សារព័ត៌មាន«Lifebuzz»កាលពីពេល ថ្មីៗកន្លងមកបានពិពណ៌នាពីភូមិគ្រឹះដ៏មានតម្លៃបំផុតនៅសហរដ្ឋអាមេរិក ដែលប្រកាសលក់ក្នុងតម្លៃ២៥០លានដុល្លារ ។ ភូមិគ្រឹះនោះរំលេចដោយក្បូរក្បាច់ដ៏ស្រស់ស្អាត មានទាំងអាងហែលទឹក ផ្ទះបាយ រោងចតរថយន្ត កន្លែងតាំងបង្ហាញស្រា និងទីលានវាយកូនបាល់ជាច្រើនកន្លែង ។
ភូមិគ្រឹះនោះស្ថិតនៅលើផ្ទៃដីប្រហែល៣.៥៣០ម៉ែត្រការ៉េ នៅតំបន់«បេលអ៊ែរ ឡូស អេនចឺឡេស» ។ ផ្នែកខាងក្នុងមានតុបតែងលម្អឧបករណ៍រចនាជាង១៣០ ហើយតួផ្ទះទាំងមូលមានបន្ទប់គេង១២,បន្ទប់ទឹក២១,ផ្ទះបាយចំនួន៣ ទីលានបោះបូលីង រោងភាពយន្ត អាងហែលទឹកធំ រោងចតរថយន្តអាចចតរថយន្តទំនើបបាន១២គ្រឿង កន្លែងចតឧទ្ធម្ភាគចក្រ និងបន្ទប់អាហារសម្រន់ គួបផ្សំជាមួយស្ករសូកូឡា មានតម្លៃជាង២០០.០០០ ដុល្លារ ។
គ្រឿងសង្ហារិមដ៏ស្រស់ស្អាតទាំងអស់បានការច្នៃប្រឌិតពីម្ចាស់ភូមិគ្រឹះផ្ទាល់គឺលោកBruce Makowsky មហាសេដ្ឋីជំនួញផ្នែកកាបូ និងអភិវឌ្ឍន៍ ដោយលោកបានសង់ភូមិគ្រឹះនោះឡើង ដើម្បីលក់ឱ្យអ្នកមានទ្រព្យស្តុកស្តម្ភ ។
បច្ចុប្បន្នភូមិគ្រឹះដ៏មានតម្លៃនោះបានផ្តួលឯតទគ្គកម្មផ្ទះថ្លៃបំផុតនៅសហរដ្ឋអាមេរិក គឺភូមិគ្រឹះដ៏ធំស្កឹមស្កៃមួយនៅតំបន់«Manalapan»រដ្ឋផ្លរីដា មានតម្លៃ១៩៥លានដុល្លារ ៕
ចែករំលែកព័តមាននេះ