រាជធានីភ្នំពេញ ៖ ក្នុងមួយឆ្នាំ កម្ពុជាបាននាំចូលអគ្គិសនីពីប្រទេសជិតខាង គិតជាទឹកប្រាក់ប្រមាណ២០០លានដុល្លារអាមេរិកដើម្បីផ្គត់ផ្គង់បន្ថែមក្នុងការប្រើប្រាស់ ។ នេះបើយោងតាមប្រសាសន៍របស់លោកបណ្ឌិត ទី នរិន្ទ ប្រធានអាជ្ញាធរអគ្គិសនីកម្ពុជា ថ្លែងនៅក្នុងពិធីបូកសរុបការងារប្រចាំឆ្នាំ នៅសណ្ឋាគារស៊ូហ្វីតែល ភ្នំពេញភូគីត្រា កាលពីថ្ងៃទី៣០ មករា ។
លោកថ្លែងថា ៖«បច្ចុប្បន្ន កម្ពុជាយើងបាននាំចូលភ្លើងពីប្រទេសថៃ ឡាវ និងវៀតណាម ក្នុងនោះវៀតណាម យើងនាំចូលច្រើនជាងគេ បន្ទាប់មកប្រទេសថៃ និងឡាវ បើគិតជាទឹកប្រាក់ប្រមាណ២០០លានដុល្លារអាមេរិក » ។
លោកបន្តថា ការនាំចូលអគ្គិសនីមកផ្គត់ផ្គង់នៅក្នុងប្រទេសកម្ពុជាពីប្រទេសជិតខាង បានកាត់បន្ថយបន្តិចម្ដងៗ ហើយបើគិតត្រឹមដំណាច់ឆ្នាំ២០១៦ សមាមាត្រនៃការនាំចូលអគ្គិសនីពីប្រទេសជិតខាងបានថយចុះពី២៥,៧៣% មកត្រឹម២២,០៦% ខណៈប្រភពថាមពលដែលប្រើប្រាស់បានកើនឡើងរហូតដល់១៩,៧៩% ។ លោកមានប្រសាសន៍ថា ៖ « អានុភាពប្រភពអគ្គិសនីក្នុងស្រុកនៅឆ្នាំ២០១៦ មានចំនួន១.៥៩២មេហ្គាវ៉ាត់ បើគិតជាស្តង់ដាថ្លៃមធ្យមប្រមាណ២លានដុល្លារអាមេរិកក្នុង១មេហ្គាវ៉ាត់ ។ ដូចនេះ ទំហំវិនិយោគលើប្រភពអគ្គិសនីក្នុងស្រុកទាំងអស់មានចំនួន៣.១៨៤លានដុល្លារអាមេរិក » ។
លោកបន្ថែមថា នៅឆ្នាំ២០១៧ អគ្គិសនីកម្ពុជាគ្រោងនឹងដាក់ឱ្យដំណើរការរោងចក្រធ្យូងថ្មមួយទំហំ១៣៥មេហ្គាវ៉ាត់បន្ថែមទៀត ដើម្បីទប់ទល់នឹងកំណើនសេចក្តីត្រូវការប្រើប្រាស់បន្ថែម និងការនាំចូលពីប្រទេសជិតខាងឱ្យមកនៅត្រឹម២០% ។ លោកនិយាយថា ៖ « នៅលើពិភពលោកយើងនេះ មិនមានប្រទេសណាមួយដែលមិននាំចូលអគ្គិសនីនោះទេ ព្រោះនេះគឺជាការដោះដូរពាណិជ្ជកម្មរវាងប្រទេសនិងប្រទេស ហើយក៏អាចជួយបំពេញបន្ថែមនូវចន្លោះខ្វះខាតឱ្យគ្នាទៅវិញទៅមកបានផងដែរ។ ជាឧទាហរណ៍ ប្រទេសថៃមានការប្រើប្រាស់អគ្គិសនីច្រើននៅពេលយប់ ហើយកម្ពុជាត្រូវការអគ្គិសនីច្រើននៅពេលថ្ងៃ ។ ដូចនេះ យើងអាចបញ្ជូនឱ្យថៃនៅពេលយប់ ហើយថៃអាចបញ្ជូនឱ្យយើងវិញនៅពេលថ្ងៃ » ។
ទាក់ទងនឹងការផ្គត់ផ្គង់អគ្គិសនីនេះដែរ លោកបណ្ឌិត ទី នរិន្ទ បញ្ជាក់ថា អាជ្ញាធរអគ្គិសនីកម្ពុជា នឹងខិតខំធ្វើយ៉ាងណា តបណ្ដាញអគ្គិសនីឱ្យបានគ្រប់ភូមិនៅឆ្នាំ២០១៩ ឬ២០២០ខាងមុខ ហើយក៏សង្ឃឹមថា គម្រោងនេះនឹងសម្រេចមុនផែនការ ព្រោះថាសព្វថ្ងៃនេះ ការតបណ្ដាញអគ្គិសនីបានប្រមាណជាង៧៥%ហើយ។ ដូចនេះ នៅសល់តែជាង២៤%ទៀត នឹងគ្រប់ភូមិទាំងអស់នៅក្នុងព្រះរាជាណាចក្រកម្ពុជា ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ដែលបានចូលរួមក្នុងពិធីបើកសន្និបាតនៅពេលនោះ បានមានប្រសាសន៍ថា ដើម្បីឱ្យសម្រេចគោលដៅនៃការអភិវឌ្ឍអគ្គិសនីភាវូបនីយកម្ម គ្រប់ភូមិទាំងអស់នឹងមានអគ្គិសនីប្រើប្រាស់ រាជរដ្ឋាភិបាលកំពុងជំរុញការសាងសង់គម្រោងបណ្ដាញជាតិបន្ថែមទៀត គឺធ្វើយ៉ាងណា ឱ្យការបញ្ជូនប្រភពអគ្គិសនីពីបណ្ដាញជាតិទៅកាន់ខេត្តទាំងអស់របស់កម្ពុជាឱ្យបាននៅឆ្នាំ២០២០ ។
លោកបន្តថា ៖ « ការផ្គត់ផ្គង់អគ្គិសនីរហូតមកដល់ចុងឆ្នាំ២០១៦ យើងបានផ្ដល់សម្បទានឱ្យអ្នកកាន់អាជ្ញាប័ណ្ណទាំងរដ្ឋ និងឯកជនធ្វើការវិនិយោគរៀបចំការផ្គត់ផ្គង់អគ្គិសនីចំនួន១៣.៨០៣ភូមិ ត្រូវជា៩៧,៤២%នៃចំនួនភូមិ សរុបទូទាំងប្រទេសរួចហើយ ក្នុងនោះអ្នកវិនិយោគបានសង់បណ្ដាញអគ្គិសនីឱ្យភូមិចំនួន១០.៥៨៩ភូមិ និងកំពុងសង់បណ្ដាញអគ្គិសនីជាបន្តបន្ទាប់ទៀត » ៕
ចែករំលែកព័តមាននេះ