រាជធានីភ្នំពេញ ៖ ក្រុមការងារវិស័យឯកជនសុទ្ធតែបានទទូចសុំឲ្យអាជ្ញាធរមូលដ្ឋានពង្រឹងការយកចិត្តទុកដាក់លើអនាម័យបរិស្ថាន និងកុំឲ្យមានសំរាមពាសវាលពាសកាលនៅតាមថ្នល់ជាតិ និងរមណីយដ្ឋាននានា ។ ប្រសិនបើទីក្រុងគ្មានសំរាម នឹងបានចូលរួមចំណែកលើកស្ទួយមុខមាត់ប្រទេស ប្រជាពលរដ្ឋរស់នៅមានសុខភាពល្អ និងទាក់ទាញភ្ញៀវទេសចរបរទេសចូលមកទស្សនាកាន់តែមានកំណើនឡើង ។
លោក ហូ វណ្ឌី អគ្គលេខាធិការសម្ព័ន្ធសមាគមទេសចរណ៍ជាតិកម្ពុជា បានថ្លែងកាលពីថ្ងៃទី១៧ មករាថា បញ្ហាសំរាមថង់ប្លាស្ទិកពាសវាលពាសកាលកំពុងកើតមានគ្រប់ទិសទី ជាពិសេស នៅតាមផ្លូវជាតិ និងរមណីយដ្ឋាននានា ដែលគ្មានការយកចិត្តទុកដាក់ពីអាជ្ញាធរមូលដ្ឋាន ទើបធ្វើឲ្យសំរាម និងកាកសំណល់បន្សល់ទុកយ៉ាងព្រោងព្រាតដែលធ្វើឲ្យប៉ះពាល់អារម្មណ៍ភ្ញៀវទេសចរជាតិ និងអន្តរជាតិ ។
លោកថ្លែងថា ៖ « សំរាមជាសត្រូវរបស់ភ្ញៀវទេសចរ ហេតុនេះអាជ្ញាធរមូលដ្ឋានគួរដាក់កាលវិភាគប្រចាំសប្តាហ៍ ឬប្រចាំខែ ដើម្បីបោសសំរាមតាមថ្នល់ជាតិ និងរមណីយដ្ឋាននានា ធ្វើឲ្យកម្ពុជាមានបរិស្ថានស្អាត និងអនាម័យ ព្រមទាំងរួមចំណែកទាក់ទាញភ្ញៀវទេសចរ » ។
ក្រសួងទេសចរណ៍បានដាក់ចេញនូវការប្រឡងប្រណាំងទីក្រុងស្អាត រមណីយដ្ឋានស្អាត និងសេវាកម្មល្អជាច្រើនឆ្នាំមកហើយ ប៉ុន្តែជាលទ្ធផល បញ្ហាសំរាមមិនទាន់ត្រូវបានដោះស្រាយនៅឡើយ ។
លោក ធួន ស៊ីណាន ប្រធានសហព័ន្ធទេសចរណ៍កម្ពុជា បានលើកឡើងស្រដៀងគ្នាថា បញ្ហាអនាម័យគួរចាប់ផ្តើមពីយើងម្នាក់ៗ ទើបអាចធ្វើឲ្យបរិស្ថាននៅប្រទេសរបស់យើងស្អាត និងមានអនាម័យ ។ ការផ្លាស់ប្តូរឥរិយាបថរបស់ប្រជាពលរដ្ឋដោយខ្លួនឯងមានសារសំខាន់ណាស់ ដើម្បីបញ្ចប់ការហោះហើរសំរាមពាសវាលពាសកាលនៅតាមរមណីយដ្ឋាន និងដងផ្លូវនានា ។
លោកបន្តថា ៖ « បើយើងក្រឡេកមើលតាមរមណីយដ្ឋាននានាភាគច្រើនសុទ្ធតែមានគំនរសំរាម និងថង់ប្លាស្ទិកហោះហើរពាសវាលពាសកាល ដែលបញ្ហានេះជារឿងរបស់យើងទាំងអស់គ្នា ហើយប្រជាពលរដ្ឋគ្រប់រូបគួរតែយកចិត្តទុកដាក់លើបញ្ហានេះ ។ ជាក់ស្តែង បើមើលទៅរមណីយដ្ឋានភ្នំឧដុង្គ ជាកន្លែងដែលទាក់ទាញភ្ញៀវទេសចរអន្តរជាតិ ប៉ុន្តែសំរាម ថង់ប្លាស្ទិកបានគរទុកពាសវាលពាសកាល » ។
