រាជធានីភ្នំពេញ ៖ ប្រធានអនុសាខាកាកបាទក្រហមកម្ពុជាខណ្ឌមានជ័យ លោក ឌី រ័ត្នខេមរុណ បានមានប្រសាសន៍ថា កម្លាំងប្រជាការពារទាំងថ្នាក់សង្កាត់ និងខណ្ឌ ក៏ជា …
រាជធានីភ្នំពេញ ៖ ប្រធានអនុសាខាកាកបាទក្រហមកម្ពុជាខណ្ឌមានជ័យ លោក ឌី រ័ត្នខេមរុណ បានមានប្រសាសន៍ថា កម្លាំងប្រជាការពារទាំងថ្នាក់សង្កាត់ និងខណ្ឌ ក៏ជាប្រជាពលរដ្ឋក្រីក្រដូចប្រជាទូទៅផងដែរ ។ លោកថ្លែងបែបនេះនៅក្នុងពិធីចែកអំណោយមនុស្សធម៌ជូនដល់ប្រជាការពារចំនួន៥០នាក់នៅក្នុងមូលដ្ឋានខណ្ឌ ដែលលោកគិតថា ពួកគេក៏សុទ្ធតែជាប្រជាពលរដ្ឋខ្វះខាត ទាំងទ្រព្យសម្បត្តិ និងលុយកាក់ក្នុងការរស់នៅប្រចាំថ្ងៃ ដូចពលរដ្ឋទូទៅមួយចំនួន ដែលជួបការលំបាកផងដែរ បើទោះបីជាបច្ចុប្បន្នពួកគេជាកងកម្លាំងរបស់រដ្ឋក៏ដោយ ។
លោក ឌី រ័ត្នខេមរុណ អភិបាលរងខណ្ឌ និងជាប្រធានអនុសាខាកាកកបាទក្រហមកម្ពុជាប្រចាំខណ្ឌ បានមានប្រសាសន៍ឲ្យដឹងថា កម្លាំងប្រជាការពារ គឺជាកម្លាំងស្នូលដ៏សំខាន់សម្រាប់អាជ្ញាធរក្នុងមូលដ្ឋានខណ្ឌ ដែលពួកគេដើរតួយ៉ាងសំខាន់ក្នុងការចូលរួមសហការគ្រប់សកម្មរបស់អាជ្ញាធរ មិនថា កិច្ចការងារសន្តិសុខ មនុស្សធម៌ ឬ ការងាររដ្ឋបាលផ្សេងៗ ដូចជាការជួយសម្រួលចរាចរណ៍កកស្ទះ រៀបចំសណ្តាប់ធ្នាប់ក្នុងមូលដ្ឋានជាដើម គឺតែងតែមានវត្តរបស់ពួកគេនៅជាមួយសកម្មភាពទាំងនេះជានិច្ច ។ លោកប្រធានអនុសាខា បន្ថែមថា សកម្មភាពជាច្រើនដែលពួកគាត់តែងតែចូលរួមអនុវត្តជាមួយអាជ្ញាធរ ពិសេសកិច្ចការងារមនុស្សធម៌ នាំយកអំណោយចែកជូនពលរដ្ឋក្រីក្រក្នុងមូលដ្ឋានរបស់ខ្លួន ប៉ុន្តែបើយើងក្រឡេកត្រឡប់មកមើលពីជីវភាពរបស់ពួកគាត់វិញ គឺមិនលើសខ្វះគ្នាពីអ្នកដែលពួកគាត់ចូលរួមយកអំណោយទៅចែកជូននោះឡើយ ។
លោកមានប្រសាសន៍បន្ថែមថា ការចែកអំណោយជូនកម្លាំងប្រជាការពារនៅពេលនេះ គឺមិនមានជាប់ពាក់ព័ន្ធទៅនឹងនិន្នាការនយោបាយ ប្រកាន់បក្សពួកឡើយ គឺចែកជូនដោយមើលឃើញនូវការលំបាករបស់កងកម្លាំង ព្រោះពួកគាត់ក៏ជាប្រជាជនក្រីក្រដូចពលរដ្ឋក្រីក្រទូទៅផ្សេងៗផងដែរ ។
សូមបញ្ជាក់ថា អំណោយដែលត្រូវបានចែកជូនក្នុងម្នាក់ៗទទួលបាន អង្ករ១ប៉ាវ ទម្ងន់៣០គីឡូក្រាម, មី១កេស និងថវិកាចំនួន២ម៉ឺនរៀល ៕
ចែករំលែកព័តមាននេះ