ខេត្តកណ្ដាល ៖ យុវជនម្នាក់ត្រូវបាននគរបាលស្រុកកោះធំចាប់ខ្លួន បន្ទាប់ពីយុវជនរូបនោះបានយកដំបងទៅវាយគូទំនាស់ តែបែរជាទៅត្រូវមិត្តភក្ដិរបស់ខ្លួនចំគុម្ពត្រចៀកបណ្ដាលឲ្យសន្លប់ ហើយបានស្លាប់ពេលបញ្ជូនទៅព្យាលនៅមន្ទីពេទ្យ ។ ហេតុការណ៍នេះកើតឡើងកាលពីវេលាម៉ោង៤ និង៤០នាទីរសៀល ថ្ងៃទី២៩ ខែមករា ឆ្នាំ២០១៧ នៅចំណុចក្នុងបរិវេណសាលាបឋមសិក្សាព្រែកស្បូវ ស្ថិតក្នុងភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល ។
លោក ឈឿន ប៊ុន ឆន អធិការនគរបាលស្រុកកោះធំ បានឱ្យដឹងថា ជនសង្ស័យដែលត្រូវបានចាប់ខ្លួន ឈ្មោះ ឌីម ឌីណា ភេទប្រុស អាយុ១៩ឆ្នាំ ជនជាតិខ្មែរ មានទីលំនៅភូមិកើតហេតុ មុខរបរកសិករ ។ ចំណែក ជនរងគ្រោះដែលស្លាប់ឈ្មោះ អុល វណ្ណៈ ភេទប្រុស អាយុ២២ឆ្នាំ ជនជាតិខ្មែរ មានទីលំនៅភូមិកើតហេតុ មុខរបរកសិករ និងជាមិត្តភក្ដិរបស់ជនសង្ស័យ ។
លោកអធិការបានឱ្យដឹងបន្ថែមទៀតថា មុនពេលកើតហេតុ ជនរងគ្រោះនិងជនសង្ស័យ រួមជាមួយមិត្តភក្ដិ៣នាក់ទៀតមានឈ្មោះ ផុន សូនី ឈ្មោះ ផុន សុទី ឈ្មោះ ភ័នបាននាំគ្នាផឹកស្រាបៀរនៅចំណុចផ្ទះម្ដាយរបស់ឈ្មោះ ផុន សូនី ។ ក្រោយពេលផឹកអស់ស្រាបៀរអស់១កេសកន្លះ នៅវេលាម៉ោង៤រសៀលថ្ងៃដដែល ពួកគេបាននាំគ្នាទៅលេងទាត់បាល់នៅចំណុចកើតហេតុខាងលើ ។ ពេលពួកគេនាំគ្នាលេងបាល់ទាត់បានមួយសន្ទុះ ស្រាប់តែមានឈ្មោះ ធឹង ស៊ាងហេង ភេទប្រុស ដែលកំពុងតែផឹកស៊ីក្បែរនោះឃើញក៏ដើរទៅរករឿងឈ្មោះ ផុន សូនី រួចបានទាស់ពាក្យសម្ដីគ្នា ហើយឈ្មោះ ធឹង ស៊ាងហេង បានវាយទៅលើ ផុន សូនី មួយដៃចំមុខ ឃើញដូច្នោះ ឈ្មោះ ផុន សូនី, ផុន សុទី និងជនសង្ស័យ រួមទាំងជនរងគ្រោះជាមិត្តភក្ដិដែលលេងបាល់ទាត់ជាមួយគ្នាបាននាំគ្នាកាច់ដំបងឈើគដែលដោតធ្វើបង្គោលទីបាល់ជា៣កំណាត់ រួចរត់សំដៅវាយទៅលើឈ្មោះ ធឹង ស៊ាងហេង ។ ពេលនោះជនសង្ស័យបានយកដំបងវាយឈ្មោះ ធឹង ស៊ាងហេង តែឈ្មោះ ធឹង ស៊ាងហេង គេចផុត បែរជាត្រូវជនរងគ្រោះជាមិត្តភក្ដិពេញទំហឹងចំគុម្ពត្រចៀកខាងឆ្វេង បណ្ដាលឲ្យដួលសន្លប់បាត់ស្មារតីតែម្ដង ។ ពេលនោះជនសង្ស័យក៏បន្តរត់តាមឈ្មោះ ធឹង ស៊ាងហេង ទៀត តែត្រូវបានមិត្តភក្ដិរបស់ ធឹង ស៊ាងហេង ចាប់ឃាត់ចេញពីគ្នា ។
ភ្លាមៗនោះ ជនសង្ស័យបានរត់មកជួយមើលជនរងគ្រោះវិញ រួចសាច់ញាតិជនរងគ្រោះបានជនរងគ្រោះទៅសង្គ្រោះនៅពេទ្យប្រទេសវៀតណាម តែដោយរបួសធ្ងន់ពេកក៏ដាច់ខ្យល់ស្លាប់តាមផ្លូវនៅដីវៀតណាមបាត់ទៅ ។ បន្ទាប់មកបានយកសពជនរងគ្រោះមកផ្ទះវិញដើម្បីធ្វើបុណ្យតាមប្រពៃណី ។
ក្រោយពេលកើតហេតុ សមត្ថកិច្ចបានឃាត់ខ្លួនជនសង្ស័យបញ្ជូនមកអធិការដ្ឋាននគរបាលស្រុក ធ្វើការសាកសួរ និងកសាងសំណុំរឿង ពីបទ មនុស្សឃាតដោយអចេតនា ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