រាជធានីភ្នំពេញ ៖ មន្ត្រីជាន់ខ្ពស់នៃក្រសួងសាធារណការ និងដឹកជញ្ជូន បានឲ្យដឹងថា បន្ទាប់ពីការដាក់ឲ្យប្រើប្រាស់សាកល្បងនូវប្រព័ន្ធ ស្វ័យប្រវត្តិកម្មចុះបញ្ជីយានជំនិះ ក្រសួងរកចំណូលបានរាប់ពាន់លានរៀលចាក់ចូលទៅក្នុងថវិកាជាតិ ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ក្នុងពិធីដាក់ឲ្យប្រើប្រាស់ជាផ្លូវការនូវប្រព័ន្ធស្វ័យប្រវត្តិកម្មចុះបញ្ជីយានជំនិះ កាលពីថ្ងៃទី៣០ មករា នៅសណ្ឋាគារអាំងទែរកុងទីណង់តាល់ថា ៖ « តាំងពីយើងដាក់ឲ្យប្រើប្រាស់ប្រព័ន្ធស្វ័យប្រវត្តិកម្មនេះកាលពីខែសីហា ឆ្នាំ២០១៦មក យើងចុះបញ្ជីបានជាង១,៥ម៉ឺនគ្រឿងតាមប្រព័ន្ធអនឡាញ ហើយរកបានថវិកាចូលជាតិជាង៨ពាន់លានរៀល » ។
លោកបញ្ជាក់ថា ៖ « ការដាក់ឱ្យដំណើរការប្រព័ន្ធនេះ គឺដើម្បីឆ្លើយតបនឹងតម្រូវការរបស់បងប្អូនប្រជាពលរដ្ឋយើងលើសេវាចាំបាច់ ដែលប្រមុខរាជរដ្ឋាភិបាលតែងមានប្រសាសន៍ថា យើងត្រូវតែធ្វើកិច្ចការផ្តល់សេវាសាធារណៈ សេវាចាំបាច់ជូនប្រជាពលរដ្ឋឱ្យមានប្រសិទ្ធភាព តម្លាភាព និងធ្វើឱ្យបានលឿន។ ការដាក់ឱ្យដំណើរការនូវប្រព័ន្ធនេះ បានកាត់បន្ថយជំនួបរវាងអ្នកផ្តល់សេវា និងអ្នកទទួលសេវា គឺយើងអាចកាត់បន្ថយចំណាយក្រៅផ្លូវការបាន » ។
លោកបន្តថា ៖ « បើយើងធ្វើប្រព័ន្ធចុះបញ្ជីដោយដៃ យើងមិនអាចធ្វើបានលឿនទេ តែបើយើងរៀបចំប្រព័ន្ធនេះបានហើយ យើងតភ្ជាប់ប្រព័ន្ធយើងទៅហាងលក់ម៉ូតូ ហាងលក់រថយន្ត និងភ្នាក់ងាររបស់យើងអាចផ្តល់សេវានេះបានទាន់ពេលវេលា ផ្តល់ប័ណ្ណសម្គាល់យានជំនិះ ក៏ដូចជាស្លាកលេខម៉ូតូ មិនបាច់ទៅរង់ចាំរាប់ថ្ងៃ រាប់ខែតទៅទៀតទេ» ។
យោងតាមសេចក្តីប្រកាសព័ត៌មានរបស់ក្រសួងបង្ហាញថា គិតមកដល់ឆ្នាំ២០១៦កន្លងមក មានទោចក្រក្រយានយន្តដែលបានចុះបញ្ជីនៅក្រសួង ជាង៣,៧លានគ្រឿង ហើយដើម្បីឆ្លើយតបនឹងកំណើនបរិមាណរថយន្តនិងម៉ូតូ កំណើនសេវាចុះបញ្ជីយានជំនិះ កំណើនត្រួតពិនិត្យលក្ខណៈបច្ចេកទេសយានជំនិះ កំណើនសេវាប័ណ្ណបើកបរយានយន្ត រួមទាំងសេវាផ្សេងៗពាក់ព័ន្ធជាច្រើន តម្រូវឱ្យក្រសួងពិចារណាអំពីការកែទម្រង់របៀបផ្តល់សេវាជូនប្រជាពលរដ្ឋ ស្របតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
ចែករំលែកព័តមាននេះ