សម្តេចតេជោ ហ៊ុន សែន ៖ ទោសលោក ហុង សុខហួរនិងលោកអ៊ុំ សំអាន ជាទោសធំ
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន បានថ្លែងនៅក្នុងសម័យប្រជុំវិសាមញ្ញរដ្ឋសភានាព្រឹកថ្ងៃទី៣១ មករា ២០១៧ ថា
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន បានថ្លែងនៅក្នុងសម័យប្រជុំវិសាមញ្ញរដ្ឋសភានាព្រឹកថ្ងៃទី៣១ មករា ២០១៧ ថា «ទោសលោក ហុង សុខហួរ និង លោក អ៊ុំ សំអាន ជាទោសធំ មិនអាចអត់ឱនឲ្យបានទេ ។
សមាជិកព្រឹទ្ធសភាគណបក្ស សម រង្ស៊ី គឺលោក ហុង សុខហួរ ត្រូវបានសាលាដំបូងរាជធានីភ្នំពេញ ចេញដីកាឃុំខ្លួនកាលពីថ្ងៃទី១៤ សីហា ២០១៥ ពាក់ព័ន្ឋនឹងការលួចក្លែងឯកសារសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩ ។ ក្រោយមកចៅក្រមសាលាដំបូងរាជធានីភ្នំពេញ សម្រេចផ្ដន្ទាទោសដាក់ពន្ធនាគារចំនួន ៧ឆ្នាំ ក្រោមបទចោទក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ដែលត្រូវនឹងមាត្រា៦២៩ មាត្រា៦៣០ និងមាត្រា៤៩៥ នៃក្រមព្រហ្មទណ្ឌ ពាក់ព័ន្ឋនឹងបញ្ហាព្រំដែនកម្ពុជា-វៀតណាម ។
ចំណែកតំណាងរាស្ត្រគណបក្សសង្គ្រោះជាតិមណ្ឌលសៀមរាប លោក អ៊ុំ សំអាន ត្រូវសមត្ថកិច្ចចាប់ខ្លួនកាលពីយប់រំលងអធ្រាត្រឈានចូលថ្ងៃទី១១ មេសា ២០១៦ នៅក្នុងខេត្តសៀមរាប ដោយចោទថាបានប្រព្រឹត្តបទល្មើសជាក់ស្តែងទាក់ទិននឹងបង្ហោះឯកសារផែនទីនានាតាមបណ្តាញសង្គមនិង ចោទរដ្ឋាភិបាលថាបានប្រើប្រាស់ផែនទីក្លែងក្លាយ បោះបង្គោលព្រំដែនជាមួយវៀតណាម ធ្វើឲ្យខ្មែរខាត់បង់ទឹកដីទៅប្រទេសជិតខាង។
ក្រោយមកសាលាដំបូងរាជធានីភ្នំពេញសម្រេចឲ្យឃុំខ្លួនតំណាងរាស្ត្ររូបនោះបណ្តោះអាសន្ននៅពន្ធនាគារព្រៃ.ស កាលពីថ្ងៃទី១២ មេសា ២០១៦ ចោទពីបទញុះញង់ បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឲ្យមានការរើសអើងតាមមាត្រា៤៩៥និង៤៩៦នៃក្រមព្រហ្មទណ្ឌ ដែលប្រព្រឹត្តនៅរាជធានីភ្នំពេញកាលពីអំឡុងឆ្នាំ២០១៥ និងរហូតដល់ថ្ងៃទី១០ មេសា ២០១៦៕
ចែករំលែកព័តមាននេះ