ខេត្ដកណ្ដាល ៖ សហព័ន្ធកីឡាប្រដាល់កម្ពុជា កាលពីថ្ងៃទី៣០ មករា បានរៀបចំធ្វើពិធីប្រកាសប្រមូលផ្ដុំកីឡាករប្រដាល់សាកលថ្នាលឱ្យចូលហ្វឹតហាត់ជាផ្លូវការហើយ នៅទីលានហ្វឹកហាត់ភូមិអរុណរះ ដែលមានទីតាំងស្ថិតនៅឃុំរកាខ្ពស់ ស្រុកស្អាង ខេត្តកណ្ដាល ។
លោក យី សុខសាន្ត តំណាងឱ្យអង្គការភូមិអរុណរះ បានឱ្យដឹងថា អង្គការលោកបានចិញ្ចឹមកុមារកំព្រាគ្រប់ប្រភេទមានរហូតដល់ទៅជាង៣០០នាក់ ហើយលោកតែងមានក្ដីស្រមៃចង់បានទីលានហ្វឹកហាត់កីឡាករប្រដាល់មួយជាផ្លូវការ ប៉ុន្តែមិនដឹងថា តើត្រូវធ្វើបែបណានោះទេ ព្រោះតែខ្វះធនធាន ។ ប៉ុន្តែក្រោយមកលោកបានទាក់ទងជាមួយសហព័ន្ធកីឡាប្រដាល់កម្ពុជា និងមានការចុះអនុស្សរណៈជាមួយគ្នាក្នុងការបង្កើតឱ្យមានមជ្ឈមណ្ឌលហ្វឹកហាត់នេះឡើង។
ពេលនេះអ្វីៗបានក្លាយជាការពិតហើយ គឺក្ដីស្រមៃបានក្លាយជាការពិត ។ សមិទ្ធផលទាំងអស់នេះ បើសិនជាគ្មានការជួយជ្រោមជ្រែងពីសហព័ន្ធកីឡាប្រដាល់កម្ពុជាទេ នោះក៏គ្មានពេលនេះដែរ ។
លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានអប់រំកាយ និងកីឡា បានឱ្យដឹងថា ទីលានហ្វឹកហាត់សម្រាប់យុវជនថ្នាលនេះ ពិតជាមានសារសំខាន់ខ្លាំងណាស់ ព្រោះថា វាជាចំណែកមួយយ៉ាងសម្រាប់ប្រមូលផ្ដុំយុវជនថ្នាលឱ្យចូលរួមហ្វឹកហាត់ត្រៀមប្រកួតកីឡាស៊ីហ្គេម ដែលកម្ពុជាទទួលធ្វើជាម្ចាស់ផ្ទះនៅឆ្នាំ២០២៣ ហើយក៏ជាកន្លែងហ្វឹកហាត់ ដើម្បីសុខភាពផងដែរ ។
លោកបានបញ្ជាក់ឱ្យដឹងទៀតថា បច្ចុប្បន្នក្រសួងអប់រំ យុវជន និងកីឡា ក៏ដូចរាជរដ្ឋាភិបាល បាននិងកំពុងតែយកចិត្តទុកដាក់បំផុតទៅលើវិស័យកីឡា មិនតែប៉ុណ្ណោះថែមទាំងមានការមមាញឹកក្នុងការជំរុញធ្វើផែនការមេសម្រាប់ត្រៀមប្រកួតកីឡាស៊ីហ្គេមផងដែរ ។
លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជា បានមានប្រសាសន៍ថា កន្លងមក សហព័ន្ធតែងតែរិះរកគ្រប់មធ្យោបាយធ្វើយ៉ាងណា ដើម្បីស្វែងរកទីតាំងមួយកន្លែងដើម្បីសាងសង់ទីលានហ្វឹកហាត់ឱ្យបានត្រឹមត្រូវ និងមានស្តង់ដាពិតប្រាកដ សម្រាប់បណ្ដុះបណ្ដាលយុវជនថ្នាលបន្តវេន ។ ដូច្នេះពេលនេះយើងមានហើយ គឺជាទីតាំងមួយដែលមានលក្ខណៈស្តង់ដាត្រឹមត្រូវ មានគ្រូចំនួន២នាក់ សម្រាប់បង្ហាត់ដល់ពួកគេដែលសព្វថ្ងៃនេះ មានកីឡាករថ្នាលដែលសហព័ន្ធធ្វើការជ្រើសរើសឱ្យមកហ្វឹកហាត់ជាប្រចាំ និងបានការទទួលស្គាល់ជាផ្លូវការពីក្រសួងអប់រំ យុវជន និងកីឡាចំនួន១២នាក់ ។ ដូច្នេះលោកគិតថា វាជាប្រវត្តិសាស្ត្រហើយសម្រាប់សហព័ន្ធកីឡាប្រដាល់កម្ពុជា ដែលបានបង្កើតឱ្យមានទីតាំងហ្វឹកហាត់មានលក្ខណៈស្តង់ដាបែបនេះឡើង ។
លោកថា សហព័ន្ធកីឡាប្រដាល់កម្ពុជា មានចក្ខុវិស័យច្បាស់លាស់ត្រឹមត្រូវក្នុងការដឹកនាំ ធ្វើយ៉ាងណាជំរុញឱ្យវិស័យកីឡាប្រដាល់មានការរីកចម្រើន ។ ដូច្នេះ សមិទ្ធផលថ្មីមួយនេះបានស្ដែងឱ្យឃើញពីការខិតខំប្រឹងប្រែងយ៉ាងពិតប្រាកដរបស់ថ្នាក់ដឹកនាំសហព័ន្ធកីឡាប្រដាល់កម្ពុជា ។
ទីលានហ្វឹកហាត់នេះ ត្រូវចំណាយថវិកាសាងសង់អស់ជាង៨ម៉ឺនដុល្លារអាមេរិក ។
លោក មិល កាដូ អគ្គលេខាធិការសហព័ន្ធកីឡាប្រដាល់កម្ពុជា បានឱ្យដឹងថា ពេលវេលានៃការហ្វឹកហាត់ចាប់ផ្ដើមធ្វើឡើងពីថ្ងៃចន្ទដល់ថ្ងៃសុក្រ ប៉ុន្តែអាស្រ័យទៅលើក្មេងៗដែលជាប់រវល់រៀនសូត្រផងដែរ ។ បើមានក្មេងណារៀនព្រឹកពួកគេនឹងត្រូវហាត់ពេលល្ងាច ហើយបើក្មេងណាមិនរវល់ គឺហាត់ទាំងព្រឹក ទាំងល្ងាចតែម្ដង ៕
ចែករំលែកព័តមាននេះ