ភាសាអង់គ្លេសប្រើពាក្យថា«Saving» មានន័យថា សន្សំទុក មិនមែនចំណាយរហូតដល់អស់ឡើយ។ សន្សំ គឺពាក់ព័ន្ធនឹងប្រាក់ ពាក្យថាសន្សំប្រាក់ និងសន្សំទ្រព្យសម្បត្តិ។ ពាក្យសន្សំ និងពាក្យកំណាញ់ មិនដូចគ្នាទេ ។ ការសន្សំ ជាការស្គាល់ពីការរក្សាទុកឱ្យល្អ ផ្ទុយពីមនុស្សកំណាញ់ដែលមិនស្គាល់ពីការប្រើប្រាស់ ឬមិនព្រមចាយវាយ ។
មនុស្សជាច្រើនមានសំណួរថា នឹងសន្សំប្រាក់ធ្វើអ្វី ហើយអ្នកខ្លះប្រាប់ថា នឹងយកអ្វីមកសន្សំ ខណៈការចាយវាយក្នុងមួយថ្ងៃៗនៅមិនគ្រប់គ្រាន់ផងនោះ តើនឹងយកប្រាក់ពីណាមកសន្សំទៀត ។ ការស្គាល់ពីសន្សំ គឺស្គាល់ពីការបញ្ឈប់ ស្គាល់ពីភាពគ្រប់គ្រាន់ក្នុងថ្ងៃនេះសម្រាប់ទុកនៅថ្ងៃក្រោយ ហើយការសន្សំនោះ គឺសន្សំមួយថ្ងៃបន្តិច មិនមែននៅពេលត្រូវការចាយប្រាក់ ទើបធ្វើការរហូតអស់កម្លាំង ឬធ្វើការធ្ងន់ៗដើម្បីទទួលបានប្រាក់ច្រើនឡើយ ។
មនុស្សមួយចំនួនគិតថា ខ្លួនមានលទ្ធភាព ប្រសិនបើត្រូវការប្រាក់ គឺអាចធ្វើការងារពិសេស ឬបន្ថែមម៉ោង នឹងទទួលបានប្រាក់ច្រើនហើយ ប៉ុន្តែការមានប្រាក់ច្រើន និងការសន្សំប្រាក់នោះមិនដូចគ្នាទេ ។ ការសន្សំចាត់ទុកជាទស្សនៈនៃការប្រមូលផ្តុំ ផ្ទុយពីសង្គមសព្វថ្ងៃ ដែលមានតែនាំទៅរកការចាយវាយទៅលើគ្រឿងបរិភោគ ទំនិញហូរហៀរ រហូតដល់អ្នកទាំងនោះក្លាយជាអ្នកសម្ភារនិយម ។ បច្ចុប្បន្ន មិនសូវជាមានអ្នកចាប់អារម្មណ៍លើការសន្សំប្រាក់ទេ គឺមានតែរកឱកាសចាយច្រើនជាង ។
ការសន្សំប្រាក់មានប្រយោជន៍យ៉ាងដូចជា ៖
១-មានប្រាក់ទុកចាយវាយនាពេលអនាគត និងពេលកើតហេតុបន្ទាន់ដូចជា ឈឺថ្កាត់ បាត់បង់ការងារ ឬកើតគ្រោះថ្នាក់ជាយថាហេតុ ។
២-ប្រមូលទុកសម្រាប់ថ្លៃចាយវាយជាប្រាក់ដុំ ដូចជា ប្រាក់ធានារ៉ាប់រងអាយុជីវិតជាដើម ។
៣-ត្រៀមលើការចាយវាយចាំបាច់តាមឱកាសដូចជា ការជួសជុលលំនៅឋាន ជួសជុលរថយន្ត និងការទិញគ្រឿងសង្ហារិមផ្សេងៗ ។
៤-សម្រាប់ការកម្សាន្តរយៈពេលខ្លី ដូចជា ទិញទូរទស្សន៍ ឬដំណើរកម្សាន្ត ។
