ប្រទេសថៃ ៖ រមណីយដ្ឋាន Sri Panwa Phuket ក្រោមការគ្រប់គ្រងរបស់ក្រុមហ៊ុន Sri Panwa Management Co នឹងដាក់គោលដៅភ្ញៀវទេសចរជនជាតិចិន និងអាមេរិក ដោយចំនួនភ្ញៀវទេសចរពីប្រទេសចិនត្រូវបានគិតថានឹងកើនឡើង២០% និងពីអាមេរិកនឹងកើនឡើង១០%ផងដែរ ។
នាយកគ្រប់គ្រងលោក Vorasit Issara បាននិយាយថា ចំនួនភ្ញៀវជនជាតិចិននិងអាមេរិកក្នុងរមណីយដ្ឋាននេះគឺកំពុងតែកើនឡើងជាបន្តបន្ទាប់ ។ លើសពីនេះទៀតនោះ ឥទ្ធិពលនៃប្រព័ន្ធសង្គមក៏កំពុងតែនាំនូវភ្ញៀវមានទ្រព្យសម្បត្តិជាច្រើនមកកាន់រមណីយដ្ឋានSri Panwaផងដែរ ។
លោកបាននិយាយថា ៖ «ភ្ញៀវទេសចរជនជាតិចិន និងអាមេរិក ត្រូវបានគិតថានឹងនាំមកប្រាក់ចំណូលច្រើនជាងគេមកកាន់រមណីយដ្ឋានរបស់ពួកយើង» ។
Sri Panwa សង្ឃឹមថានឹងអាចទទួលបានប្រាក់ចំណូលច្រើនជាង៧០០លានបាតក្នុងឆ្នាំនេះ ឬច្រើនជាងឆ្នាំមុន៧,៦% ព្រោះតែមានការកើនឡើងនៃចំនួនភ្ញៀវទេសចរមានទ្រព្យសម្បត្តិ ជាពិសេសជនជាតិចិន និងអាមេរិក ។
គួរបញ្ជាក់ផងដែរថា កាលពីឆ្នាំមុន Sri Panwaទទួលបានប្រាក់ចំណូល៦៥០លានបាត។
លោកបានបន្តថា ៖ « ខ្ញុំជឿជាក់ថាវិស័យទេសចរណ៍របស់ប្រទេសថៃ នឹងមានភាពល្អប្រសើរក្នុងឆ្នាំនេះ ព្រោះប្រទេសនេះបានត្រៀមខ្លួនរួចជាស្រេចដើម្បីស្វាគមន៍រាល់ភ្ញៀវទេសចរ មិនត្រឹមតែអ្នកដែលមានទ្រព្យសម្បត្តិប៉ុណ្ណោះទេ »។
លោកVorasit បាននិយាយថា ភ្ញៀវទេសចរជនជាតិចិនដែលមានទ្រព្យសម្បត្តិ មានសក្តានុពលខ្ពស់ណាស់ក្នុងការជំរុញដល់ការលូតលាស់របស់ប្រទេសថៃ ព្រោះពួកគេស្គាល់កន្លែងទាក់ទាញជាច្រើននៅទីនេះ ។
ក្នុងចំណោមភ្ញៀវទាំងអស់របស់Sri Panwa មាន២៥%ជាជនជាតិចិន ២៤%ជាជនជាតិថៃ ១០%ជាជនជាតិអាមេរិក និង១០%ទៀតជាជនជាតិអឺរ៉ុប និងជនជាតិដទៃ ។
លោកក៏បានឲ្យដឹងថា សណ្ឋាគារប្រណីតៗ ជាពិសេសលំដាប់ផ្កាយ៥ និង៦ បានបង្កើនតម្លៃបន្ទប់របស់ពួកគេពី៨ទៅ១០%ឯណោះ។ Sri Panwa ក៏បានធ្វើតាមហើយពេលនេះ គឺបន្ទប់មួយគឺមានតម្លៃជាមធ្យមប្រមាណ២៦,០០០បាត ក្នុងមួយយប់ ។
លោក Vorasit បាននិយាយថា ក្រុមហ៊ុនលោកនឹងចាប់ផ្តើមដំណាក់កាលថ្មីមួយ និងដាក់ប្រាក់១,២ប៊ីលានបាតក្នុងមូលនិធិវិនិយោគអចលនទ្រព្យក្នុងឆ្នាំនេះ ៕
ចែករំលែកព័តមាននេះ