រាជធានីភ្នំពេញ ៖ មានការភ្ញាក់ផ្អើលមិនតិចទេ បន្ទាប់ពីអ្នកអត្ថាធិប្បាយកីឡាជើងចាស់ល្បីឈ្មោះ និងបច្ចុប្បន្នជាប្រធានផ្នែកកីឡានៃស្ថានីយទូរទស្សន៍ CTN លោក ម៉ា សេរី ធ្លាក់ខ្លួនឈឺដោយសភាពជំងឺរបស់លោកត្រូវអ្នកទៅសួរសុខទុក្ខបញ្ជាក់ថា ធ្ងន់ ។ អ្វីដែលធ្វើឱ្យគ្រួសារ សាច់ញាតិ និងមិត្តភក្តិ ទប់ទឹកភ្នែកមិនបាន គឺលោកបាននិយាយលាគេគ្រប់គ្នាដែលហាក់ដូចជាអស់សង្ឃឹមនឹងលទ្ធផលព្យាបាល ដែលខុសពីអ្នកជំងឺផ្សេងមិនព្រមទទួលយកនូវសភាពជំងឺរបស់ខ្លួន ។
យោងតាមការបញ្ជាក់ លោកមានជំងឺមហារីកថ្លើម ហើយបានរីករាលដល់ក្រពះ និងផ្នែកផ្សេងទៀតមិនខុសគ្នានឹងភរិយារបស់លោក រិន សាវេត នោះទេ ទើបសភាពជំងឺរបស់លោកស្ថិតក្នុងដំណាក់កាលភ័យបារម្ភ ។ លោកស្ថិតក្នុងការតាមដាន និងសម្រាកនៅមន្ទីរពេទ្យមិត្តភាពខ្មែរសូវៀត ហៅមន្ទីរពេទ្យរុស្ស៊ី ច្រើនថ្ងៃមកហើយ ប៉ុន្តែទើបតែសម្រេចចិត្តបើកទម្លាយជាសាធារណៈតាមរយៈអ្នកចុះទៅសួរសុខទុក្ខ រន្ធត់ចិត្តនឹងសម្ដីរបស់លោកដែលប្រកាសសុំលាទៅមុនដែលមិនខុសពីដឹងខ្លួនលោកនឹងមិនរស់ ។
ក្នុងវីដេអូឃ្លីបដែលបាន Live ផ្ទាល់ដោយអ្នកទៅសួរសុខទុក្ខលោកដល់មន្ទីរពេទ្យបង្ហាញឱ្យឃើញថា លោកមានសភាពស្គមស្គាំង ហើយបាននិយាយដោយការទទួលស្គាល់ជំងឺរបស់ខ្លួនថា សុំលាបងប្អូនទៅមុនហើយ ។ នេះជាការធ្លាក់ខ្លួនឈឺរបស់អ្នកអត្ថាធិប្បាយកីឡាល្បីឈ្មោះម្នាក់នៅក្នុងប្រទេសកម្ពុជា ដែលគ្មានអ្នកណានឹកស្មានដល់ថាលោកធ្លាក់ខ្លួនឈើធ្ងន់ដល់ថ្នាក់ហ្នឹងឡើយ ។
មានការបញ្ជាក់ថា សភាពជំងឺរបស់លោកស្ថិតក្នុងដំណាក់កាលចុងក្រោយ បើទោះជាដឹកបញ្ជូនទៅព្យាបាលក្រៅប្រទេសក៏មិនមានលទ្ធផល ។ ប៉ុន្តែអ្វីដែលអ្នកទៅសួរសុខទុក្ខកោតសរសើរ គឺលោក ម៉ា សេរី ហ៊ានទទួលដឹងថា ខ្លួនកើតជំងឺមហារីកថ្លើម ក្រពះ និងពោះវៀន ហើយមិនខ្លាចលទ្ធផលចុងក្រោយតាមរយៈការប្រាប់របស់គ្រូពេទ្យ ។ លោកបែរជាលួងលោមភរិយាថា កុំខ្លាចក្ដីស្លាប់ និងថា បើអត់ពីលោកទៅត្រូវតាំងជំហរមើលខុសត្រូវកូន និងកុំគិតច្រើននោះផង ។
លោកត្រូវបានថ្នាក់ដឹកនាំ និងសប្បុរសជនផ្ដល់ជំនួយច្រើន តែលោកបានប្រាប់សាច់ញាតិ និងមិត្តភក្តិ ដែលទៅសួរសុខទុក្ខថា លោកបានត្រៀមខ្លួនដើម្បីលាទៅមុនរួចហើយ ទើបម្នាក់ៗដែលបានឮសម្ដីរបស់លោករន្ធត់ចិត្តនិយាយមិនរួចគ្រប់គ្នា ៕
ចែករំលែកព័តមាននេះ