ខេត្តប៉ៃលិន ៖ ក្រោយពីភាគីថៃបិទមិនឱ្យប្រជាពលរដ្ឋខ្មែរដឹកដំឡូងមីស្រស់ យកទៅលក់ដូរនៅលើទឹកដីប្រទេសគេ ដោយអនុញ្ញាតឱ្យដឹកតែដំឡូងមីស្ងួតចូលនោះ ធ្វើឱ្យពួកគាត់ម្នាក់ៗមានការលំបាកក្នុងចិត្ត និងព្រួយបារម្ភយ៉ាងខ្លាំងចំពោះបញ្ហាជីវភាពរស់នៅប្រចាំថ្ងៃ ខណៈអ្នកខ្លះដាំដំឡូងមីបានជាច្រើនហិកតា លំបាកក្នុងការកាប់ចិញ្ច្រាំហាលតាមការទាមទារ។ លុះពេលនេះ ខាងថៃបានបើកឱ្យខ្មែរដឹកទាំងដំឡូងមីស្រស់និងស្ងួត ចូលទៅលក់ដូរតាមធម្មតាហើយ ដោយគ្រាន់តែមានច្បាប់ទម្លាប់ត្រឹមត្រូវប៉ុណ្ណោះ ។
ប្រជាពលរដ្ឋបានឱ្យដឹងកាលពីថ្ងៃទី២៣ ខែមករា ថា ក្រោយពីភាគីថៃបិទមិនឱ្យកសិករខ្មែរយើងដឹកដំឡូងមីស្រស់យកទៅលក់នៅទឹកដីគេ ធ្វើឱ្យពួកគាត់ម្នាក់ៗព្រួយបារម្ភយ៉ាងខ្លាំងចំពោះជីវភាពរស់នៅប្រចាំថ្ងៃ ។ ពួកគាត់មួយចំនួនដាំដំឡូងមីចាប់ពី១០ទៅ២០ហិកតា ហើយបើខាងថៃមិនឱ្យនាំចូលដំឡូងមីស្រស់ទេ នោះពួកគាត់ពិតជាមិនអាចដកយកមកកាប់ចិញ្ច្រាំហាលឱ្យស្ងួត រួចដឹកទៅលក់បានឡើយ ព្រោះត្រូវចំណាយដើមទុនអស់ច្រើនថែមទាំងចំណាយពេលវេលាទៀតផង ។
ប្រភពដដែលបន្តថា ប៉ុន្តែកាលពីប៉ុន្មានខែមុននេះ ខាងភាគីថៃបានបើកឱ្យខ្មែរដឹកដំឡូងមីស្រស់ចូលទៅលក់ដូរដូចដំឡូងមីស្ងួតដែរ ទើបធ្វើឱ្យពួកគាត់រសប្បាយចិត្តឡើងវិញ ហើយក៏បន្តនាំគ្នាចាប់ផ្តើមដកលក់ជាបណ្តើរៗ បើទោះបីជាថ្លៃដំឡូងមីធ្លាក់ទាបខ្លាំងយ៉ាងណាក៏ដោយ ។
ម្យ៉ាងវិញទៀត ដំឡូងមីស្រស់ថ្លៃត្រឹមតែ១,៣ទៅ១,៥បាត(ប្រាក់ថៃ)ក្នុង១គីឡូក្រាម ដំឡូងមីស្ងួតលក់បាន៣,៥ទៅ៤បាតក្នុង១គីឡូក្រាម ដែលស្ទើរតែដកលក់រួចមិនមានសល់ប្រាក់សម្រាប់សងបំណុលគេឡើយ ។ ប៉ុន្តែពួកគាត់ត្រូវបង្ខំចិត្តដកលក់ ដើម្បីយកប្រាក់ទៅសងបំណុលធនាគារ និងអង្គការផ្សេងៗមួយចំនួនទៀត ។
ពាក់ព័ន្ធទៅនឹងបញ្ហានេះ លោក សុខ សាវុធ ប្រធានការិយាល័យច្រកទ្វារអន្តរជាតិព្រំ បានឱ្យដឹងកាលពីព្រឹកថ្ងៃទី២៣ ខែមករា ថា ខាងភាគីថៃបានបើកឱ្យកសិករខ្មែរយើងដឹកដំឡូងមីស្រស់ចូលទៅលក់ដូរនៅក្នុងប្រទេសរបស់គេដូចដំឡូងមីស្ងួតដែរ ដោយគ្រាន់តែបំពេញលក្ខខណ្ឌតាមច្បាប់ឲ្យបានត្រឹមត្រូវប៉ុណ្ណោះ ។ ចំណែកបញ្ហាផ្សេងទៀត មិនមានអ្វីខុសប្លែកនោះឡើយ ហើយបើសិនជាកសិករមានចម្ងល់សង្ស័យ អាចទាក់ទងសួរទៅខាងលោកគ្រប់ពេលវេលាបាន ។
សូមបញ្ជាក់ថា បន្ទាប់ពីកសិផលមានការធ្លាក់ថ្លៃយ៉ាងគំហុកនៅឆ្នាំនេះ ប្រជាពលរដ្ឋរស់នៅខេត្តប៉ៃលិនមួយចំនួន បានផ្លាស់ប្តូរទីលំនៅ ដោយលក់ដីនិងផ្ទះ រួចចាកចេញទៅរស់នៅខេត្តផ្សេងៗ ។ ចំណែកអ្នកខ្លះទៀត ដោយសារជំពាក់បំណុលគេច្រើនពេក មិនដឹងរកស៊ីធ្វើការអ្វី ក៏នាំទាំងកូនចៅទៅធ្វើកម្មករនៅក្នុងប្រទេសថៃ ដោយមិនបានរៀនសូត្រអ្វីឡើយ ៕
ចែករំលែកព័តមាននេះ