សហប្រធានក្រុមការងារទេសចរណ៍ផ្នែកឯកជន លោក លូ ម៉េង លើកឡើងថា សំរាមពិតជាបញ្ហាធំមួយនៅកម្ពុជា ដែលប្រជាពលរដ្ឋកម្ពុជាទាំងអស់គួរតែយកចិត្តទុកដាក់ ព្រោះអ្នកទេសចរបរទេសភាគច្រើន នៅពេលពួកគេឃើញសំរាម ពួកគេខ្លាច និងមិនមកទស្សនាកម្ពុជាម្តងហើយម្តងទៀតនោះទេ ។ ប្រសិនជាចង់ទាក់ទាញទេសចរណ៍ឲ្យបានច្រើន ប្រជាពលរដ្ឋកម្ពុជាគួរតែភ្ញាក់រលឹកទាក់ទងនឹងបញ្ហានេះ ដើម្បីឲ្យកម្ពុជាក្លាយជាប្រទេសមានបរិស្ថានស្អាត ។
លោកបន្តថា ៖ « សំរាមពិតជាបញ្ហាធំណាស់នៅកម្ពុជា វាជាជំងឺមួយដែលត្រូវព្យាបាលបន្ទាន់លើឥរិយាបថរបស់ប្រជាពលរដ្ឋទាក់ទងនឹងការបោះចោលសំរាម កាកសំណល់ និងថង់ផ្លាស្ទិកនៅគ្រប់ទីកន្លែង » ។
លោក មាន ចាន់យ៉ាដា អភិបាលរង និងជាអ្នកនាំពាក្យសាលារាជធានីភ្នំពេញ ថ្លែងថា ការងារប្រមូលសំរាម សាលារាជធានីបានផ្ទេរទៅឲ្យរដ្ឋបាលខណ្ឌទាំង១២ជាអ្នកទទួលខុសត្រូវ និងធ្វើការជាមួយក្រុមហ៊ុនស៊ិនទ្រី លើការងារប្រមូល ដឹកជញ្ជូន និងបោសសម្អាត ប៉ុន្តែបើអាជ្ញាធរខណ្ឌគ្មានលទ្ធភាពធ្វើការងារនេះ ពួកគាត់អាចលើកសំណើមកកាន់រាជធានី ដើម្បីរកវិធានការដោះស្រាយ ។
លោក សៅ សុភាព អ្នកនាំពាក្យក្រសួងបរិស្ថាន ថ្លែងថា ជាគោលការណ៍ ការគ្រប់គ្រងសំរាមជាការងាររបស់រដ្ឋបាលថ្នាក់ក្រោមជាតិ ព្រោះអនុក្រឹតលេខ១១៣ បានផ្ទេរភារកិច្ចឲ្យថ្នាក់ក្រោមជាតិជាអ្នកត្រូវពង្រឹងការគ្រប់គ្រងសំរាមនៅតាមមូលដ្ឋានរបស់ខ្លួន តាមរយៈការធ្វើការងារជាមួយក្រុមហ៊ុន ឬអ្នកផ្តល់សេវាកម្មបោសសម្អាតសំរាមឲ្យបានសមស្រប។ ចំពោះថវិកាធ្វើការងារនេះ គឺអាជ្ញាធររាជធានី បានទទួលសេវាកម្មនេះតាមរយៈការបង់ប្រាក់ពីប្រជាពលរដ្ឋតាមវិក្កយបត្រទឹកភ្លើងហើយ ។ ចំណែករដ្ឋបាលខេត្តនីមួយៗ ក៏អនុវត្តស្រដៀងគ្នានេះផងដែរ ។
លោកបន្តថា ៖ « ក្រសួងធ្វើតែគោលនយោបាយ និងរៀបចំចេញគោលការណ៍ផ្សេងៗប៉ុណ្ណោះ ប៉ុន្តែអ្នកអនុវត្តជាក់ស្តែង គឺរដ្ឋបាលថ្នាក់ក្រោមជាតិ » ៕
ចែករំលែកព័តមាននេះ