យប់មិញអ្នកណាគោះទ្វារ ! តាមទាន់មានសហាយ៣លើកហើយ
រាជធានីភ្នំពេញ ៖ បុរសម្នាក់ត្រូវបានប្រជាការសង្កាត់ច្រាំងចំរេះទី១ឃាត់ខ្លួនកាលពីវេលាម៉ោង១ និង១៥នាទីរសៀល ថ្ងៃទី៣០ ខែមករា ឆ្នាំ២០១៧ នៅបន្ទប់ជួល …
រាជធានីភ្នំពេញ ៖ បុរសម្នាក់ត្រូវបានប្រជាការសង្កាត់ច្រាំងចំរេះទី១ឃាត់ខ្លួនកាលពីវេលាម៉ោង១ និង១៥នាទីរសៀល ថ្ងៃទី៣០ ខែមករា ឆ្នាំ២០១៧ នៅបន្ទប់ជួល ស្ថិតក្នុងភូមិទី២ សង្កាត់ច្រាំងចំរេះទី១ ខណ្ឌឫស្សីកែវ បន្ទាប់ពីបុរសរូបនោះបានទាស់គ្នាជាមួយប្រពន្ធដោយចោទប្រពន្ធថាលួចមានសហាយស្មន់ ហើយគំរាមដុតបន្ទប់ជួលចោល ។
បុរសដែលត្រូវឃាត់ខ្លួនឈ្មោះ ឃីម នី អាយុ២៥ឆ្នាំ មុខរបរកម្មករលីសែងត្រី មានស្រុកកំណើតនៅភូមិត្រពាំងខ្យងឃុំអង្គភ្នំតូច ស្រុកអង្គជ័យ ខេត្តកំពត ចំណែកប្រពន្ធឈ្មោះ សុភារី អាយុ៣៨ឆ្នាំ ជាស្ត្រីមេម៉ាយប្តីលែង ហើយមករស់នៅជាមួយបុរសខាងលើជាប្តីក្រោយនៅផ្ទះជួលខាងលើ ។
ប្រភពព័ត៌មានបានឱ្យដឹងថា មុនពេលកើតហេតុ បន្ទាប់ពីហូបបាយរូច ប្រពន្ធបានប្រើប្តីឱ្យទៅទិញទឹកកក តែប្តីមិនព្រមទៅក៏កើតជាទំនាស់គ្នា ។ ខណៈនោះប្តីដែលកន្លងមកធ្លាប់តាមទាន់ និងដឹងថា ប្រពន្ធមានសហាយ ក៏បាននិយាយថា យប់មិញអ្នកណាមកគោះទ្វារបន្ទប់ជួល ។ នៅពេលដែលនិយាយបែបនេះ ស្ត្រីជាប្រពន្ធក៏បានខឹងប្តីយ៉ាងខ្លាំង ធ្វើឲ្យការទាស់គ្នាកាន់តែខ្លាំងឡើងៗ ភ្លាមៗបុរសជាប្តីបានស្ទុះទៅវាយប្រពន្ធ១ដៃ ទាត់១ជើង រួចរត់ទៅយកសាំងកន្លះលិត្រដែលគេដាក់លក់នៅក្បែនោះគំរាមរកដុតបន្ទប់ជួលចោល តែមិនទាន់បានដុតផងត្រូវប្រជាការពារចុះទៅអន្តរាគមន៍ឃាត់ខ្លួនតែម្តង ។
ប្រភពព័ត៌មានឲ្យដឹងទៀតថា ២នាក់នេះបានស្រឡាញ់ និងរស់នៅជាមួយគ្នាជាប្តីប្រពន្ធរយៈពេលប្រមាណ៧ខែមកហើយ ។ ចាប់តាំងពីចាប់ដៃគ្នាជាប្តីប្រពន្ធមកគឺតែងតែឈ្លោះគ្នារហូត ដោយសាតែស្ត្រីជាប្រពន្ធលួចមានសាហាយទាក់ទងជាមួយប្រុសថ្មី ។
បើតាមបុរសជាប្តីបានឲ្យដឹងថា គាត់បានតាមទាន់ប្រពន្ធមានសហាយចំនួន៣លើកមកហើយ ៕
ចែករំលែកព័តមាននេះ