កំពុងប្រមូលផ្ដុំនៅផ្ទះបាយ ត្រូវសមត្ថកិច្ចចាប់ខ្លួន
ខេត្តកំពង់ស្ពឺ ៖ មនុស្ស១០នាក់ត្រូវនគរបាលស្រុកសំរោងទងឃាត់ខ្លួនកាលពីវេលាម៉ោង៤ និង២០នាទីរសៀល ថ្ងៃទី២៩ ខែមករា ឆ្នាំ២០១៧ នៅក្នុងផ្ទះបាយនៃផ្ទះជួល …
ខេត្តកំពង់ស្ពឺ ៖ មនុស្ស១០នាក់ត្រូវនគរបាលស្រុកសំរោងទងឃាត់ខ្លួនកាលពីវេលាម៉ោង៤ និង២០នាទីរសៀល ថ្ងៃទី២៩ ខែមករា ឆ្នាំ២០១៧ នៅក្នុងផ្ទះបាយនៃផ្ទះជួលមួយកន្លែងស្ថិតក្នុងភូមិបុស្សតានៃ ឃុំកាហែង ខណៈពួកគេកំពុងប្រមូលផ្តុំគ្នាសេពគ្រឿងញៀន ។
លោកអនុសេនីយ៍ឯក ម៉ិច សុភាន់ អធិការរងនគរបាលស្រុកសំរោងទង បានឲ្យដឹងថា នៅមុនឈានទៅដល់ឃាត់ខ្លួនក្រុមជនសង្ស័យទាំង១០នាក់ខាងលើនេះ គឺកម្លាំងផ្នែកគ្រឿងញៀន និងផ្នែកព្រហ្មទណ្ឌស្រុកសហការជាមួយប៉ុស្តិ៍នគរបាលរដ្ឋបាលឃុំកាហែង បានធ្វើការល្បាតតាមមូលដ្ឋានឃើញពួកគេប្រមូលផ្តុំគ្នានៅចំណុចផ្ទះជួលដែលមានម្ចាស់ឈ្មោះ ស្រី ធុយ ភេទស្រី អាយុ៤៣ឆ្នាំ ដើម្បីជក់គ្រឿងញៀននៅក្នុងផ្ទះបាយ ទើបសមត្ថកិច្ចចូលទៅឃាត់ខ្លួន ។
លោកអធិការរងបានបន្តទៀតថា ជនសង្ស័យទាំង១០នាក់ដែលឃាត់បាននោះមាន ១-ឈ្មោះ សុខ គង់ ភេទប្រុស អាយុ២០ឆ្នាំ ស្នាក់នៅម្តុំផ្សារត្រពាំងក្រឡឹង ស្រុកភ្នំស្រួច, ២-ឈ្មោះ លឹម មេងហ៊ុយ ភេទប្រុស អាយុ២០ឆ្នាំ ស្នាក់នៅម្តុំផ្សារត្រពាំងក្រឡឹង, ៣-ឈ្មោះ រិត ឧត្ដម ភេទប្រុស អាយុ២០ឆ្នាំស្នាក់នៅម្តុំផ្សារត្រពាំងក្រឡឹង, ៤-ឈ្មោះ ហាប់ ចិត្រា ភេទប្រុស អាយុ២០ឆ្នាំ ស្នាក់នៅម្តុំផ្សារត្រពាំងក្រឡឹង, ៥-ឈ្មោះ ងួន សុផានិត ភេទប្រុស អាយុ២០ឆ្នាំ ស្នាក់នៅម្តុំផ្សារត្រពាំងក្រឡឹង, ៦-ឈ្មោះ សាន ផល្លា ភេទប្រុស អាយុ២១ឆ្នាំ ស្នាក់នៅភូមិបុស្សតានៃ ឃុំកាហែង, ៧-ឈ្មោះ សាត់ សុចាន់ ភេទប្រុស អាយុ២០ឆ្នាំ ស្នាក់នៅភូមិបុស្សតានៃ ឃុំកាហែង, ៨-ឈ្មោះ រ៉ាន រាយុទ្ធ ភេទប្រុស អាយុ២០ឆ្នាំ ស្នាក់នៅភូមិតាំងស្រឡៅ ឃុំតាំងស្យា ស្រុកភ្នំស្រួច, ៩-ឈ្មោះ ខុន ឆេងលីម ភេទប្រុស អាយុ២០ឆ្នាំ ស្នាក់នៅភូមិតាំងស្រឡៅ និង១០-ឈ្មោះ វ៉ាប់ សំភាស់ ភេទប្រុស អា២២ឆ្នាំ ស្នាក់នៅភូមិថ្នល់បំបែក ឃុំព្រៃរំដួលស្រុក ភ្នំស្រួច ។ ខណៈពេលឃាត់ខ្លួន សមត្ថកិច្ចដកហូតបានវត្ថុតាង ម៉ូតូ៥គ្រឿង និងម្សៅក្រាមពណ៌សថ្លា១កញ្ចប់ ។
ក្រោយពេលចាប់ខ្លួន ជនសង្ស័យទាំង១០នាក់ និងវត្ថុតាង ត្រូវបានកសាងសំណុំរឿងបញ្ជូនបន្តទៅការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