ខេត្តព្រះសីហនុ ៖ ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹះស្នា បានមានប្រសាសន៍ឱ្យដឹងថា នៅក្នុងរយៈពេលចូលឆ្នាំថ្មីប្រពៃណីចិន-វៀតណាមរយៈពេល៣ថ្ងៃចាប់ពីថ្ងៃទី២៧ដល់២៩ មករា នៅ
ខេត្តព្រះសីហនុ ៖ ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹះស្នា បានមានប្រសាសន៍ឱ្យដឹងថា នៅក្នុងរយៈពេលចូលឆ្នាំថ្មីប្រពៃណីចិន-វៀតណាមរយៈពេល៣ថ្ងៃចាប់ពីថ្ងៃទី២៧ដល់២៩ មករា នៅតាមតំបន់រមណីយដ្ឋាន ភោជនីយដ្ឋានដែលជាកន្លែងកម្សាន្តនានា នៅក្នុងខេត្តព្រះសីហនុ ទទួលបានភ្ញៀវទេសចរជាតិ-អន្តរជាតិមានចំនួន៨៣.០០០នាក់គឺកើន១២,១៦% បើធៀបនឹងរយៈពេល៣ថ្ងៃឆ្នាំ២០១៦ (ឆ្នាំ២០១៦មានប្រមាណ៧៤.០០០នាក់) ។ ដោយថ្ងៃទី២៧ ខែមករា មានភ្ញៀវប្រមាណ១៦.០០០នាក់, ថ្ងៃទី២៨ខែមករា ប្រមាណ២៧.០០០នាក់ និងថ្ងៃទី២៩ ខែមករា ប្រមាណ៤០.០០០នាក់ ដែលតួលេខនេះអាចបញ្ជាក់ឱ្យឃើញថា ចំនួនភ្ញៀវទេសចរជាតិ-អន្តរជាតិមានការកើនឡើងជាងពិធីបុណ្យចូលឆ្នាំប្រពៃណីចិន-វៀតណាមក្នុងឆ្នាំ២០១៦កន្លងមក ។
លោក តាំង សុចិត្រគ្រឹះស្នា បានបញ្ជាក់ឱ្យដឹងទៀតថា ភ្ញៀវទេសចរនៅតែបន្តធ្វើដំណើរចូលមកកម្សាន្តនៅខេត្តព្រះសីហនុជាបន្តបន្ទាប់ ដោយហេតុថា រដូវនេះជារដូវក្តៅ និងចំពេលដែលជាថ្ងៃចុងសប្តាហ៍ហើយក៏ជាជួនពេលដែលបុណ្យចូលឆ្នាំប្រពៃណីចិន-វៀតណាមបានឈានចូលមកដល់ផងដែរ ដែលបង្កលក្ខណៈឱ្យភ្ញៀវទេសចរជាតិ-អន្តរជាតិបានរួមដំណើរជាលក្ខណៈគ្រួសារមកមុជទឹកសមុទ្រ លេងកម្សាន្ត តាមឆ្នេរសមុទ្រ និងនៅតាមតំបន់រមណីយដ្ឋាន បែបធម្មជាតិនៅក្នុងខេត្តព្រះសីហនុ ជាពិសេសគឺបានទទួលទាននូវរសជាតិម្ហូបអាហារសមុទ្រស្រស់ៗដែលមានឱជារសឆ្ងាញ់ និងមានតម្លៃសមរម្យ ។
លោកប្រធានមន្ទីរបានបញ្ជាក់ឱ្យដឹងទៀតថា ការកើនឡើងនៃភ្ញៀវ ដោយសារតែខេត្តព្រះសីហនុ ជាខេត្តទេសចរណ៍ តភ្ជាប់គ្នាជាមួយខេត្តកំពត និងខេត្តកែប ដោយហេតុថា ខណៈដែលភ្ញៀវទេសចរមកសម្រាកលំហែនៅខេត្តព្រះសីហនុរួចមក ពួកគាត់បានបន្តដំណើរទៅកម្សាន្ត នៅឆ្នេរកែប រួចបន្តដំណើរទៅកម្សាន្ត ទស្សនីយភាពបែបធម្មជាតិប្លែកៗ នៅលើរមណីយដ្ឋានភ្នំបូកគោ ក្នុងខេត្តកំពត មុននឹងចាកចេញទៅកាន់លំនៅឋានរៀងៗខ្លួន ។
លោក តាំង សុចិត្រគ្រឹះស្នាបានបញ្ជាក់ជាចុងក្រោយថា ខេត្តព្រះសីហនុ ជាខេត្តដែលមានតំបន់ទេសចរណ៍ធម្មជាតិ មានឆ្នេរខ្សាច់ដ៏សក្បុសពីធម្មជាតិ មានតំបន់ទឹកធ្លាក់ ក្បាលឆាយ តំបន់រមណីយដ្ឋានទឹកធ្លាក់ ថ្មរូង នៅក្នុងស្រុកកំពង់សិលា ហើយអ្វីដែលប្រសើរជាងនេះទៅទៀតនោះ នៅក្នុងលំហសមុទ្រ ខេត្តព្រះសីហនុ សម្បូរទៅដោយប្រជុំកោះ ដូចជាកោះសង្សារ កោះតូច នៅក្នុងសង្កាត់កោះរ៉ុង កោះរ៉ុងសន្លឹម និងមានភូមិជាច្រើនទៀតនៅលើកោះដែលកំពុងតែត្រូវបានអភិវឌ្ឍន៍កែលម្អជារមណីយដ្ឋានទេសចរណ៍ ហើយបច្ចុប្បន្នភ្ញៀវទេសចរជាតិ ទាំងអន្តរជាតិ បានទៅសម្រាកកម្សាន្តនៅលើកោះខាងលើយ៉ាងកុះករ ។
ចំពោះសេវាដឹកជញ្ជូនទៅកាន់ដែនកោះ ប្រកបដោយសុវត្ថិភាព និងមានភាពងាយស្រួលដោយប្រើពេលវេលាតែ៤០ទៅ៥០នាទីប៉ុណ្ណោះ ដោយបានប្រើប្រាស់អូប៊័រខ្នាតធំ និង
មានល្បឿនលឿន ដែលជាការផ្តល់នូវទំនុកចិត្តដល់ភ្ញៀវទេសចរជាតិ-អន្តរជាតិ ។
ដោយឡែកបញ្ហាសន្តិសុខ គឺមានភាពល្អប្រសើរ បើទោះបីជាមានករណីឆក់មួយចំនួនកើតឡើងពិតមែន ប៉ុន្តែត្រូវបានសមត្ថកិច្ចទាំងពីរស្ថាប័នគ្រប់គ្រង និងបង្ក្រាបបានភ្លាមៗ ក្រោមការដឹកនាំ និងបញ្ជាផ្ទាល់ពីលោកឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុនិងលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្ត ៕
ចែករំលែកព័តមាននេះ