ខេត្តមណ្ឌលគិរី ៖ ដើម្បីឱ្យខេត្តមណ្ឌលគិរីប្រែមុខមាត់ថ្មី និងកាន់តែមានភាពទាក់ទាញសម្រាប់ភ្ញៀវទេសចរជាតិ អន្តរជាតិដែលមកទស្សនាកម្សាន្តមានការកើនឡើងជារៀងរាល់ឆ្នាំនោះ នៅព្រឹកថ្ងៃទី២៨ សីហា ឯកឧត្តម ថង សាវុន…
ខេត្តមណ្ឌលគិរី ៖ ដើម្បីឱ្យខេត្តមណ្ឌលគិរីប្រែមុខមាត់ថ្មី និងកាន់តែមានភាពទាក់ទាញសម្រាប់ភ្ញៀវទេសចរជាតិ អន្តរជាតិដែលមកទស្សនាកម្សាន្តមានការកើនឡើងជារៀងរាល់ឆ្នាំនោះ នៅព្រឹកថ្ងៃទី២៨ សីហា ឯកឧត្តម ថង សាវុន អភិបាលខេត្តមណ្ឌលគិរី បានអញ្ជើញក្នុងពិធីបើកការដ្ឋាន និងបញ្ចុះបឋមសិលាសាងសង់រង្វង់មូល«រូបសំណាកដំរី» នៅភូមិចំការតែ សង្កាត់ស្ពានមានជ័យ ក្បែរវិមានឯករាជ្យ និងសាងសង់រូបសំណាកដំរី ក្រុងសែនមនោរម្យ សូមស្វាគមន៍ ស្ថិតនៅក្រៅក្រុង លើកំណាត់ផ្លូវជាតិលេខ ៧៦A ដើម្បីបញ្ចៀសគ្រោះថ្នាក់ចរាចរណ៍ និងលើកកម្ពស់សោភ័ណភាព ជាពិសេស ជាការរំលឹកពីប្រវត្តិសាស្ត្ររបស់បងប្អូនជនជាតិដើមភាគតិច ។
ឯកឧត្តម ថង សាវុន អភិបាលខេត្តបានឲ្យដឹងថា ការសាងសង់រង្វង់មូលរូបសំណាកដំរី និងរូបសំណាកដំរី ក្រុងសែនមនោរម្យ សូមស្វាគមន៍ នាពេលនេះ ធ្វើឡើងក្នុងគោលបំណង ដើម្បីចូលរួមបង្កើននូវសមិទ្ធផលបន្ថែមរបស់ខេត្តមណ្ឌលគិរី ក្នុងការរៀបចំសណ្ដាប់ធ្នាប់សាធារណៈ បញ្ចៀសគ្រោះថ្នាក់ចរាចរណ៍ ធានាសុវត្ថិភាព ក្នុងការធ្វើដំណើរ របស់ប្រជាពលរដ្ឋ ក៏ដូចជាភ្ញៀវទេសចរ ជាពិសេស ដើម្បីលើកកម្ពស់សោភ័ណភាព ខេត្តមណ្ឌលគិរីឲ្យមានការរីកចម្រើន ។
ឯកឧត្តមបញ្ជាក់ថា សមិទ្ធផលដែលនឹងចេញជារូបរាងនាពេលខាងមុខ ពិតជាឆ្លុះបង្ហាញយ៉ាងច្បាស់ ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំឲ្យប្រទេស មានសុខសន្តិភាព និងមានការរីកចម្រើនលើគ្រប់វិស័យ ។ ឯកឧត្តមបញ្ជាក់បន្ថែមថា រាជរដ្ឋាភិបាលកម្ពុជា បានកំណត់យកខេត្តមណ្ឌលគិរី ជាតំបន់ប៉ូលសេដ្ឋកិច្ចទី៤ បន្ទាប់ពីរាជធានីភ្នំពេញ តំបន់ឆ្នេរ និងតំបន់សៀមរាប ក្នុងចក្ខុវិស័យនៃផែនការមេ សម្រាប់អភិវឌ្ឍន៍វិស័យទេសចរណ៍ខេត្តមណ្ឌលគិរី ។
ទន្ទឹមនឹងនេះ ឯកឧត្តម អភិបាលខេត្ត ក៏បានណែនាំ និងជំរុញដល់មន្ទីរអង្គភាព និងវិស័យឯកជន រួមទាំងប្រជាពលរដ្ឋទាំងអស់ ត្រូវចូលរួមសហការគ្នា សាងសង់រង្វង់មូលរូបសំណាកដំរី និងរូបសំណាកដំរី ក្រុងសែនមនោរម្យ សូមស្វាគមន៍នេះ ឲ្យទទួលបានជោគជ័យ ដើម្បីទុកឲ្យកូនចៅជំនាន់ក្រោយ ហើយចូលរួមសាងសង់ និងអភិវឌ្ឍន៍ខេត្តមណ្ឌលគិរី ឲ្យកាន់តែមានការរីកចម្រើនបន្ថែមទៀត ។ បន្ថែមលើសនេះ ក៏សូមឲ្យមន្ត្រីជំនាញទាំងអស់ ត្រូវយកចិត្តទុកដាក់បម្រើសេវាសាធារណៈ ជូនប្រជាពលរដ្ឋប្រកបដោយគុណភាព តម្លាភាព និងប្រសិទ្ធភាព និងបន្តចូលរួមអនុវត្តនូវវិធានការរបស់ក្រសួងសុខាភិបាល ៣កុំ និង៣ការពារ ដើម្បីបង្ការ ទប់ស្កាត់ ការឆ្លងរាលដាលនៃជំងឺកូវីដ-១៩ ។
សូមបញ្ជាក់ថា ការសាងសង់រង្វង់មូលរូបសំណាកដំរី មានទំហំផ្ទៃរង្វង់មូលចំនួន១២,៦០ម៉ែត្រ កម្ពស់ដំរី៦,៦៣ម៉ែត្រ និងកម្ពស់រូបមេទ័ព៨តឹក និងរូបសំណាក់ដំរី ក្រុងសែនមនោរម្យ សូមស្វាគមន៍ ខឿនមានបណ្តោយ ៧ម៉ែត្រ ទទឹម ៤ម៉ែត្រ កម្ពស់ដំរី ៣,០៦ម៉ែត្រ និងផ្លាក់ទំហំទំហំ១,២៦ម៉ែត្រ និងប្រវែង ៣,៦៩ម៉ែត្រ នាពេលនេះ សាងសង់ដោយក្រុមសិក្សាប្លង់ និងសំណង់ ហង់ ឃីម ។ ហើយការសាងសង់រូបសំណាក់ដំរីទាំងពីរនេះ រយៈពេលចំនួន ៤ខែ ដោយគិតចាប់ពីថ្ងៃទី២៨ ខែសីហា ឆ្នាំ២០២២ ៕
ចែករំលែកព័តមាននេះ