«ខួរក្បាល»ជាវត្ថុម្យ៉ាងដែលមានភាពស្មុគស្មាញបំផុតនៅក្នុងរាងកាយ ។ មន្ទីរពេទ្យ «Santo Toribio De Mogrovejo» នៅក្រុងលីម៉ា ប្រទេសប៉េរូ បានបង្កើតសារមន្ទីរមួយសម្រាប់រក្សាទុកអវយវៈ ដែលមានភាពស្មុគស្មាញនេះ ឬហៅថាសារមន្ទីរសរសៃ ប្រសាទវិទ្យា ។
សារមន្ទីរនោះមានទាំងខួរក្បាលរបស់អ្នកជំងឺ និងខួរក្បាលរបស់អ្នកមានសុខភាពល្អនៅឡូកឡំគ្នា ដើម្បីឱ្យអ្នកវិទ្យាសាស្ត្រសិក្សាស្រាវជ្រាវ និងបើកឱ្យមហាជនទូទៅចូលទស្សនា។ សារមន្ទីរខួរក្បាលនោះ គឺជាកន្លែងតែមួយនៅអាមេរិកឡាទីន និងជាសារមន្ទីរខួរក្បាលមានតែប៉ុន្មានកន្លែងនៅលើលោកដែលប្រមូលផ្តុំខួរក្បាល បើកឱ្យមហាជនចូលទស្សនា ។
មន្ទីរពេទ្យនោះបង្កើតឡើងជាង៣០០ឆ្នាំមុន និងមានខួរក្បាលសរុប២.៩១២បំណែក ប៉ុន្តែមានតាំងបង្ហាញតែជិត៣០០បំណែកប៉ុណ្ណោះ។ ក្នុងមួយឆ្នាំមានអ្នកចូលទស្សនាប្រហែល២០.០០០នាក់ ទាំងជនបរទេស និងនិស្សិតពេទ្យ ។ សារមន្ទីរនោះចែកចេញជា៣ផ្នែក ទី១-គឺបង្ហាញប្រសាទកាយវិភាគសាស្ត្រ ។ ផ្នែកទី២-តាំងបង្ហាញទារកទើបកើតដែលពិការភាព ។ ផ្នែកទី៣-គឺខួរក្បាលដែលទទួលការបំផ្លិចបំផ្លាញពីជំងឺ ផ្សេងៗដូចជាមហារីក ជំងឺបាត់ការចងចាំ និងវីរុស Zika ជាដើម ។
លោកស្រីដាយអាណា រីវ៉ាស់ គ្រូពេទ្យផ្នែកសរសៃប្រសាទដែលមើលការខុសត្រូវសារមន្ទីរបញ្ជាក់ពីខួរក្បាលមនុស្សថាវាមានទម្ងន់ប្រហែលពី១,២ទៅ២,៤គីឡូក្រាម អាស្រ័យលើកម្ពស់ និងទម្ងន់របស់មនុស្ស ម្នាក់ៗ រួមទាំងភេទ ។ ខួរក្បាលរបស់ស្ត្រីមានការវិវឌ្ឍច្រើនជាងបុរស ធ្វើឱ្យមានលក្ខណៈខុសប្លែកគ្នា គឺវិវឌ្ឍការទាក់ទងដែលស្ត្រីប្រើច្រើនជាងបុរស ៕
ចែករំលែកព័តមាននេះ