៥-សម្រាប់ការវិនិយោគរយៈពេលយូរ ដូចជា ការទិញលំនៅឋាន ទិញដីធ្លីជាដើម ។
យើងឃើញថា ទាំង៥ចំណុចនេះជាការចំណាយដែលមិនបានកើតឡើងប្រចាំថ្ងៃនោះទេ ប៉ុន្តែជាការចំណាយតាមឱកាស និងពេលវេលាផ្សេងគ្នា ។ បើសិនជាមិនស្គាល់ពីការសន្សំក្នុងថ្ងៃនេះ ហើយដល់ពេលត្រូវចាយវាយដូចការរៀបរាប់ខាងលើ តើនឹងយកប្រាក់មកពីណា? បើអ្នកគិតថានឹងខ្ចីប្រាក់ គឺមិនមែនជាគំនិតល្អប៉ុន្មានទេ ព្រោះភាគច្រើន វាមិនបង្កឱ្យកើតប្រាក់ចំណូលនាពេលអនាគតឡើយ ថែមទាំងមានភារកិច្ចបង់ការប្រាក់ទៀត ។ ដូច្នេះ គួរតែសន្សំប្រចាំថ្ងៃ ថ្ងៃមួយវានឹងច្រើន និងក្លាយជាសាច់ប្រាក់ដុំ។ តិចនិក គឺកុំព្យាយាមសន្សំក្នុងចំនួនប្រាក់ច្រើន ព្រោះអាចប៉ះពាល់ដល់ការចំណាយផ្សេងៗ ដែលធ្វើឱ្យការសន្សំនោះមិនអាចអនុវត្តទៅបានទៀងទាត់ ហើយចុងក្រោយ ក៏ត្រូវបញ្ឈប់ ។
ផលប្រយោជន៍មួយទៀតនៃការសន្សំប្រាក់ដែលមនុស្សភាគច្រើនគិតមិនដល់ គឺការសន្សំសម្រាប់រង់ចាំឱកាស ។ បច្ចុប្បន្ន ប្រាក់អាចចូលទៅធ្វើការនៅគ្រប់ជ្រុងនៃសកលលោក តាមរយៈប្រព័ន្ធអនឡាញ ។ បើថ្ងៃមួយ ការវិនិយោគកើតឡើងមក ហើយយើងចង់ចាប់យកឱកាសនោះ ប៉ុន្តែគ្មានសាច់ប្រាក់ដុំ ឬប្រាក់សន្សំទុក គឺអាចយឺតពេលទៅហើយ ។ ផ្ទុយទៅវិញ ការសន្សំប្រាក់ជារឿយៗ ហើយនៅពេលឱកាសមកដល់ នឹងអាចយកប្រាក់នោះទៅវិនិយោគបានភ្លាមៗ ។
អនាគតមិនប្រាកដប្រជា ការមានប្រាក់សន្សំទុក គឺជាអ្វីដែលយើងត្រូវធ្វើ។ ប្រយោជន៍របស់ការសន្សំប្រាក់មានច្រើន ទាំងភាពចាំបាច់លើការចាយវាយបន្ទាន់ និងផ្នែកវិនិយោគ ។ ការសន្សំប្រាក់ គឺដូចនឹងការសន្សំកម្លាំងដើម្បីបំពេញការងារក្នុងការរស់នៅដែរ។ ការសន្សំ ជាការស្គាល់ពីការប្រើប្រាស់ ស្គាល់ការបញ្ឈប់ មិនមែនជាមនុស្សស្វិតមិនចំណាយប្រាក់ ហើយក៏មិនចាយវាយរហូតទាល់តែអស់គ្មានសល់នោះទេ។ ចូរសន្សំប្រាក់ចាប់ពីថ្ងៃនេះ ដើម្បីប្រយោជន៍ទៅថ្ងៃមុខ ៕
ចែករំលែកព័តមាននេះ