ខេត្ដមណ្ឌលគិរី ៖ ត្រឹមរយៈពេលពីរថ្ងៃ គឺថ្ងៃសៅរ៍ និងថ្ងៃអាទិត្យចុងខែមករា ដែលជារយៈពេលនៃពិធីបុណ្យចូលឆ្នាំចិន បានធ្វើឲ្យផ្ទះសំណាក់ សណ្ឋាគារ និងរមណីយដ្ឋានទាំងអស់ ក្នុងខេត្តមណ្ឌលគិរី មិនអាចផ្គត់ផ្គង់បន្ទប់ស្នាក់នៅដល់អ្នកទេសចរបានទេ ព្រោះភ្ញៀវជាង១ម៉ឺននាក់បានសម្រុកមកលេងក្នុងថ្ងៃតែមួយ ខណៈភ្ញៀវទេសចរមួយចំនួនបានបង្ខំចិត្តបន្តដំណើរបង្ហួសទៅខេត្តរតនគិរីវិញ ដើម្បីរកបន្ទប់សម្រាប់ការស្នាក់អាស្រ័យ ។
គេសង្កេតឃើញថា នៅតំបន់ទឹកជ្រោះប៊ូស្រា សូម្បីតែកន្លែងចតយានយន្តក៏ពេញណែនតាន់តាប់ មិនមានសល់កន្លែងទំនេរសម្រាប់ចតរថយន្តឡើយ ។ តែទោះជាយ៉ាងណាភ្ញៀវទេសចរដែលបានទៅកម្សាន្តនាឱកាសនោះ នៅតែមានស្នាមញញឹមរីករាយ ព្រោះបានជួបជុំក្រុមគ្រួសារ ទទួលទានអាហារនៅមុខទឹកជ្រោះ និងងូតទឹកលេងដែលមានភាពត្រជាក់ស្ទើរញ័រថ្គាម ។
ក្រៅពីតំបន់ទឹកជ្រោះប៊ូស្រា នៅមានរមណីយដ្ឋានជាច្រើនដែលបានទទួលស្វាគមន៍ភ្ញៀវទេសចរណ៍ មិនឲ្យខកបំណងដូចជា ភ្នំដោះក្រមុំ ទឹកជ្រោះសែនមនោរម្យ ចម្ការកាហ្វេ ចម្ការស្រល់ សមុទ្រឈើ ភូមិវប្បធម៌ជនជាតិដើមភាគតិច វាលស្មៅអណ្តូងស្នេហ៍…។ អ្វីដែលកាន់តែធ្វើឲ្យអ្នកទេសចរបំភ្លេចមិនបាននោះគឺអាកាសធាតុដ៏ត្រជាក់ ខុសប្លែកពីបណ្តាខេត្តនានា ដែលបានធ្វើឲ្យពួកគាត់កាន់តែទទួលបានបទពិសោធន៍ដ៏អស្ចារ្យក្នុងដំណើរកម្សាន្តនាតំបន់ភូមិភាគឦសានមួយនេះ ។
មន្ត្រីមន្ទីរទេសចរណ៍បានឲ្យដឹងថា ដោយសារមានភ្ញៀវច្រើនពេកធ្វើឲ្យផ្ទះសំណាក់ សណ្ឋាគារ ភោជនីដ្ឋាន និងអាហារដ្ឋាន នានាក្នុងខេត្ត មិនអាចបំពេញតម្រូវការគ្រប់គ្រាន់សម្រាប់ភ្ញៀវឡើយ ។ ប៉ុន្តែកត្តាទាំងនេះមិនបានធ្វើឲ្យភ្ញៀវបោះបង់ការដើរកម្សាន្តតាមរមណីយដ្ឋាននៅខេត្តមណ្ឌលគិរីឡើយ ។ មន្ត្រីដដែលបន្តថា បើទោះជាមានភ្ញៀវដើរលេងច្រើនយ៉ាងណា តម្លៃម្ហូបអាហារនិងកន្លែងស្នាក់នៅ មិនមានអ្នកដំឡើងថ្លៃហួសហេតុទេ ពោលគឺម្ចាស់ផ្ទះសំណាក់ សណគារ ភោជនីយដ្ឋាន និងអាហារដ្ឋាន បានឡើងថ្លៃបន្តិចបន្តួចប៉ុណ្ណោះ ព្រោះក្នុងថ្ងៃបុណ្យទាន ភ្ញៀវមកលេងជាលក្ខណៈគ្រួសារ ធ្វើឲ្យការប្រើប្រាស់នានាដូចជា ទឹក ភ្លើង ជាដើមអស់ច្រើនជាងថ្ងៃធម្មតា ។
ចំពោះបញ្ហាសុវត្ថិភាព រហូតមកដល់ព្រឹកថ្ងៃទី៣០ មករា មិនទាន់មានរបាយការណ៍ណាមួយបញ្ជាក់ថា បានធ្វើឲ្យមានការប៉ះពាល់ដល់ភ្ញៀវទេសចរ ឬអ្នករស់នៅក្នុងតំបន់ឡើយ ត្បិតគេឃើញមានកងកម្លាំងប្រដាប់អាវុធគ្រប់ប្រភេទ បានដាក់ពង្រាយតាមគោលដៅងាយរងគ្រោះ ដើម្បីបង្ការនូវគ្រោះថ្នាក់ជាយថាហេតុណាមួយ៕
ចែករំលែកព័តមាននេះ