រាជធានីភ្នំពេញ ៖ សេចក្តីរាយការណ៍ឱ្យដឹងថា កម្មករលាយបេតុងម្នាក់ស្លាប់ និងម្នាក់ទៀតបានរងរបួសធ្ងន់ ក្នុងហេតុការណ៍ឆក់ខ្សែភ្លើង បណ្តាលឱ្យឆាបឆេះជនរងគ្រោះម្នាក់ឡើងខ្លោចពេញខ្លួន ខណៈកំពុងធ្វើការចាក់បេតុងនៅសំណង់ផ្ទះល្វែងមួយកន្លែង កាលពីវេលាម៉ោង០៩ និង១៥នាទីព្រឹកថ្ងៃទី៣១ មករា នេះ ស្ថិតតាមបណ្តោយផ្លូវអូរដឹមកប់ស្រូវ ក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។
ប្រភពឱ្យដឹងថា ជនរងគ្រោះដែលស្លាប់ ឈ្មោះហ៊ិន សាវី អាយុ២៤ឆ្នាំ (ឆេះចង់ឆ្អិនខ្លួន) ជាកម្មករលាយបេតុងជិះតាមឡាន មានស្រុកកំណើតនៅខេត្តតាកែវ និងអ្នករងរបួស មិនត្រូវបានអត្តសញ្ញាណទេ ។
មុនពេលកើតហេតុ ជនរងគ្រោះទាំង២នាក់ជាកម្មករនោះ បានជិះតាមរថយន្តបូមបេតុងស៊ីម៉ង់ត៍ មានពាក់ស្លាកលេខភ្នំពេញ 5A-1154 ។ លុះមកដល់កន្លែង ដែលជាសំណង់ផ្ទះល្វែងនោះ ក៏បានរៀបចំតទុយោដែកបូមបេតុងដាក់កន្លែងសាងសង់នោះ ទើបតែបូមបានម្តង ស្រាប់តែទុយោដែកប៉ះជាមួយខ្សែកាប ក៏បណ្តាលឱ្យផ្ទុះឆក់និងឆាបឆេះខ្លួនជនរងគ្រោះតែម្តង ដែលហេតុការណ៍នេះ បង្កការភ្ញាក់ផ្អើលយ៉ាងខ្លាំង ។
ចែករំលែកព័តមាននេះ