សារព័ត៌មានបរទេសកាលពីពេល ថ្មីៗកន្លងមកផ្សាយថា អង្គការតម្លាភាពអន្តរជាតិ «Transparency International» បានបង្ហាញតួលេខនៃអំពើពុករលួយ «CPI» ប្រចាំឆ្នាំ២០១៦ឃើញថា ប្រទេសថៃទទួលបានពិន្ទុតម្លាភាពចំនួន៣៥ពិន្ទុ ពីពិន្ទុពេញ១០០ ស្ថិតនៅលំដាប់ទី១០១ នៅលើពិភពលោកពីចំនួនសរុប១៧៦ប្រទេសដែលបានអង្កេត និងនៅលំដាប់ទី៤ក្នុងអាស៊ាន ដូចប្រទេសហ្វ៊ីលីពីន ។
CPI ពិនិត្យឃើញថា ប្រទេសថៃបានធ្លាក់ចុះពី៣៨ពិន្ទុនៅឆ្នាំ២០១៥ នៅត្រឹម៣៥ពិន្ទុក្នុងឆ្នាំ២០១៦ ដោយសារមានពាក់ព័ន្ធអំពើពុករលួយ និងបញ្ហានយោបាយ រួមទាំងការបិទសិទ្ធិសេរីភាពរបស់រដ្ឋាភិបាលក្នុងការបញ្ចេញមតិរបស់ពលរដ្ឋ ។
លទ្ធផលនៃការរៀបចំចំណាត់ថ្នាក់ចុងក្រោយឃើញថា ប្រទេសដាណឺម៉ាក នៅតែមានពិន្ទុតម្លាភាពខ្ពស់បំផុត៩០ពិន្ទុ ថយចុះ១ពិន្ទុកាលពីឆ្នាំ២០១៥ ប៉ុន្តែនៅតែគ្រងលំដាប់ទី១ នៅលើពិភពលោក និងមានរយៈពេល៣ឆ្នាំជាប់គ្នា ។ បន្ទាប់មករួមមានប្រទេសនូវែលសេឡង់ មាន៩០ពិន្ទុ និងហ្វាំងឡង់មាន៨៩ពិន្ទុ ស្ថិតនៅលំដាប់ទី២ និងទី៣ ។
ចំណែកចំណាត់ថ្នាក់ទី៤គឺប្រទេសស៊ុយអែតមាន៨៨ពិន្ទុ ។ ទី៥ ប្រទេសស្វ៊ីស មាន៨៦ពិន្ទុ ។ ទី៦ ប្រទេសន័រវ៉ែស មាន៨៥ពិន្ទុ ។ សិង្ហបុរីមាន៨៤ពិន្ទុ ស្ថិតនៅទី៧។
ប្រទេសហូឡង់ មាន៨៣ពិន្ទុ ស្ថិតនៅលំដាប់ទី៨។ កាណាដា ស្ថិតនៅលំដាប់ទី៩ មាន៨២ពិន្ទុ។ ទី១០ ប្រទេសអាល្លឺម៉ង់ មាន៨១ពិន្ទុ ។
សម្រាប់នៅភូមិភាគអាស៊ីអាគ្នេហ៍ សិង្ហបុរីគ្រងតំណែងលំដាប់ទី១ បន្ទាប់មកប្រទេសព្រុយណេ៥៨ពិន្ទុ ស្ថិតនៅលំដាប់ទី៤១នៅលើពិភពលោក។ ម៉ាឡេស៊ីមាន៤៩ពិន្ទុ ក្នុងលំដាប់៥៥នៅលើលោក ។ ឥណ្ឌូណេស៊ីមាន៣៧ពិន្ទុ ស្ថិតនៅលំដាប់ទី៩០នៅលើពិភពលោក ។ ថៃ និងហ្វ៊ីលីពីនមាន៣៥ពិន្ទុស្ថិតនៅលំដាប់ទី១០១។ វៀតណាមមាន៣៣ពិន្ទុ ស្ថិតក្នុងលំដាប់១២៣ នៅលើពិភពលោក ។ ឡាវមាន៣០ពិន្ទុ ស្ថិតនៅលំដាប់ទី១២៣ នៅលើពិភពលោក ។ មីយ៉ាន់ម៉ាមាន២៨ពិន្ទុ ក្នុងលំដាប់ទី១៣៦ ។ កម្ពុជា មាន២១ពិន្ទុ ស្ថិតនៅលំដាប់ទី១៥៦ នៅលើពិភពលោក ។
ដោយឡែកចំពោះប្រទេសដែលស្ថិតនៅលំដាប់បាតតារាងនៃការអង្កេតចំនួន១៧៦ប្រទេស គឺប្រទេសសូម៉ាលី មាន១០ពិន្ទុ ខណៈប្រទេសស៊ូដង់ខាងជើងស្ថិតក្នុងចំណាត់ថ្នាក់ទី១៧៥ មាន១១ពិន្ទុ ។ កូរ៉េខាងជើងមាន១២ពិន្ទុ ស្ថិតនៅលំដាប់ថ្នាក់ទី១៧៤ ។ ស៊ីរីមាន១៣ពិន្ទុ ស្ថិតក្នុងលំដាប់ថ្នាក់១៧៣ ។ រីឯប្រទេសដែលស្ថិតនៅចំណាត់ថ្នាក់ទី១៧០ រួមមានប្រទេសលីប៊ី, ប្រទេសស៊ូដង់ និងយេម៉ែន មាន១៤ពិន្ទុ៕
ចែករំលែកព័តមាននេះ