មួយខែនេះម៉ូតូថ្មីចូលតាមខេត្តកោះកុងជិតមួយពាន់គ្រឿង
ខេត្តកោះកុង ៖ ចុងខែមករានេះ តាមសេចក្តីរាយការណ៍ពីច្រកទ្វារអន្តរជាតិចាំយាម ខេត្តកោះកុង បានឲ្យដឹងថា មានម៉ូតូថ្មីនាំចូលពីប្រទេសថៃចំនួន២ដងដាច់ដោយឡែកពីគ្នា …
ខេត្តកោះកុង ៖ ចុងខែមករានេះ តាមសេចក្តីរាយការណ៍ពីច្រកទ្វារអន្តរជាតិចាំយាម ខេត្តកោះកុង បានឲ្យដឹងថា មានម៉ូតូថ្មីនាំចូលពីប្រទេសថៃចំនួន២ដងដាច់ដោយឡែកពីគ្នាតាមរថយន្តរបស់ថៃ ដែលជារថយន្តសម្រាប់ដឹកម៉ូតូ ។
លើកទី១ ៖ វេលាម៉ោង១ និង១៥នាទី ថ្ងៃទី២៦ ខែមករា អ្នករត់ការឈ្មោះ កឺ បាននាំម៉ូតូថ្មីម៉ាក PCX ចំនួន៣២គ្រឿងចូល ។
លើកទី២ ៖ វេលាម៉ោង១១ និង១០នាទីព្រឹក ថ្ងៃទី២៨ ខែមករាដដែល ម៉ូតូថ្មីម៉ាក Zoomer-X ចំនួន៤២គ្រឿងចូល ដែលមានឈ្មោះ កឺ ដដែលជាអ្នករត់ការនាំចូល ។
រឿងបង់ពន្ធគ្រប់ចំនួន ឬមិនគ្រប់ មិនអាចដឹងបានទេ ព្រោះមន្ត្រីគយដែលជាអ្នកទទួលបន្ទុកប្រាប់ថា មិនហ៊ាននិយាយទេ ជាសមត្ថកិច្ចរបស់លោកប្រធានសាខាខេត្ត ។
សេចក្តីរាយការណ៍ដដែលនិយាយថា ក្នុងខែមករានេះរហូតដល់ថ្ងៃទី២៨ ខែមករា ម៉ូតូថ្មីដែលនាំចូលមានប្រមាណជាង៨០០គ្រឿងហើយ ។
មិនអាចទាក់ទងមន្ត្រីគយសុំការបំភ្លឺបានទេ ម្ល៉ោះហើយនិយាយបានត្រឹមតែដឹងប៉ុណ្ណោះ សូម្បីឈ្មោះក្រុមហ៊ុនក៏គ្មាននិយាយដែរ គ្រាន់តែដឹងថា ឃ្លាំងស្តុកម៉ូតូនាំពីខេត្តកោះកុងស្ថិតនៅក្រោយផ្សារច្រាំងចំរេះ ខណ្ឌឫស្សីកែវ រាជធានីភ្នំពេញ ។
សម្រាប់ឆ្នាំ២០១៦កន្លងទៅ បើតាមមន្ត្រីមួយរូបប្រចាំច្រកទ្វារចាំយាមនិយាយថា ម៉ូតូថ្មីគ្រប់ម៉ាកត្រូវប៉ាន់ដែលនាំចូលមានរាប់ម៉ឺនគ្រឿង ដែលខ្លះចូលតាមច្រកទ្វារចាំយាម ខ្លះចូលតាមផ្លូវសមុទ្រ មកត្រូវប៉ាន់មេគយចល័តចាស់ដែលប្រចាំការនៅផ្លូវបំបែកស្រែអំបិល ។ ប៉ុន្តែបានផ្លាស់ចេញហើយ ព្រោះជាបងប្អូនថ្លៃជាមួយមេគយសាខាគយខេត្ត ៕
ចែករំលែកព័តមាននេះ