វិធានការទប់ទល់នឹងលំហូរចេញនូវទ្រព្យធនរបស់ប្រទេសចិនគឺកំពុងតែប៉ះពាល់ដល់ទីផ្សារអចលនទ្រព្យទូទាំងពិភពលោក។
ក្នុងទីក្រុងឡុងដ៍ ប្រជាជនចិនដែលបានស្រវ៉ាទិញអចលនទ្រព្យនៅអគារអាផាតមែន ដែលខ្ពស់ជាងគេកាលពី៣ខែមុននោះគឺកំពុងតែជួបប្រទះភាពលំបាកក្នុងការផ្ទេរប្រាក់សម្រាប់ការទិញរបស់ពួកគេ ។ ចំណែកឯក្នុងស៊ីដនីប្រទេសអូស្ត្រាលីវិញ ក្រុមហ៊ុនអចលនទ្រព្យគឺកំពុងតែជួបប្រទះបញ្ហាយ៉ាងធំ ខណៈដែលអតិថិជនចិន ធ្វើការដកថយ ។ ក្នុងរយៈពេលមិនដល់១ខែផង បន្ទាប់ពីប្រទេសចិនប្រកាសពីវិធានការទប់ទល់នេះ ភ្នាក់ងារលក់អចលនទ្រព្យ ម្ចាស់អចលនទ្រព្យ និងក្រុមហ៊ុនអចលនទ្រព្យបានរាយការណ៍មកថាវិធានការនេះគឺកំពុងតែប៉ះពាល់លើការទិញអចលនទ្រព្យរបស់ពិភពលោក ។ ក្នុងពេលដែលតម្រូវការរបស់ប្រទេសចិនប្រហែលជាមិនអាចរលាយបាត់ក្នុងពេលឆាប់ៗនេះក្តី វិធានការនេះគឺកំពុងតែរារាំងអតិថិជនដែលខ្វះខាតទ្រព្យសម្បត្តិ និងជំនាញនៅបរទេស ។
លោក Zheng មន្ត្រីរដ្ឋការចូលនិវត្តន៍ម្នាក់ក្នុងទីក្រុងសៀងហៃ បាននិយាយថា៖ «វាពិបាកពេកហើយ ខ្ញុំដកថយហើយ»។ លោកប្រហែលជាអាចបោះបង់ចោលការទិញផ្ទះតម្លៃ ៣៥ម៉ឺនដុល្លារក្នុងទីក្រុង Melbourne ភាគខាងលិច ប្រទេសអូស្ត្រាលី បន្ទាប់ពីបានផ្ទេរប្រាក់៤៣.៦២០ដុល្លាររួចជាស្រេច កាលពីខែសីហាកន្លងមក ។
ការផ្លាស់ប្តូរនេះបានកើតមានឡើង បន្ទាប់ពីមានសេចក្តីប្រកាសមួយពីរដ្ឋបាលបំលាស់ប្ដូររូបិយប័ណ្ណបរទេស កាលពីថ្ងៃទី៣១ ខែធ្នូ ឆ្នាំមុន ។ ក្នុងចំណោមលក្ខខណ្ឌទាំងអស់ រដ្ឋបាលខាងលើបាននិយាយថា រាល់អតិថិជនទាំងអស់ត្រូវតែចុះហត្ថលេខាលើពាក្យសម្បថថា ពួកគេនឹងមិនប្រើប្រាស់ប្រាក់កូតាចំនួន៥ម៉ឺនដុល្លាររបស់ខ្លួនសម្រាប់វិនិយោគលើអចលនទ្រព្យបរទេសឡើយ។ អ្នកដែលរំលោភបំពាននឹងត្រូវបានដាក់ចូលក្នុងបញ្ជីត្រួតពិនិត្យរបស់រដ្ឋាភិបាល ត្រូវបានហាមឃាត់មិនឲ្យប្រើប្រាស់រូបិយប័ណ្ឌបរទេសរយៈពេល៣ឆ្នាំ និងត្រូវបានជាប់ក្នុងការស៊ើបអង្កេតទាក់ទិននឹងការលាងលុយ ។
លោក Wang Ning អនុប្រធានផ្នែកអន្តរជាតិក្នុងក្រុមហ៊ុន Fang Holdings បាននិយាយថា « អតិថិជនជាច្រើនមានការព្រួយបារម្ភ និងបានចាប់ផ្តើមមានការស្ទាក់ស្ទើរ »។ យោងទៅតាមលោក Christopher Todd Johnson ក្នុងក្រុមហ៊ុន Basis Point វិញបានឲ្យដឹងថា ក្នុងពេលដែលគោលនយោបាយថ្មីនេះអាចមើលទៅដូចមានតែសម្បក វាក៏នៅតែអាចបង្កឲ្យមានការធ្លាក់ចុះគួរសមនៃការទិញអចលទ្រព្យក្នុងប្រទេសអូស្ត្រាលីដែរ ។
វិធានការទប់ស្កាត់របស់ប្រទេសចិននេះបានបន្តដល់លំហូរទ្រព្យធនក្រុមហ៊ុនផងដែរកាលពីល្ងាចថ្ងៃព្រហស្បតិ៍កន្លងមក ដោយរដ្ឋាភិបាលបានស្នើឲ្យសហគ្រាសដែលមានគម្រោងវិនិយោគទៅបរទេស ធ្វើការបញ្ជាក់ពីប្រភពនៃថវិកាសម្រាប់ការទិញ និងស្នើឲ្យផ្តល់ព័ត៌មានបន្ថែមលើការចំណាយរបស់ពួកគេផងដែរ ។
បើទោះជាមានការតានតឹងយ៉ាងនេះក្តី ភ្នាក់ងារអចលនទ្រព្យនៅតែនិយាយថា អ្នកវិនិយោគជនជាតិចិនដែលមានចិត្តប្តេជ្ញានៅតែអាចស្វែងរកផ្លូវដដែល។ យោងតាមលោក Michael Finger ប្រធានរបស់ភ្នាក់ងារអចលនទ្រព្យ Ray White Double Bay បាននិយាយថា យ៉ាងណាក្តី អ្នកវិនិយោគជាច្រើនបានផ្ទេរប្រាក់របស់ពួកគេទុកនៅបរទេសរួចជាស្រេចមកហើយ ។
ប៉ុន្តែតម្រូវការរបស់ជនជាតិចិន អាចនឹងកើនឡើងយ៉ាងពេញលេញ បន្ទាប់ពីចូលឆ្នាំចិននេះដោយអ្នកមានទ្រព្យសម្បត្តិ នឹងធ្វើដំណើរការកម្សាន្តដើម្បីស្វែងរកអចលនទ្រព្យ៕
ចែករំលែកព័តមាននេះ