រាជធានីភ្នំពេញ ៖ ក្រសួងទេសចរណ៍កំពុងសិក្សាដាក់ខេត្តបាត់ដំបងជាគោលដៅទេសចរណ៍បេតិកភណ្ឌថ្មីមួយ និងរៀបចំគោលដៅទេសចរណ៍ជាច្រើនទៀតក្នុងផែនការថ្មីរបស់ក្រសួង ។ នេះបើតាមមន្ត្រីជាន់ខ្ពស់នៃក្រសួងទេសចរណ៍ ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងកាលពីថ្ងៃទី២៦ មករា កន្លងមក ថា គម្រោងនេះធ្វើឡើងក្រោមកិច្ចសហការជាមួយប្រទេសហុងគ្រី ដើម្បីស្រូបយកភ្ញៀវទេសចរជាតិ អន្តរជាតិ ជាពិសេស ភ្ញៀវទេសចរមកពីប្រទេសហុងគ្រី និងបណ្តាប្រទេសក្នុងសហគមន៍អឺរ៉ុបផ្សេងៗទៀត ។ ក្រសួងក៏មានគម្រោងសហការជាមួយប្រទេសសិង្ហបុរី ដើម្បីអភិវឌ្ឍន៍ផលិតផលទេសចរណ៍នៅតំបន់ជាយក្រុងដូចជា តំបន់ភ្នំគូលែន តំបន់ចុងឃ្នាស ព្រែកទាល់ និងបឹងទន្លេសាបផងដែរ ។
លោកបន្តថា ៖ « ដើម្បីទាក់ទាញភ្ញៀវទេសចរឲ្យស្នាក់នៅបានយូរ និងចំណាយប្រាក់ច្រើននៅកម្ពុជា រាជរដ្ឋាភិបាលកម្ពុជា ក៏បានផ្តល់ទិដ្ឋាការចេញចូលរយៈពេល១ឆ្នាំ ដល់៣ឆ្នាំ សម្រាប់ភ្ញៀវទេសចរមកពីប្រទេសកូរ៉េ ជប៉ុន និងភ្ញៀវមកពីប្រទេសចិនផងដែរ » ។
ក្រសួងទេសចរណ៍ ក៏បានដាក់ចេញផែនការសកម្មភាពមួយចំនួនដើម្បីអភិវឌ្ឍន៍វិស័យទេសចរណ៍ រួមមាន ផែនការសកម្មភាពផ្តោតទៅលើការអភិវឌ្ឍផលិតផលទេសចរណ៍ និងហេដ្ឋារចនាសម្ព័ន្ធពាក់ព័ន្ធ ការបង្កើតតំបន់និវេសនដ្ឋានទេសចរណ៍ ការសម្រួលការធ្វើដំណើរ និងការដឹកជញ្ជូនភ្ញៀវទេសចរ សន្តិសុខ សុវត្ថិភាពភ្ញៀវទេសចរ មូលដ្ឋានគតិយុត្ត និងយន្តការអនុវត្ត ព្រមទាំងការអភិវឌ្ឍធនធានមនុស្សក្នុងវិស័យទេសចរណ៍ជាដើម ។
ក្នុងឆ្នាំ២០១៦កន្លងមកនេះ កម្ពុជាទទួលបានភ្ញៀវទេសចរសរុប៥លាននាក់ កើនឡើង៥ភាគរយ បើធៀបនឹងរយៈពេលដូចគ្នាក្នុងឆ្នាំ២០១៥។
លោក ហូ វណ្ឌី អគ្គលេខាធិការសម្ព័ន្ធសមាគមទេសចរណ៍ជាតិកម្ពុជា បានថ្លែងថា បាត់ដំបងជាខេត្តមានសក្តានុពលទេសចរណ៍ច្រើន ដោយសារខេត្តនេះរក្សាបាននូវសំណង់បេតិកភណ្ឌដែលអភិរក្សបានល្អប្រសើរ ជាពិសេស ក៏មានហេដ្ឋារចនាសម្ព័ន្ធល្អប្រសើរ រមណីយដ្ឋានធម្មជាតិ និងវប្បធម៌ច្រើននៅក្នុងខេត្តនេះ ។
លោកបន្តថា ៖ « ដោយសារជាខេត្តមានភាពស្រស់ស្អាត ការរក្សាបាននូវបេតិកភណ្ឌច្រើន មានរមណីយដ្ឋានធម្មជាតិ និងវប្បធម៌សម្បូរបែប ខេត្តបាត់ដំបងបាននិងកំពុងទាក់ទាញភ្ញៀវទេសចរច្រើនមកពីបណ្តាប្រទេសនានាក្នុងតំបន់អឺរ៉ុប » ។
ប្រធានសហព័ន្ធទេសចរណ៍កម្ពុជា លោក ធួន ស៊ីណាន អ្នកសម្របសម្រួលគម្រោងបានថ្លែងថា គម្រោងនេះពិតជាពិសេសបំផុត ប៉ុន្តែអ្វីដែលត្រូវធ្វើ គឺរាជរដ្ឋាភិបាលត្រូវពន្លឿនការងារ ព្រោះភាគីហុងគ្រីបានត្រៀមខ្លួនរួចរាល់ហើយ ។ គម្រោងនេះមានការសាងសង់កំពង់ផែ និងហេដ្ឋារចនាសម្ព័ន្ធនានាសម្រាប់បម្រើឲ្យវិស័យនេះ ។
លោកបន្តថា ៖ « ខេត្តបាត់ដំបងជាគ្រាប់ពេជ្រមួយ ដែលជាខេត្តមានវប្បធម៌ រចនាបថសំណង់ អត្តសញ្ញាណ និងអ្វីៗជាច្រើនទៀតដែលខេត្តនានាមិនមាន ។ ប្រសិនជាគម្រោងនេះដំណើរការ ខេត្តនឹងទាក់ទាញបានភ្ញៀវទេសចរអន្តរជាតិកាន់តែច្រើនថែមទៀត » ៕
ចែករំលែកព័តមាននេះ