AFP កាលពីពេល ថ្មីៗកន្លងមកផ្សាយថា រដ្ឋាភិបាលបង់ក្លាដែសប្រកាសថារន្ទះបាញ់គឺជា «គ្រោះវិបត្ដិធម្មជាតិ» ក្រោយពីមានអ្នកស្លាប់ដោយសាររន្ទះបាញ់នៅទូទាំងប្រទេសជាង២០០នាក់ ក្នុងនោះមាន៨២នាក់ស្លាប់ក្នុងថ្ងៃតែមួយកាលពីខែឧសភា ឆ្នាំ២០១៦ តែអ្នកជំនាញយល់ថា តួលេខពិតប្រាកដអាចខ្ពស់ជាងនេះ ។
តាមការត្រួតពិនិត្យរបស់អង្គការឯករាជ្យមួយ បញ្ជាក់ថា មានពលរដ្ឋបង់ក្លាដែសរន្ទះបាញ់ស្លាប់ចំនួន៣៤៩នាក់ក្នុងឆ្នាំ២០១៦ ភាគច្រើនជាពលរដ្ឋនៅទីជនបទ និងមានមនុស្សជាច្រើនដែលសាច់ញាតិមិនបានបញ្ជាក់ពីការស្លាប់ដល់អាជ្ញាធរ ។
អាជ្ញាធរនៅអង្គភាពការពារគ្រោះវិបត្ដិធម្មជាតិបង់ក្លាដែស បានចំណាយពេលជាច្រើនខែរិះរកវិធីកាត់បន្ថយចំនួនអ្នកស្លាប់ពីរន្ទះដោយមានគម្រោងដាំដូងប្រេងគឺជាគម្រោងការដំបូង ក្នុងចំណោមបទដ្ឋាននានាជាច្រើនរបស់រដ្ឋាភិបាលប្រើសម្រាប់ទប់ស្កាត់ ។ លោកសា ខាម៉ាល លេខាធិការនៃអង្គការការពារគ្រោះវិបត្ដិធម្មជាតិថ្លែងថា រដ្ឋាភិបាលចាប់ផ្ដើមដាំដូងប្រេងនៅទីជនបទព្យាយាមកាត់បន្ថយអ្នកស្លាប់ដោយរន្ទះបាញ់ និងរំពឹងទុកថានឹងដាំបាន១លានដើមនៅក្នុងខែវិច្ឆិកា ឆ្នាំ២០១៧ ។
ក្រុមអ្នកជំនាញថ្លែងថា តួលេខចំនួនអ្នកស្លាប់ដែលឡើងខ្ពស់ មូលហេតុមួយផ្នែកកើតឡើងដោយកង្វះខាតដើមឈើ ព្រោះដើមឈើអាចស្រូបយកកម្លាំងពីរន្ទះបាន ។
លោកសា អារ៉ាម អ្នកឧតុនិយមរបស់បង់ក្លាដែស ដែលសិក្សាស្រាវជ្រាវទាក់ទងនឹងរន្ទះបាញ់ថ្លែងថា «ការដាំដើមឈើនឹងកាត់បន្ថយចំនួនអ្នកស្លាប់ដោយរន្ទះបានច្រើន ។
ដូងប្រេងត្រូវចំណាយពេលជាច្រើនឆ្នាំទើបរីកធំធាត់ ប៉ុន្ដែជាចុងក្រោយនេះវាជានិន្នាការដ៏ល្អរបស់រដ្ឋាភិបាលក្នុងការបន្ថយចំនួនអ្នកស្លាប់» ។
ចំនួននៃរន្ទះបាញ់នៅបង់ក្លាដែស បានកើនខ្ពស់ក្រោយពីការកាប់ដើមឈើជាច្រើននៅទីជនបទ ដោយកសិករបានកាប់ដើមឈើ ដើម្បីយកដីដាំដំណាំ ៕
ចែករំលែកព័តមាននេះ