មុននេះបន្តិច ! កម្មករ៣រោងចក្រលើកគ្នាបិទផ្លូវជាតិលេខ១
រាជធានីភ្នំពេញ ៖ កម្មករកម្មការីមកពីរោងចក្រចំនួន៣ ដែលមានថៅកែចិនម្នាក់ជាម្ចាស់រួមគ្នា កាលពីវេលាម៉ោង ១១ព្រឹកថ្ងៃទី៣០ ខែមករា ឆ្នាំ២០១៧នេះ បានលើកគ្នាមក …
រាជធានីភ្នំពេញ ៖ កម្មករកម្មការីមកពីរោងចក្រចំនួន៣ ដែលមានថៅកែចិនម្នាក់ជាម្ចាស់រួមគ្នា កាលពីវេលាម៉ោង ១១ព្រឹកថ្ងៃទី៣០ ខែមករា ឆ្នាំ២០១៧នេះ បានលើកគ្នាមកបិទផ្លូវជាតិលេខ១ សុំឲ្យអាជ្ញាធរជួយដោះស្រាយរឿងថៅកែចិនរបស់ខ្លួនក្ស័យធន រត់ចោលស្រុក មិនបើកប្រាក់បៀវត្សរ៍ខែ១២ និងប្រាក់បំណាច់ឆ្នាំឲ្យ ។
ក្រុមកម្មករ-កម្មការីនីបានឲ្យដឹងថា មូលហេតុដែលពួកគាត់សម្រេចនាំគ្នាបិទផ្លូវជាតិលេខ១នៅពេលនេះ គឺដោយសារក្រសួងពាក់ព័ន្ធផ្សេងៗមិនព្រមជួយរកដំណោះស្រាយជូនពួកគាត់ ខណៈពួកគាត់ធ្លាប់បានធ្វើការតវ៉ាជាច្រើនលើកច្រើនសារ រហូតដង្ហែជាក្បួនទៅតាមស្ថាប័នធំៗមួយចំនួនដើម្បីសុំការអន្តរាគមន៍ ។
ក្រុមកម្មករបន្តថា កម្មករសរុបក្នុងរោងចក្រទាំង៣មានចំនួនជាង១០០០នាក់ ហើយចំពោះប្រាក់បៀវត្សរ៍សម្រាប់ខែ១២ និងដំណាច់ឆ្នាំ ជាអតិបរិមាក្នុងម្នាក់អាចទទួលបានពី១៦០ដុល្លារ ទៅ១៨០ដុល្លារ ។
ក្រុមកម្មករបញ្ជាក់ថា ខាងតំណាងក្រសួងការងារ និងបណ្តុះបណ្តាលវិជ្ជាជីវៈ បានសន្យាថា នឹងចុះមកដោះស្រាយបញ្ហាខាងលើនេះជូនពួកខ្លួន នៅវេលាម៉ោង៩ព្រឹក ថ្ងៃទី៣០ ខែមករា នេះ ប៉ុន្តែមកទល់ម៉ោងកំណត់ ខាងក្រសួងបានទូរស័ព្ទមកក្រុមកម្មករវិញថា មិនទាន់បានចុះមកដោះស្រាយជូននោះទេ ជាហេតុធ្វើឲ្យក្រុមកម្មករជាង២០០នាក់ ក្នុងចំណោមជាង១០០០នាក់ លើកគ្នាមកបិទផ្លូវជាតិលេខ១តែម្តងទៅ ។ ដែលការបិទនេះធ្វើឡើងនៅចំណុចទល់មុខវត្ត មជ្ឈមវ័ន្ត ស្ថិតក្នុងសង្កាត់ក្បាលកោះ ខណ្ឌច្បារអំពៅ ។
សូមបញ្ជាក់ថា រោងចក្រទាំង៣ ដែលមានថៅកែចិនជាម្ចាស់ខាងលើ ទី១ ឈ្មោះ Pop world ទី២ ឈ្មោះ ក្បាលកោះ និងទី៣ ឈ្មោះ Pada រោងចក្រទាំង៣មានទីតាំងក្នុងសង្កាត់ក្បាលកោះ ខណ្ឌច្បារអំពៅ ។
យ៉ាងណាមិញ គិតមកត្រឹមវេលាម៉ោង១២ និង០០នាទីថ្ងៃត្រង់នេះ ក្រុមកម្មករបានសម្រេចបើកផ្លូវជាតិពាក់កណ្តាល ដោយបន្តប្រមូលឈរបិទផ្លូវម្ខាងដដែល ។ ជុំវិញការប្រមូលម្តុំនេះ គេសង្គេតឃើញមានកងកម្លាំងប្រជាការពារខណ្ឌ និងកម្លាំងកងរាជអាវុធហត្ថខណ្ឌច្បារអំពៅជាច្រើននាក់កំពុងត្រៀមនៅចំណុចកើតហេតុជានិច្ច ក្រែងកើតមានបាតុភាពអ្វីមួយមិនប្រក្រតី ពិសេសការបន្តបិទផ្លូវទាំងមូលតែម្តង ៕
ចែករំលែកព័តមាននេះ