រាជធានីភ្នំពេញ ៖ នារីវ័យក្មេងស្រស់ស្អាតម្នាក់បានបើករថយន្តម៉ាកម៉ាស្តា១គ្រឿងលឿនដូចហោះបុករះម៉ូតូស្កុបពី២គ្រឿងបង្កឲ្យមានការភ្ញាក់ផ្អើលកាលពីវេលាម៉ោង១១ និង១០នាទីយប់ ថ្ងៃទី២៨ ខែមករា ឆ្នាំ២០១៧ តាមបណ្តោយផ្លូវស៊ីសុវត្តិ កែងផ្លូវលេខ២៤០ សង្កាត់ជ័យជំនះ ខណ្ឌឫស្សីកែវ ។
រថយន្តបង្កម៉ាកម៉ាស្តា ពណ៌ឈាមជ្រូក អត់ស្លាកលេខ បើកបរដោយនារីវ៍័យក្មេងម្នាក់ ក្រោយកើតហេតុរត់គេចខ្លួនបាត់នៅសល់តែបុរសម្នាក់ត្រូវបានសមត្ថកិច្ចឃាត់ខ្លួន ។ ចំណែកម៉ូតូរងគ្រោះទាំង២គ្រឿង ១គ្រឿងម៉ាកហុដាស្កុបពី ពណ៌ស ស៊េរីឆ្នាំ២០១១ ពាក់ស្លាកលេខ កណ្តាល 1S-0455 ជិះស្រីម្នាក់ប្រុសម្នាក់ រងរបួសធ្ងន់ស្រាលចំណែក១គ្រឿងទៀតម៉ាកហុងដាស្កុបពី ពណ៌ស ស៊េរីឆ្នាំ២០១៤ ពាក់ស្លាកលេខ ភ្នំពេញ 1CC-1674 ជិះស្រីម្នាក់ប្រុសម្នាក់ រងរបួសធ្ងន់និងស្រាល ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញនារីវ័យក្មេងស្រស់ស្អាតម្នាក់បើករថយន្តបណ្ដោយផ្លូវស៊ីសុវត្តិក្នុងទិសដៅពីត្បូងទៅជើងក្នុងល្បឿនដូចហោះដោយមានបុរសម្នាក់រួមដំណើរជាមួយ លុះមកដល់ចំណុចកើតហេតុស្រាប់តែបុកម៉ូតូស្កុបពី១គ្រឿងពីក្រោយហើយក៏ជ្រុលចង្កូតទៅបុកម៉ូតូស្កុបពី១គ្រឿងទៀតដែលបើកបញ្ច្រាសទិសគ្នាចំពីមុខយ៉ាងពេញទំហឹងបណ្តាលឱ្យរងរបួសធ្ងន់និងស្រាល៤នាក់ ។
ប្រភពបន្តថា បន្ទាប់ពីបុកហើយរថយន្តបង្កបានព្យាយាមបើករត់រហូតដល់មុខផ្សារកណ្តាល ផ្លូវលេខ១៣ សង្កាត់ផ្សារកណ្តាល ទើបត្រូវបានសមត្ថកិច្ចឃាត់បានរថយន្ត និងបុរសម្នាក់ដែលរួមដំណើរជាមួយ រីឯនារីវ័យក្មេងស្រស់ស្អាតជាអ្នកបើករថយន្តបានរត់គេចខ្លួនបាត់ ។
ក្រោយពេលកើតហេតុ រថយន្តបង្ក និងម៉ូតូរងគ្រោះទាំង២គ្រឿង ព្រមទាំងបុរសម្នាក់ ត្រូវបានសមត្ថកិច្ចមូលរដ្ឋានប្រគល់ឱ្យការិយាល័យចរាចរណ៍ជើងគោករាជធានីភ្នំពេញ ដើម្បីធ្វើការដោយស្រាយទៅតាមផ្លូវច្បាប់ ៕
ចែករំលែកព័តមាននេះ