក់បន្ថែមថា គេហទំព័រនេះមុននឹងឈានដល់ការសម្រេចដាក់ឲ្យដំណើរការ ក្រុមការងារបានពិភាក្សាគ្នាជាមួយផ្នែកឯកជន ជាពិសេសសមាគមមគ្គុទ្ទេសក៍ទេសចរណ៍ និងភ្នាក់ងារទេសចរណ៍ដែលជាការផ្តល់ឱកាសឲ្យមានការចូលរួមមតិយោបល់ ផ្សេងៗផងដែរ ។ លើសពីនេះក្រុមការងារក៏បានបង្ហាញជូនក្រុមអ្នកជំនាញចំពោះកិច្ចនៃ ICC-Angkor ដោយទទួលបានការពេញចិត្ត និងគាំទ្រយ៉ាងពេញទំហឹង និងជំរុញឱ្យដំណើការកាន់តែឆាប់កាន់តែប្រសើរ ។ គេហទំព័រនេះក៏នឹងមានការអភិវឌ្ឍបន្ថែមជាប្រចាំ ក៏ដូចជាការបន្ថែមភាសាបរទេស សំខាន់ៗមួយចំនួន លើភាសាអង់គ្លេសដែលមានស្រាប់ ។
ដោយឡែកចំពោះគេហទំព័ររបស់អាជ្ញាធរអប្សរា (www.apsaraauthority.gov.kh) និងបណ្តាញព័ត៌មាន Facebook (អាជ្ញាធរជាតិអប្សរា Apsara Authority) នៅតែដំណើរការធម្មតា ដោយដើរតួនាទីផ្សព្វផ្សាយពីសកម្មភាពប្រចាំថ្ងៃ និងធ្វើបច្ចុប្បន្នភាពព័ត៌មាន ផ្សេងៗ និងជាប្រភពឯកសារសម្រាប់អ្នកស្រាវជ្រាវនិងអ្នកសិក្សានានាក្នុងការឈ្វេងយល់អំពីតួនាទី ភារកិច្ច និងសមិទ្ធផលរបស់អាជ្ញាធរអប្សរា ក្នុងកិច្ចការអភិរក្សនិងអភិវឌ្ឍតំបន់រមណីយដ្ឋានប្រវត្តិសាស្ត្រអង្គរប្រកបដោយចីរភាព ៕
ចែករំលែកព័តមាននេះ